ငါတို့ပြိုင်ဘက်လုပ်မယ်ဆိုတဲ့ သဘောတူညီချက်က ဘယ်မလဲ?(ဘာသာပြန်)

အခန်း-၅၇ မင်းနဲ့အတူရှိချင်တယ်။

Unicode

အခန်း-၅၇ မင်းနဲ့အတူရှိချင်တယ်။

[မင်းအေးနေသေးရင် ငါ့ကိုဖက်ပြီးအိပ်ပါ...]

အချိန်အတန်ကြာ စဉ်းစားပြီးသည်အထိ စုယန်သည် ကုဖေးတိ၏အဆိပ်ကို လွှဲပြောင်းယူရန်မှာ အဘယ်ကြောင့် မိစ္ဆာဂိုဏ်း၏သခင်ငယ်ဖြစ်ရကြောင်း အကြောင်းပြချက်ကို ရှာမတွေ့သေးပေ။

သူက သူ့ကိုယ်သူ ဖြေသိမ့်လိုက်၏: ဒီကမ္ဘာမှာရှိတဲ့ အရာအားလုံးက စိတ်ကူးယဉ်ဆန်တယ်။ တချို့ ဇာတ်ကွက်တွေက တိကျသေချာမှူမရှိတာ ဒါမှမဟုတ် နားမလည်နိုင်တာတွေလဲ ဖြစ်ကောင်းဖြစ်နိုင်တာပဲလေ။ အဲဒီအချက်ကို အခြေခံပြီး ဖူလင်းယွင် 'ကြက်သွေးနီ ညှိုးနွမ်းခြင်း' ကျင့်စဉ် လေ့ကျင့်နိုင်သွားတာကို နားလည်ပေးလို့ရပါတယ်။

သည့်အပြင် ယခုအရေးကြီးသည်မှာ ဇာတ်လိုက်မ၏ သံသယဖြစ်ဖွယ် အချက်များကို ဆန်းစစ်ရန်မဟုတ်ဘဲ ရေခဲဝိညာဉ်ကြောင့် ဖြစ်ပေါ်လာသော ပြဿနာများကို ကျော်လွှားပြီး ကျင့်စဉ်ကို ကျွမ်းကျင်အောင် ဇွဲရှိရှိ လေ့ကျင့်ရန်ဖြစ်သည်။

စုယန်သည် စိတ်ကိုတည်အောင်ထားပြီး တင်ပျဉ်ခွေ ထိုင်ကာ မီးကိုထပ်မံငြိမ်းသတ်လိုက်သည်။ ပြီးနောက် သူ၏အတွင်းအားကို လှုံ့ဆော်လိုက်ပြန်၏။

ရေခဲဝိညာဉ်သည် အသွားနှစ်ဖက်ပါသော ဓားတစ်လက် ဖြစ်သော်လည်း အအေးပိုင်းနည်းပညာများကို လေ့ကျင့်ရာတွင် အမှန်တကယ် အကျိုးရှိသည်ဟု ဆိုရမည်ဖြစ်သည်။

စုယန်သည် 'ကြက်သွေးနီညှိုးနွမ်းခြင်း'၏ ပထမအဆင့်ကို ကျော်ဖြတ်ရန် သုံးရက်ခန့် အချိန်ယူခဲ့ရသည်။ အစကို ဖြတ်ကျော်ပြီးနောက် နှောင်းပိုင်းသည် အခက်အခဲ သိပ်မရှိတော့ပေ။ ရေခဲဝိညာဉ်၏အကူအညီဖြင့် နောက်နှစ်ရက် အကြာတွင် စုယန်သည် 'ကြက်သွေးနီညှိုးနွမ်းခြင်း'၏ ပထမအဆင့်ကို အောင်မြင်စွာ တတ်မြောက်သွား လေသည်။

စုယန်သည် တရားထိုင်ရာမှ မျက်လုံးဖွင့်လိုက်ပြီး ခြေလက်များကို ခဏတာ လှုပ်ရှားလိုက်သည်။ ၎င်းတို့သည် အေးခဲလုနီးပါး တောင့်တင်းနေ သောကြောင့် အပူချိန်ကို ပုံမှန်ပြန်ဖြစ်အောင်လုပ်ရန် အမှောင်ထဲ၌ ခဏတာ ခုန်ပေါက်နေခဲ့၏။ ထို့နောက် မီးတိုင်ကို ထွန်းညှိကာ သူတို့နှစ်ဦးတည်းခိုသော ကျောက်ခန်းဆီသို့ ပြန်သွားခဲ့သည်။