سيرة عروستها ولات على لسانها قدام الحباب و البراني ماتتخلي ماتقول و تعاير و تسب شي تيسايرها و شي تيبقى يشوف فهاد المخلوقة لي تتعاير مراة ولدها و تخرج السم لي تحت اللسان ...! و هي لي يجبد ليها عروستها تتخوي قلبها بحال شي كاميييو تتخوي الرملة غيتتفتح فمها ماتتشدو...
لالة حورية : علاش هاديك مراة بعدا تكون مراة ؟ بزاف عليها تكون مراة ..ولدي بزاف عليها ماعرفت اش من خير دايرة فحياتها حتى جازاها ربي بولدي...اما ولدي مسكين غي تزرف تزرف ماعندو زهار مع النسا...
نطقات وحدة من جارتها : اوى اختي حورية كانت عندكم عروسة زينة و باهية و ماتفاهم معاها قلتي حقا ما حقا ماختارهاش على ذوقك و نهار تزوج على ذوقك ماعجباتك نتي كي خصك هاد العروسة...
حورية ( ضريات على صدرها تتنوح ) و قلبي مشوي قلبي مشوي على المعفونة بنت للمعفونة ماحسابليش اختي معفونة هكاك حالتها تتطلع القلب و عروبية و ماعندها لاذوق لا والو ، تتحشم بولدي فين مامشى دابا هاهو مهاجر بيت النعاس تينعس فالصالون ماتقدرش يشارك معاها مخدة وحدة قالك شاف فيها القمل تصدم حتى قرب يتشلل ليه اللسان على قلة الما على قلة الشمبوان وصلنا للقمل كاااع لا لا هادي اختي مابقات ديال العشرة....كلشي الا العفن ...
شهقو الجارات ديالها بصدمة اويلي على كمال اخر ايامو مزوج بوحدة مقملة هادي ماكانت على البال و لا فالحساب..., لجلسة كاملة كانت بسيرة خولة ماخلاو ماقالو فيها و مراة ولدها الاخر جالسة بعيد غي تتسمع و ترمش و بقات فيها خولة على هاد الهدرة لي سمعات ...تنهدات و مشات بحالها للكوزينة تقضي شغلها ...! اما خولة المعنية بالامر مشات غضبانة عند مها للعروبية ساترة شعرها بفولار حياتي معبسة تتكب اتاي و السفج مدور فوق الطبلة و صوت الفرارح و الدجاج برا حدى البويبة و مها محزمة و مشمرة مع خالتها و مرآة عمها تيهدرو على كمال ...
_ لا اخوييتي لا الغلط ماشي فبنتي ..كاع بناتي هزو من ليلتهم الغلط فيه هو سمعو مني شنو كنقول...
الخالة ( شافت فخولة باهتمام ) كيخوي فيك كل ليلة ياك ؟
خولة تتعض فالسفنجة تتدور فعبنيها واحد القاع عندها قد البرميل و وجهها منفخ و صافي ...
_ و نتي عارفة اخالتي غنبقى نعاود فالهدرة ..
الخالة : دابا غي عطيني عقلك ، السيد ماعندو حتى مشكل فداكشي راه فاهماني ...
خولة بقات تتشوف بتردد و عينيها ماتابتينش خايفة تهدر و تزبلها و فالنفس خايفة تسكت و تمشي فيها هي... شافت فمها و فمراة عمها و خالتها و قالت...
_ نقول امي و ماتقولوها لحد هالعار امي...
الام ( بقلق ) ها لي قلنا شنو كاين نتي دوي خلاص...
خولة ( بعبوس ) الراجل هادي ست شهور مانعس معايا وقيلة مريض امي...
الخالة ( خرجات عينيها ) كيفاش ست شهور باش مريض ؟ ياكما داكشي لي فبالي ...
خولة ( حطات أتاي و خوات قلبها و لي ليها ليها ) لا كان عادي اخالتي., حتى لواحد المراة مابقاش بغى يكمل شي حاجة ضراتو فداكشي ديالو و قالي انا السبب حيت غليضة و مافهمت والو ..ساعة مابقاش قربلي حتى جاتني الدم و صفيت و رجع و ..و...( بقات تافتف ) حلفو ماتقولوهاش...
YOU ARE READING
🍁قيد العراقي 🍁 (طور التنزيل )
Adventureقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
