تبسمات ليها صفاء بزز منها و ناضت جويرية حتى هي و تبعاتها جليلة بقات صفاء بوحدها تتشوف فواحد النقطة ماراضياش تعتارف انها غلطات فاش قالت ديك الهدرة على مريام جزء من ضميرها تيأنبها و جزء مييت ..بقات شحال جالسة بشموخ تتفكر و التعفار على وجهها عشرة لعشرة و الثقة و الغرور و سبحان الله كاع ديك الهالة ديال العجرفة تبخرات فاش شافت عاصم داخل و عينيها تلونو بالخوف و النفور وخا تقصح راسها معاه تتخاف منو وخا تعيى تنكر..تمات طالعة بحالها و دازت من حداه تيطلع و يهبط فيها باستفزاز...ابتسم ليها و ابتسمت ليه بسخرية...
_ تصبح على خير ..عاصم : تلاقي الخير ...
طلعات هازة نيفها عليه ..غي غبرات من حداه زربات تتجري للبيت شادة عليها من الداخل تتزبل فيه و تسب و تدعي الله يعطيه المووت ...!
دازت يوماين عبد الهادي و مريام حيدات من بالها شنو وقع اخر مرة فاش دوات مع عبد الهادي و كان هادي كي تتعرفو ديما ...كانت هي و حنين فبيتها تيهدرو معاه مخشيين تحت الفراش ...و حنين حاضنة على تليفون مريام و صورة مريام فالكاميرا مرة مرة تتبان ليه غي هي لي تتدوي و تعاود ليه كلشي وهو ساكت تيسمع و عينيه مع مريام لي تتشوف فيه و تتسمع و على شفايفها ابتسامة ...
حنين : بابا كتسمعني ...عبد الهادي ( عينيه على مريام ) كنسمعك ابابا ...
حنين : قلت ليك انا طيبت كيكة علماتها ليا ماما مريام و ماصدقاتش فالاول حتى عاودتها و صدقات ...
عبد الهادي ( اول مرة يسمعها تتعيط ليها ماما ماعلقش ) و الصلاة شنو كديري معاها ؟
حنين ( ببراءة ) كنصلي والله...
شافت مريام كي عينيه معسلين بالنعاس عجبوها هكاك ووبلا ماتحس دارت سكرين مافرحات بيه حتى فضحاتها حنين فاش قالت تتبسم ..
_ صوراتك ابابا ...خرجات مريام عينيها مبعدة على الكاميرا تتسكتها بعينيها ساعة لي عطى الله عطاه و حنين دارت شغلها...بقات قارمة تتستنى ردو و ماردش عليها ! و حنين تتهدر معاه و تبارك الله تتهدر و مطلوقة معاه عكس كيف كانت متوقعة هي تتخبر عليه و عبد الهادي اصلا بالو مامعاهاش..بالو مع مولات البينوار الحريري فالابيض و الدونتيل فالصدر تيبان تيزهق على لحمها و شعرها تيتحرك اما وجهها ماعاودات بيناتو ليه .. تنهد و قال بعد صمت طويل ..
_ مريم ...شافت مريام فالكاميرا بابتسامة مزينة بحياء ...
_ هانا ...كان غيهدر و الهدرة وقفات ليه فطرف اللسان لي حكماتو رزانتو حدى حنين ...بقات ساكتة كيف بقى ساكت حتى هو و النظرات بيناتهم خدامة و الشوق فعينيها ليه باين اما هو ماتيبان عليه والو...حتى قال ...
_ يوم الجمعة ان شاء الله غنكون فمكناس ...مريام ( تبسمات و الفرحة زينات عينيها ) الجمعة بعد غذا ؟
عبد الهادي : ان شاء الله...
YOU ARE READING
🍁قيد العراقي 🍁 (طور التنزيل )
Adventureقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...