جلسة استرخاء جلساتها بينها و بين راسها ، جلسة مراجعة لنفسها وسط عالمها لي تتكون فيه الملكة ، أي حاجة ديالها تتشبه ليها...من أصغر التفاصيل حتى لأكبرها, جالسة فالبيرو ديالها لي كانت منظم تنظيم دقيق بالوان دافية و صافية كي صفاوة عينيها..الورد الاحمر و الابيض مزين مكتبها مع بعض التفاصيل الأنثوية .. منهم مجلات كثيرة و تصاميم و صور الطبيعة و منهم صور شعب ماساي و تفاصيلهم لي استلهمت منها بزاف...! ماكان حتى واحد خدام داك العشية من غيرها جالسة بوحدها فالبيرو تتقرا فواحد الكتاب كتباتو هادي عام و مزال واقف لحد الان..كان أول تجربة ليها بعد ماكانت تتحط بعض الدروس عن التنسيق و فلسفة الالوان فالمواقع الالكترونية و كان عندها متتبعين كثار حتى غبرات على دوك الدروس و بقاو غي رسائل المتتبعات ..، رجعات تتقرا شنو كتبات عايشة معاه تفصيلة بتفصيلة حتى وصلات لفين وقفات و حركات الكلافي تتمنى شغفها يرجع ! خدامة بلا تركيز و بلا اهتمام...غي تتشغل راسها من على داك الغائب ، باغية تبعد و تبعد حيت القرب كثار تيحرقها ...،وقفات يديها عن الكتابة و هزات تليفونها وهي متكية على كرسيها المريح تتقرا تعليقات بعض المتتبعات و رسائلهم الكثار و الابتسامة مزينة شفايفها...عندها عين ذواقة و خبرة طوييلة فمجال التنسيق...لدرجة احبابها و معارفها نهار يوحلو تيلقاو مريام يسولوها على شمن لون يجي مع هذا ! ماشي غي جات و كسبات داك الخبرة...دارسة فلسفة الالوان و عمقها و كل لون و شنو تيجي معاه و تيكملو ...لي يشوف ستايلها و الوانها و تنسيقاتها تيعرفها بنت الضومين و متمكنة منو ,
رجعات حطات داك التليفون بملل تتنهد و تعاود شدات حتى داك البيسي و حنات راسها على البيرو تتفكر ...حتى الخدمة مابقاتش قادرة عليها !شنو ناقصها ؟ علاش ولات هكا...فين شغفها و حبها لهاد المجال ..حاسة براسها فاشلة و ماعندها لا كانة لا اهتمام لا شغف...تتحاول و ماتتقدرش !! هربات منو و من المحيط لي كاين فيه هو و سيرتو و اي حاجة متعلقة بيه و نسات تحيدو من بالها ! ماشي نسات ! ماقدراتش ...لو كان داير ليها سحر ماتكونش بهاد الضعف لي ولات ضعيفة حداه ، مالقات جهد غي البكا و دموع صامتة زهقو من عينيها ..تتبكي على راسها لي مابقاتش فهماتو ! خاطرها هز من جيهتو و فاش تتفكر علاش ؟ ماتتلقاش جواب...تجي تسولها امريام علاش تتبكي ؟ ماعارفاش ! شنو غتقول ..ماشافت منو حتى عيب ! الاحترام و التقدير تيقدرها تيعاملها معاملة حسنة و فاش تيدوي معاها تتحس بيه تيعزها ، ماشي قبيح و قماع ..العكس تماما ! اذن علاش حاسة بقلبها هاز من جيهتو حتى خلاو عينيها يدمعو...شكون غادي يفهمها ؟ كاع البكا لي خزناتو من نهار الحادثة خواتو دابا و شهدو على دوك الدموع غي الوانها و اقلامها و تصاميمها و عالمها لي عطات فيه بسخاوة و عطاها قد سخاوتها ...
دخلات أصيلة تتضرب بداك الطالون فوق الارضية تتشعل هازة صاكها و النظاراتة الشميسية فوق حجابها...مشاركة الحديث مع جويرية حتى قالت بعفوية
_ مريام فبيتها ؟
KAMU SEDANG MEMBACA
🍁قيد العراقي 🍁 (طور التنزيل )
Pertualanganقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
