ငါတို့ပြိုင်ဘက်လုပ်မယ်ဆိုတဲ့ သဘောတူညီချက်က ဘယ်မလဲ?(ဘာသာပြန်)

အခန်း-၆၆ သူ့ကိုဘယ်လိုသတ်မှာလဲ?

Unicode

အခန်း-၆၆ သူ့ကိုဘယ်လိုသတ်မှာလဲ?

[သရုပ်ဆောင်တာက အရမ်းလက်တွေ့ဆန်မနေဘူးလား...?]

မြင်းရထားသည် မြို့၏တောင်ဘက်ဝင်ပေါက်မှ ကျယ်ဝန်းသော လမ်းမကြီးပေါ်သို့ ထွက်လာခဲ့သည်။

နောက်တစ်နေ့ နေဝင်ရီတရောအချိန်တွင်မူ အလယ်ပိုင်းလွင်ပြင်၏ သာယာဝပြောမှုကို တဖြည်းဖြည်း မြင်တွေ့လာရပြီဖြစ်သည်။

မေ့ရှစ်စန်းသည် ကုဖေးတိနှင့် စုယန်ကို တည်းခိုခန်းသို့ ပို့ဆောင်ပေးခဲ့ပြီး ရထားလုံးကို ရောင်းချရန် ထွက်သွားခဲ့သည်။ ပြီးနောက် မြင်းများနှင့်အတူ တည်းခိုခန်းသို့ပြန်လာကာ သူ့အတွက် တစ်ယောက်ခန်း တစ်ခန်း ထပ်ယူခဲ့လေသည်။

စုယန်၏ လက်ရှိအခြေအနေအရ အောက်ထပ်ဆင်းပြီး ညစာစားရန် အဆင်မပြေပေ။ ထို့ကြောင့် ကုဖေးတိသည် လှုပ်ရှားမှုတိုင်းကို အဆက်မပြတ် စောင့်ကြည့်မှတ်သားရန် မှာကြားထားခဲ့ပြီး သတင်းနှင့် ကောလဟာလများကို စုံစမ်းရန် အောက်ထပ်သို့ သူတစ်ယောက်တည်း ဆင်းသွားခဲ့လေ၏။

မိစ္ဆာဂိုဏ်း၏ သခင်ငယ်သည် ပန်းလက်ထောက်နှစ်ဦးနှင့်အတူ အလယ်ပိုင်းလွင်ပြင်၌ ပုန်းလျှိုး ကွယ်လျှိုး သွားလာနေသည်ဟူသော ကောလဟာလမှာ ပျံ့နှံ့နေဆဲဖြစ်သည်။ ထို့အပြင် အလယ်ပိုင်းလွင်ပြင် သိုင်းပညာရှင်များအကြား မိစ္ဆာဂိုဏ်း၏ သခင်ငယ်ကို ဖမ်းဆီးပြီး စံအိမ်သခင်လေးကု၏ တည်နေရာကို စစ်ဆေးမေးမြန်းမည်ဟူ၍ လှုံ့ဆော်ပေးမှုများလည်း ရှိလာ၏။

ကုဖေးတိ၏ ဆန့်ကျင်ဘက်တွင် ထိုင်နေသော မျက်နှာဝိုင်းဝိုင်းနှင့်လူငယ်လေးက နှာခေါင်းရှုံ့ကာ သူ့အား ပြောလာသည်။

"ဒီကောလဟာလတွေ ဘယ်ကလာမှန်း ကျွန်‌တော်လဲ မသိပါဘူးဗျာ။ ‌သူ့တို့ဟာသူတို့ လျှောက်ထွင်ပြီး ပြောနေကြတာပဲ!"

သူက လေသံကိုလျှော့ပြီး လေးလေးနက်နက် ဆက်ပြော၏။

"စုယန်က လူငယ်သူရဲကောင်းကုကို မိစ္ဆာဂိုဏ်းထဲ ဖမ်းခေါ်သွားခဲ့တာ မဟုတ်လား။ လူငယ်သူရဲကောင်းကုက စုယန်ဆီမှာ လွယ်လွယ်နဲ့ အညံ့ခံလိမ့်မယ်လို့ ကျွန်တော်တော့မထင်ပါဘူး။ ဒါကြောင့် ဒီအချိန်မှာ သူက လူငယ်သူရဲကောင်းကုကို ဘယ်လို ကိုင်တွယ်ရမလဲဆိုတာကိုသာ စဉ်းစားနေရမှာ... အလယ်ပိုင်းလွင်ပြင်မှာ အားအားယားယား လျှောက်သွားနေဖို့ သူ့မှာအချိန်ရှိပါ့မလား?"