🍁قيد العراقي 🍁 (طور التنزيل )

part66

خلات حنين مع لطيفة و كي الفراشة طارت عند وئام ، حجابها ماثابتش و لابسة مونطو طويل و بوط و صاك غي من الطرف بلا ماتناسق الالوان ...النور فوجهها و عينيها تيبريو ، دخلات عندها و استقبلاتها وئام فالبيرو ديالها بالأحضان ...
_ نهار كبير هذا لالة مريام الشريفة...

مريام ( تتبسم بفرحة ) كبير بيك احبيبة ديالي ...

وئام ( لاحظات فرحتها ) جلسي جلسي و عاودي ليا عاد نشوفو الاحوال و الاخبار و الجديد هههه عاودتي التيست ؟

مريام : وي عاودتو( ضحكات بعدم تصديق ) طلع بوزيتيف ماتيقتش واش فغي حاملة جيت تنجري لعندك قلبي ماغاديش يتهنى حتى تأكدي ليا وااش كلشي هو هذاك..( تغرغرو عينيها بالدموع ) نتي اكثر وحدة عارفة العذاب النفسي لي عشتو مع هاد الموضوع...

وئام ( تتسمع ليها مبتسمة ) بيان سيغ عارفة و فاهماك ..تيبقى كلشي بيد الله مريام ماتنسايش هادي احبيية....

مريام : الحمد الله على كل حال ....راك عارفة عاد تزوجنا ماكنتش حاطة فبالي موضوع الحمل و محيدة بالي منو حتى حسيت بشي حاجة فيا ماشي هي هاديك خفت نكون تنتوهم...

وئام : وي تبارك الله ماشي بزاف حضرت لخطبتكم هههههه ماعليناش الالة مبروك عليك و على موسيو العراقي ...

مريام ( مازال مامتيقاش ) الله يبارك فيك ...

وئام : قولي فوقاش كانت اخر دورة ..

مريام ( تتبورش من السيرة ) اخر دورة جوبونس كانت 27 جونفي ...

وئام : كانت الغولاسيون سيكسيال بيناتكم يومية ؟ ..

مريام ( تترجع السينتا اللور ) وي تقريبا كل نهار بعد 27 جونفي...

وئام : سييبون اجي معايا ...ياك شربتي الما قبل ماتجي ! من الاحسن تكوني شاربة الما بكثرة ..

مريام ( نعسات على ظهرها و الابتسامة من عينيها ماتحيداتش ) : وي شاربة الما ...

وئام : شوفي نتي هنا ههههه (تتحرك ليها السونار فوق بطنها تشوف فالشاشة مركزة ) فين موسيو العراقي قلتيها ليه ..

مريام ( عينيها مدمعين ) ماشي فالمغرب مزال مافخبارو والو ..

وئام ( بتركيز فالشاشة ) هاهو بان شفتيه ..

مريام ( بشوق) ماشفتش ...

وئام ( مزال مركزة و تتحرك فوق بطنها ) هههه شوفي مزيان هاد الكيس هو هذا ...

مريام ( تبسمات وسط دموعها ) شفتو.. شحال عندي من سومين ؟

وئام : ههههه الاسبوع السابع على الابواب و البيبي جايباه معاك من كينيا و نتي عاد عقتي بيه ...( سكتات بحال الا شافت شي حاجة حتى خلعات مريام معاها و رجعات تبسمات و قالت ) احتمال يكون توأم...غنعاودو نتاكدو فالاسبوع العاشر ان شاء الله ...