بارتي:369
وصلات للدار مغيرة و سبحان الله تتبان فيها دغيا ، غمزات لطيفة البنات بعينيها زعما مالها حتى هوما قالو ماعارفينش هدرو غي بالعينين حتى طلعات للبيت تبدل عليها و شداتهم لطيفة تتسول بقلق...
_ واش دوات مع عبد الهادي و تخاصمو ؟
فاتي : لا تلاقات كمال وقيلة و قاليها شي حاجة ماعرفتش ! هادشي لي شكيت فيه مابغيناش نسولوها حتى تبرد .. حيت بان ليا معصبة نيت والله لا نطقات و نتي تتعرفي بنتك كي دايرة. ...
سلوى : وي كانت معصبة بزاف الصراحة...
لطيفة ( قندشات ) و شنو قربو لبنتي داك الشماتة ! و نتوما فين كنتو ..شنو هاد قلة الحياء ! مراة الراجل اش قربو ليها نعلة الله عليه ....
فاتي : و بلا شوهة غيسمعك زهير راه راد البال لمريام و بقى تيشوف...
شدو الموضوع و خلاوه بيناتهم حتى هبطات مريام لابسة سيرفيط فالكري و البلو و شادة شعرها بالقلم شادة فنصها و مخسرة وجهها باين عليها العيا ...
تبسمات لطيفة و طبطبات عليها تتدعمها : دابا تشوفي عويناتو و تنساي وجيعاتو الحبيبة ديالي ..
مريام : ان شاء الله اماما ...
سلوى : ياكما مهلوكة بزاف ؟
مريام ( ماتيعجبهاش تشكي ) شوية الحمد الله ...
لطيفة : الله يخفف عليك....و دابا قولي شنو وقع ليك قبيلة حتى دخلتي معصبة ؟ شنو قاليك داك الحيوان...
جلسات مريام طاوية رجل و رجل طالقاها هازة مخدة و مرجعة راسها اللور بتعب و نفور لداك الذكرى : والو ماعجبنيش علاش تبعني للحمام و صافي ..
لطيفة : عليا انا ؟ علاش فيك هاد القاعدة تتخبي علاش ؟
فاتي : انا بعدا تتفقصني هاد البنت عندك...
تنهدات مريام و غمضات عينيها بقلة صبر : ماوقع والو و ماتجبدوش ليا سيرة داك الحيوان ...
من جوابها عرفوها راه معصبة نيت حيت مامولفينش يسمعوها تتقول شي كلمة ماشي هي هاديك ! عطاوها التيساع و كمل عليها زهير تيدور بجنابها باغي يخرجها مابغاتش ..قلبها تزير واحد التزيرة مابغاتش تفك ، جا الحاج و خوها و مراة خوها تجمعو قصارين اليل تيهدرو و الحاج فرحان تيفرنس ماكرهتش هاد الايام تطوال ، بكثرة ماعزيزة عليه مريام ولات تتجيه الغيرة عليها و شي تصرفات و افكار حمق بيهم لالة لطيفة لي ماعرفات منين تشدو تتدعي معاه بالعقل ! جلسات معاهم صابرة حتى عيات و طلعات لبيتها شادة عليها قرات شوية د القرآن حتى تفاجات شوية مقررة تنسى لي وقع و ماتقولا لحد حتى عبد الهادي ماتجبدش ليه سيرة كمال لا تلاقاتو ولا هدرات معاه مافيها جهد لشي صداع معاه ...
بارتي:370
ربعات فوق الناموسية فاتحة واحد الصندوق شكلو زوين و فخم جامعة فيه ذكرياتها مع عبد الهادي من اول لقاء...جميع الاوراق لي كان تيعلمها فيهم و الكتب لي كتب فيهم هو و القلم لي هداها و طلب الزواج لي عرضو عليها و اختبار الحمل لي خلى عينيها تدمع بالفرحة اي حاجة متعلقة بيه عندها مخشية تما...تبسمات وهي تتقرا داك الحديث النبوي تتدوز يديها على داك الخط بحب ...ليلة وحدة بعدات فيها عليه حسات بالفرق ! ماباغياش البعد وماقادراش عليه و كانت تتستنى يبين حتى هو شي حاجة ؟ و مابينش ؟ تتعرف راسها عاطفية بلا قياس و خاصة فهاد الفترة عليها تتطرد دوك الافكار و تخلي غي الحاجات الزوينة لي جمعاتها بيه...ترخات ملامحها و رتاح قلبها شوية و ناضت جلسات فالبيرو ديالها الصغير لي عندها جابدة القلم لي هداها اول مرة تتكتب بخط النسخ بتركيز و بتمهل و بسخاوة...
_ أراه كل مرة كأول مرة....
YOU ARE READING
🍁قيد العراقي 🍁 (طور التنزيل )
Adventureقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
