غطاها من العيون بالوقفة ديالو حداها ، هز الحبر و جبد ورقة بيضة اخرى يد فجيبو و يد اخرى تيكتب بها فالورقة قدامها و يشرح ليها بهدوء ، خاتم مزين صبعو يديه كتجبد العين بسمرتها و نقاوتها، خدى القلم بشكل عمودي و رسم خط و قال..
_ القلم بهذا الشكل عمودي و هذا افقي...القلم لاول مرة يكون في موضع مائل وسط الزاوية بين الخط العمودي و الافقي...
تبعات يديه وهوما تيرسمو فالورقة ديالها متبعة معاه تتشوفو فين تينعت ليها و الزاوية لي تيهدر عليها ...مد ليها القلم و نطق ..
_ وضعي القلم فالزاوية بشكل مائل...
هزات صبيعاتها بلا ماتهز فيه عينيها ، خدات القلم من عندو و الرغبة انها تعلم كانت اقوى من اي وقت ماترضاش تبان مكلخة فهاد اللحضة حداه ، تبعات المراحل ديالو بدقة و كي دار هو دارت هي وقبل ماتهز القلم نطق بجدية...
_ ثم نزول من اليمين الى الاسفل ( تبعات كلامو بتركيز لدرجة تزنكات و تصهدتت وهو متبع معاها بدقة و تركيز ) صحيح ، ( مد ليها قلم أحمر ) حاولي مرة اخرى ...
خدات من عندو القلم و تبعات كلامو ، القلم مايل و البداية من الزاوية القائمة هاد القاعدة حفظاتها ، حتى رسمات النقطة و قاليها عاوديها و عاوداتها حتى تعلمات ليها ، تما تفكرات دوك المحاولات ديالها لي كانت تتحاول قبل و صيفطاتهم لفائزة بغات تغراق بلاصتها فديك اللحضة ، هي باش تكتب غي نقطة و شحال ديال القياسات و الزوايا باش تجي هي بين ليلة و نهار خربقات جوج خربيقات قالت ها دارت محاولة ، ضربات ليه تمارة القراية ديالو و البحوث ديالو فالحيط ..السيدة دغيا حاولات و باغية تعلم ...، رمات دوك الأفكار من راسها ماشي وقتهم دابا ،
لاحظات سمك القلم الاسود كبير و القلم الاحمر صغير... حتى هو قرى افكارها وقال ..
_ كتفضلي الأحمر ولا الأسود ؟
مريام ( هزات عينيها فيه لأول مرة و العمى يقرا الحشمة مغرقة فعينيها ) الأسود...
تحط عينيه صدفة على رموشها و رجع قلبهم باتزان للقلم فيديها ، عطاها الحبر ديالو صنعو هو عاد جديد من فحم عظام الغزال ..شافت فيه و مدات يديها خداتو من عندو حساب ليها قلم و عطاه ليها تكتب بيه عادي ماحسابش ليها هذاك ديالو مزال حتى ماخرج للسوق ، سرقات شوفات مزروبة فالقلم فيديها باعجاب حتى سمعاتو قال قبل مايتحرك من حداها مخلي الهواء بارد يبرد حنيكاتها لي ولاو بحال الجمرة ...
_ إن جودت قلمك ، جودّت خطك ، وان أهملت قلمك أهملت خطك ...
رجل وصفو الغالب هو صامت.. لكن هالة السكون ماكدورش بيه نهائيا ساكت و كلامو قليل لكن تيخلي فاي بلاصة كاين فيها الفوضى و الحماس و الاعجاب ...ساكت لكن عينيه و حركاتو تيهدرو كثار من لسانو ، ..خرج خلى السكااات و الحماس طفى شوية عكس فاش كان حاضر ، مشى و غابت معاه هيبتو و ظل سي العمراني بالقريعة ديالو صلع و مطبز ومع ذلك محبوب و مبشور ، كمل العمل ديالو تيراقب العمل حتى وقف على مريام و نطق ...
_ هنيئا لك ، شفتي كلشي ساهل خصك غي تمعني و تذوقي ...حسيتي بالنكهة دابا ...
VOUS LISEZ
🍁قيد العراقي 🍁 (طور التنزيل )
Aventureقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
