ဆန်ကုန်မြေလေးGong၏ ဗီလိန်အစ်ကိုအားလက်ထပ်ခြင်း {Completed}

Chapter 12✰Edited

Unicode

Chapter 12 : သူက…တကယ်တော့ အဲ့လောက်ကြီး မခက်ထန်သလိုပဲလားလို့?

အရင်နှစ်ရက်က ယန်ကျင်ရွှင် သူ့ဆီကိုမလာခဲ့ချေ၊ ၎င်းက ရှန်ပေါ်ဟန်အတွက်တော့ ဖြစ်တောင့်ဖြစ်ခဲပင်။

အတိတ်မှာတုန်းကဆို နှစ်ရက်တောင်မပြောနဲ့ တကယ်လို့ သူသာထိုလူကိုတစ်ရက်လောက် မဆက်သွယ်လိုက်ရင် ထိုသူက လုံးဝမနေနိုင်တော့ပေ။ ယန်ကျင်ရွှင်က အမှန်တကယ်ပင် သူ့အားအလွန်အမင်းချစ်ခဲ့တာဖြစ်သည်။

အဲ့လိုမှမဟုတ်ရင် သူ၏ရိုးသားတဲ့စရိုက်အရ ဘယ်လိုလုပ်ပြီး ကျည်ဆန်ကိုကိုက်လို့ သူ့ကိုနိုက်ကလပ်မှာ လာရှာနိုင်ပါ့မလဲ။

လွန်ခဲ့သည့်နှစ်ရက်က သူလုပ်ခဲ့တာတွေက အတော်လေးမမှန်ဘူးဆိုတာ မှန်ကန်ပါသည်။ အနည်းဆုံးတော့ လင်လိနဲ့အခြားသူတွေ ယန်ကျင်ရွှင်ကိုလှောင်ပြောင်နေတဲ့အချိန် သူ ယန်ကျင်ရွှင်ဘက်ကရပ်တည်ပြီးတော့ သူ့အတွက်ပြောပေးခဲ့သင့်တာ၊ သူက သူ့(ယန်ကျင်ရွှင်)ကို ငြီးငွေ့နေတာကြောင့် သူတို့လမ်းခွဲခဲ့ပြီးပြီဆိုရင်တောင်မှပေါ့…

သူသာ ယန်ကျင်ရွှင်အတွက် နည်းနည်းလောက်ရပ်တည်ပေးခဲ့သရွေ့ နောက်ဆက်တွဲဗီဒီယိုကိစ္စက ဖြစ်ပျက်လာမှာမဟုတ်ပေ။

သို့ရာတွင် ထိုအချိန်တုန်းက သူက ထိုသူနဲ့ပတ်သက်ပြီး အမှန်တကယ်ကို စိတ်ရှုပ်နေခဲ့တာပင်။

သူ့ရှေ့မှောက်မှ ယန်ကျင်ရွှင်၏မိန်းမဆန်သည့်အသွင်အပြင်ကို သူမှတ်မိသေးသည်။ သူက အမြဲတမ်း အခြားသူတွေကို ကရုဏာထားတတ်ပြီး နိမ့်ကျတဲ့သူ့မျက်လုံးတွေနှင့် သူ့ကို ဂရုတစိုက်ကြည့်လာတဲ့အချိန်တိုင်း ရှန်ပေါ်ဟန်အနည်းငယ်မနှစ်မြို့သလိုခံစားမိလာရသည်။

သို့တစေ ယန်ကျင်ရွှင်က သူ့အားတွယ်ကပ်တဲ့အချိန်၊ သူ့ကိုစိတ်ကျေနပ်အောင် ကြိုးစားနေတဲ့အချိန်နှင့် သူ့အားစွန့်ခွာမသွားနိုင်တာတွေက ရှန်ပေါ်ဟန်၏ ကိုယ့်ကိုကိုယ်ယုံကြည်မှုနဲ့ ကိုယ့်ကိုကိုယ်တန်ဖိုးထားမှုအား မြင့်တက်လာစေကာ သူ တစ်ဖက်လူကို ပိုလို့တောင်ကြမ်းကြမ်းတမ်းတမ်း ဆက်ဆံချင်လာမိသည်…ဘယ်လိုပဲဖြစ်ဖြစ် ယန်ကျင်ရွှင်က သူ့ကိုစွန့်ခွာသွားမှာမှမဟုတ်ဘဲ။