جلسات حداها مريام مبتسمة حاطة رجل على رجل ، هزات كويس اتاي و الشعورات مدليين معاها....
_ عويناتك الزوينين حبيبتي ...كيف داير ناصر لباس عليه...
فاتي : لاباس الحمد الله...
لطيفة تتشوف فاتي و ترجع تشوف فمريام تتطلعها و تهبطها و تفليها فلي ..شوفاتها اليوم مبدلين ، وفاش جات قبيلة جاتها مغيرة و فشكل ! وجهها كان مزنك و مغيرة عليها ماشي مريام لي تتجلس معاها و تضحك و تعسلها بكلامها الحلو ، جات نيشان طلعات لبيتها شادة عليها بحجة انها عيانة....و دابا تتشوف فعويناتها كيف تيسهاو و السر طايح على وجهها منورة ، شافتها مريام تتشوف فيها هكاك ، جات لبالها هدرتو فاش قاليها مستني ردك من الحاج الإدريسي اذن غيكون دوا معاه و اكيد حتى هي وصلات ليها الخبار حيت الحاج مايقدرش يخبي عليها هاد الخبر وهي عارفاه كي داير...ارتبكات و قلباتها تبسيمة تتحاول تصرف عادي....
_ الله يعطيك الصحة اماما البنة فيديك ماشي طبيعية حلوة تتسكر....
لطيفة ( تبسمات بذكاء ) زينك ابنتي لي تيسكر ، مشاء الله عليا والدة الزين نقولها و نعاودها سعداتي ببناتي ...
مريام ( باستها تتضحك ) سعداتنا بيك...
فاتي ( هازة فلطيفة حاجبها ) لطيفة مدي ليا الحلوة احبيبتي....
لطيفة : هاكي بصحتك...
قرمات فاتي و معاها حتى لطيفة ماعاودوش هدرو مع مريام وخا لطيفة حاطاها تحت المجهر...، حتى جا الحاج داخل لابس بنطلون دالثوب فالرمادي و تريكو سخون مع قبعة ديال فرانسيس فراسو و العجاز غي ديكور ..لي يشوفو يقول غا شي كاوري و السلام مع الزعورية ديالو و ملامحو ماتقولش مغربي ...، داخل فرحان الفرحة تتشطح بلا سروال فعينيه ، ناشط وراشقة ليه ، غي شاف مريام كثار فرنس و طلقها لحلاوة لسانو...
_ لالة مريامة الزين و التباتة...سبحان لي خلقك ....
مريام ( سلمات عليه و عينيها كيدورو عرفات شنو كيستناها ) بابا مسا الخير...
الحاج ( حاوطها تحت دراعو تيفرنس ) مساء الخيرات ابنت الشرفة...
لطيفة ( دايرة راسها ماعندها علم بوالو ) شنو سر هاد الفرحة فرحنا معاك...
مريام ( رمشات بعينيها تحت دراع الحاج تتسمعو تيقول ) ياك تنقول ليك بناتنا مزهارات و مقامهم عالي ياك تنقولها ليك و نعاودها....
جلس و جلسها معاه ، وهي حانية عينيها تترمش ، بقى تيدور و يعسل فالكلام حتى قالها...
_ جاك ولد عائلة عريقة معروفة في فاس و مكناس و فالشمال و حتى فمراكش ، طالب رضى لالة مريام ...
مريام غي تتسمع و ساكتة معدتها تتلوى وفاتي مكمشة فالحاج عينيها غي شافها تتشوف فيه هكاك نهط فيها دايرين بحال القط مع الفار...
_ ماتبقايش ابنتي تشوفي فالخلق بديك الشوفات ، ربي كرم الانسان و حسن خلقو و خلقو و نتي تتقبحي راسك هكاك..
STAI LEGGENDO
🍁قيد العراقي 🍁 (طور التنزيل )
Avventuraقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
