سلوى : ههههه الله يحفظو لها باينة تتبغيه و حتى هو بالو معاها....
لطيفة ( تبسمات بهدوء ) وخا عماتك و لالة نجمة يهدرو و يعاودو راه مريام مابغاتو حتى عرفات علاش ! الله يهنيهم هادشي لي بغيت...هو راجل باين مزيان و داخل سوق راسو و عندو الخاطر و حتى مريام ديالي حنينة و ماعندهاش مع المشاكل و حريق الراس تلاقاو نيت....الله يبعد عليهم ولاد الحرام....
سلوى: امين...انا غنطلع نشوف سليمان واش فاق...
لطيفة : وخا ابنتي شوفي ولدك ...
طلعات سلوى عند ولدها لقاتو فايق هزاتو تتبوس فيه بدلات ليه و شدات ليه يديه غادي على رجيلاتو تيفرنس و يعيط على مريام...
_ م..مييييمي...ااتووو...
سلوى ( ضحكات ) ههههه خالتو ميمي احبيبي ..فين خالتو ميمي فين...
شير ليها على بيت مريام بداك الصبع المطبز تيجرها يمشيو لعندها...كانت مريام جالسة فبيتها تتطلع و تهبط فتليفونها ..حاطة يديها تحت حنكها موسدة المخدة تتفرح فالتليفون ولى عندها مطرطق بصور البيبي و تفاصيل الاطفال تتبقى تشوف فدوك اليديدات المطبزين و الشفايف الصغيورين الحمرين و الخدود و مراحل نمو الجنين و فيديوات عن تطورات الجنين خلال اسابيع الحمل ...سهات فداك العالم و على شفايفها تبسيمة حنينة حتى سمعات صوت سليمان برا ضحكات و هزات عينيها فالباب فاش طل عليها بديك الحلاوة ديالو تيخربق فالهدرة ...
_ ميي ميي اتوو لوولا...
ناضت لعندو تتضحك فاتحة ليه يديها حتى تخشى فيها تيضحك ...باستو فراسو بحب ...
_ القلب ديال ميمي نتايا ...لاموغ دو مافي .. عطيني بيزو حبيبي عطيني بيزو ديالي هنايا بحال هكايا ...بيزو كبييرة قد هكاا...
باسها تيضحك و يخبرز فالهدرة و سلوى و مريام تيضحكو عليه .. سهات فيه مريام وهي ضاحكة ...
_ الله يحفظو ليك حنيين و زوييين بزاااف الحبيب ديال خالتو ...
سلوى : امين ياربي....وي حنين تبارك الله و مامعدبنيش بزاف ...الله يفرحك بديالك حتى نتي...
مريام ( باستو فيديه ) امين احبيبتي ...
طلعات لطيفة لعندهم قالت ليهم ينزلو حيت الحاج و عبد الهادي جاو... تبسمات سلوى وهي تتشوف فمريام لي حنات راسها لسليمان مبتسمة باستو بوسة ديال الغدايد و ناضت خلاتو تعصب و بغى يبكي....جراتو عندها سلوى تتضحك ...
_ حشومة عليك علاش بكيتيه....
مريام ( بقى فيها ) سمح ليا احبيبي ( شافت فسلوى ) طالع رطيطب بحالك ماشابهش لباباه فهادي...
سلوى : هههه بصحتو .....
ضحكات و تمو خارجين بجوج و مريام تتبسم مع سليمان باغية تراضيه تتعطيه يديها تشد فيه ماتيبغيش معصب و مغوبش فيها حتى ضحكها جاها غي جلال محطوط فداك التغوبيشة....المورال طلع ليها من الدقيقة لي سمعات فيها عبد الهادي جا من ديك الدقيقة وهي تتبسم بلا حتى سبب...
غي شافها الحاج درعها تحت جناحو فرحان و جلس مجلسها حداه لاصق فيها تقول دايرها بلعاني اما هي عينيها تيهربو لعند عبد الهادي بلا ماتحس و تترجع تحنيهم فاش تيحصلها...عاقت بيها لطيفة لي غمزات للحاج ينوض يتبعها و عاد فهم راسو و ناض لعندها خارجين مخليهم بوحدهم الراس فالراس ..حي هي زعمات و ناضت جلسات حداه حاطة رجل فوق رجل تتبسم و زعماتها كثار الابتسامة ديالو الدافية فاش شد يديها مشبكهم فوق رجليه تيشوف فصبيعات يديها باعجاب
_أنامل السنابل ...
YOU ARE READING
🍁قيد العراقي 🍁 (طور التنزيل )
Adventureقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
