لمعو عيون مريام وهي تتضحك ضماتها لعندها تتبارك ليها و تدعي معاها ماخلات ماقالت حتى شحفات و عيات و خلاتها ترتاح و تمات هابطة التحت معلية شوية من القفطان و نازلة فالدروج ناسية الشال ماحطاتو فشعرها و الحاج و خوالها و ولد خالاتها خارجين من الصالة لوسط الرياض و ماقشعها غي عبد الهادي اول ما هز عينيه من ورى واحد العمود حتى من ملامحو تجمدات تقول هزيتي واحد و حطيتي اخور كان تيرد على الحاج حتى وقف كلامو فالنص ، اما هي ماعاقت براسها حتى هبطات شي ربعة د الدرجات و غي سمعات حس الرجال خارجين تفتفاات على راسها و بلا ماتشوف حداها قلبات الدورة طالعة بالزربة لكن قشعها واحد ولد خالتها طالعة و نطق بعفوية تيضحك...
_ و اجي نسلمو عليك عاد طلعي الهرابة....ماجاباتوش و مادارتش شافت فيه ، نيشان للبيت رمات الشال على شعرها و سترات رقبتها و الفلقة د صدرها و صبرات شوية تتطل عليهم غي من الفوق بالتخبية و قلبها تيضرب من هاد النسية ، تتقول مع راسها واش شافوها ولا ماشافوهاش ! حتى لو كانو ماشافوش فاش دوى ولد خالتها غيكونو قشعوها طالعة ..و حتى هو منهم ! حطات يديها الباردة على وجهها تتبرد فحنوكها لي تزنكو و سخنوو ...تقول غي دارتها بلعاني عاد كان كيوصيها ! و بلا مايوصيها هو تتحاول ماتوقعش فهاد الموقف و الشال ديما على يديها فاش تتبغي تخرج تتلبسو ...شافتها لالة حياة واقفة هكاك و و تعجبات ...
_ لالة مريامة ياك شي باش ماكاين ...مريام ( بابتسامة مرتبكة ) كل الخير...عفاك طلبي شي حد يطلع الماء لالة لا تحتاجو و ماتلقاش حداها...
حياة : وخا انا نطلعهم ليها...سيري تكلمي ليهم تيساينوك ....
مريام : وخا شكرا احبيبة ...لالة أصيلة و بناتها غيمشيو ولا ؟ ماقالوش ؟
حياة : يمكن غيباتو وصاتني لالة لطيفة على البيت الكبير على حساب لالة أصيلة ..
مريام : و عبد الهادي ؟
حياة ( تبسمات )يمكن حتى هو غيبات هادشي لي فهمت من لالة لطيفة ...
مريام : شكرا لالة حياة نخليك نهبط نشوف شنو ناقصهم ...
تبسمات معاها و هبطات كدور فعينيها لاتلاقا بيه ، زادت صاوبات حجابها و مشات للصالة فين كاينين النسا و جلسات معاهم شوية بين الاحاديث النسائية و الهدرة عليها باغين يشدو فيها ثاني ساعة مافتحات ليهم باب شادة الركنة و ساكتة تتبسم مرة مرة معاهم ... تنهدت و طلعات رجليها لي عياو اليوم ، طلقات ثاني ديك الفونتاي و تلهات مع تليفونها مرة تتشوف فيه مرة تتسهى مرة تتبغي تلقط شي كلمة عليه من جورية...كانت جالسة ميلة رجلييها للحنب ساهية فثوب قفطانها حتى تتسمع سيرتو من فم لطيفة تتقول...
_ لا حتى سي عبد الهادي غيبات اليوم هنا..
فاتي : شكون قالها ؟لطيفة : الحاج قالها ليا دابا ..
قربات لطيفة جلسات جنب مريام و همسات ليها ...: مادواش معاك ولا قاليك باغي بيت معاك ؟ شنو نديرو ليه بيت بوحدو ...
مريام ( تحرجات ) ماقال والو ماحسابليش غيبات و ماقاليا والو ...
لطيفة ( بتفكير ) و شنو ! نتي تعرفي ابنتي راه النص سايق الخبار راكي حاملة و مابقى لا عرس لا والو ..
STAI LEGGENDO
🍁قيد العراقي 🍁 (طور التنزيل )
Avventuraقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...