🍁قيد العراقي 🍁 (طور التنزيل )

part33

لالة حورية كانت جالسة فصالونها مفرشة خيراتها و طالقة دوك جوج الزغبات لي عندها تتدهن فيه بزيت الكافيار سرقاتو لمريام هادي عاماين و مزال خازنة عليه تتقطر نقطة  بنقطة ، حيت تتعرف شحال حاجتها تتشريها بالدقة و الفليقة كانت تتسرق ليها كريماتها و تعطي لبناتها و تخبي لراسها و مريام كانت عايقة و تتميك حتى ولات تتشد على بيتها بالساروت ...تما هبطات كي السم مع حورية ...تفكراتها حورية و خسرات ملامحها تتنكر على مراة ولدها...
_ اجي سرحي ليا شعري نتي...
مراة ولدها : اخالتي يهديك الله الزيت كثار من عاماين وهي عندك مابقاتش صالحة ...

حورية : لا صالحة صالحة ، علاش زيت الكافار رخيصة عليا نرميها...

مراة ولدها : الكافيار الكافيار...

خرجات بنتها الصغيرة من البيت واحد الطبوزة و الكرش مدلية على ملامحها الصدمة و عينيها تتشوف فتليفونها...
_ فخباركم شكون تزوج ؟ تصورو شكون...

مراة ولدها : شكون ؟ سعد المجرد ؟ هههههه

الاخت : و معاك بصح انا مصدومة .. ماما و مااما معاك كنهدر ...

حورية ( شافت فيها بسخط ) مم شنوو بغيتي ..

الاخت : فخبارك شكون تزوج...

حورية ( شافت فيها ساخطة ) شكون ؟ بنت عمك ؟

الاخت : و مريام اماما ...

الدم هرب من على وجه حورية اما زوجة الاخ الفضول و الدهشة غلبها ...لقات صوتها قبل من حورية..

_ شكون قالها ليك ..

حورية ( بحقد ) و هادي كدبة ...

الاخت : والله العظيم اماما ...بنت خالتها فردوس ديك الفاشيونيسطا حطاتها فالستوري ..شوف قرا بعينيك و طاغات مريام هذا الكونط ديالها ...اويلي على صدمة اخر واحد توقعتو يتزوج هي مريام ...

طلات حورية و خرجات عينيها فالتليفون تتدور فالكلمات مافهمات والو قندشات تتغلي بوحدها...
_ بمن تزوجات و فوقاش ؟

بفضوول جبدو التليفونات تيشوفو الستوريات ديال فردوس ، هي الوحيدة لي كانت حاطة تصاور الحفلة و الهدايا اما مريام ماحاطة والو صفحتها خاوية ...، كمشات الاخت عينيها تتقرا واحد البوسط فواحد الباج مغربية حاطة صورة مريام قديييمة كانت بالشعر و جلابة قصيرة مبينة السيقان و الطالون كاتبين عليها ..
_  اخر الاخبار مولات القفطان ديال ثلاثين مليون تزوجات برجل من عائلة يهودية  خانزة فلوس اصولها من فاس عرفتوه شكون ؟ شوفو السطوري تأكدو  ...

حورية ( تتغلي بسم ): ها لي صالح لوالديها غي اليهود هوما لي يقبلو عليها...

بقات بنتها  تتقرا فالكومونطيرات وحدة بوحدة...

_ اويلي ياكما تزوجات بولد ****

_ علاش الكذوب مافهمتش ؟ شكون عندكم مع مريام هاد الباج نازلة عليها بالاشاعات لا اساس لهم من الصحة ...السيدة محجبة و نتوما تتحطو تصاورها بالشعر  عريان ماخافتوش من الذنوووب...