الحفلة تسالات و كل وحدة مشات لدارها ، بقاو غي صحاب الفيلا ، وقت نعاس حنين فات و النعاس طار ليها ، واقفة ليها جويرية فوق راسها تتحاول معاها تنعس ووالو...
_ عطيني التليفون احبيبة ديالي غدا و نعطيه ليك صافي ، غدا و عاودي شوفي التصاور عطيني و غمضي عينيك و نعسي ...
حنين ( زامة شفايفها هزات كتافها برفض ) لا مابغيتش...
جويرية جلسات حداها تتلعب ليها فشعرها الزعيعر رطيطب و قالت...: علاش مابغيتيش شوفي شحال الساعة ياك قلتي لباباك غتغمضي عينيك و تنعسي فين الوعد لي عطيتيه ...
حنين ( برفض ) مابغيتش مابغيتش...
تنهدات جويرية بقلة حيلة و طلعات نعسات حداها ، بغات تطفي الضو ماخلاتهاش حنين و ناضت تبكي ليها خلاتو خفيف و تكات على جنبها تتنعس فيها وهي والو ...
_ صافي احبيبة حطي التليفون و غمضي عينيك ، يعرف باباك غيمنع عليك التليفون و ماغاديش يبقى يعطيه ليك ساعة فالنهار غتولي ساعة فالسيمانة و الا عرفك مزال نانعستي و تتلعبي بالتليفون لدابا غيغضب عليك و عليا تبغيه يغضب ...
حنين ( تتدور عينيها ) لااا...
جويرية : و يلاه نعسي بركة ماتشوفي فالتصاور حتى لغذا و عاودي شوفيهم مع عمتك جليلة و صفاء ....( مدات يديها بغات تحيدو ليها زيرات عليه مابغاتش طلق منو تنهددات و عاودات و قالت ) اوى ابنتي الله يعطيك الرضى...
خلاتها هكاك تتشوف فالتصاور ديالها تيعجبها تشوف التصاور ديالها فالتليفون ، دخلات عندهم صفاء بشوميز د النعاس و شعرها كحل طويل طالقاه يغطي درعانها و يميل مع خصرها ، هزات حاجب صارم و قالت...
_ جويرية تقدري تنعسي انا غنتكلف بحنين...
جويرية ( تتغمز فيها بمعنى ماتغوتيش عليها ) وخا تكلفي بيها نتي مابغاتش تسمع ليا انا والو قلت ليها غيغضب عليك باباك و مابغاتش ....
صفاء : تقدري تمشي ترتاحي تصبحي على خير...
جويرية ( تتطلع و تهبط ) تصبحي على خير...
عاقت صفاء بشوفاتها و بقات جامدة حتى خرجات جويرية تتهز فراسها و تنهد...
_ الله يلين قلبها ...
غي مشات جويرية قربات صفاء من حنين بملامح جادة بلا ضحك بلا والو مدات يديها و قالت...
_ اري التليفون ..
حنين كمشات عنقها حابسة البكية : باقي ..
صفاء ( ببرود ) التليفون احنين مانعاودش كلامي ثلاث مرات عتحطي التليفون و تغمضي عينيك و تنعسي و الا غنقولها لباباك و غتبقاي مع جدك عبد الغفور بلا بيا و بلا جويرية و بلا باباك غتبقاي معاه بوحدك ...
حنين بقات تتشوف و دمع ، حطات التليفون فوق الكوافوز و تكمشات تحت الغطا ناعسة تتدور فعينيها ..بقات معاها صفاء حتى حسات بيها نعسات ، و بقات شحال واقفة حدى السرجم د البيت ساهية و حنين فاتحة عين و شادة عين حاضية معاها لاتعيق بيها مزال فايقة ، صفاء عقلها غايب ماعاقتش بيها ، خلات ليها الضو شاعل لاتفيق و خرجات من البيت غادية لبيتها تلاقات مع عبد الهادي خارج من بيتو و قالت ...
_ مزال مانعستيش...
KAMU SEDANG MEMBACA
🍁قيد العراقي 🍁 (طور التنزيل )
Pertualanganقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
