صيفطات ليه حنين شلا تصاور مرة مريام مرة تصور ليه كمارتها طالعة تتموت على التصاور تليفونها عامر ها صورة الزليج و ها الققاطن و ها القطوط و الكلاب و الورد لي جات فيه عينيها تتلقطو بكاميرة تليفونها ...صيفطات لي صيفطات و جمعات تليفونها عندها تتشوف بدوك العوينات مرزنة و متبتة مرة مرة تتزير فاش تتشوف العين عليها تتحنيهم حشمانة و تخبى من ورا كتاف جويرية ...! دازت قصارة و شمن قصارة ماخلاو امثال و شطيح و غنى و الماكلة خيرات ربي شايطة...نطقات واحد مراة خالها بالتعواج و التمياق ...
_ فين راجل مريام ؟ مابانش !
لطيفة ( تتبسم ليها بزز )مع الحاج...
_ و علاش ماجاش ! الحاج طل علينا و سلم و زاد و وهو ماعبر حد ؟
لطيفة : فين غيجي انعيمة ؟ يجي يشوف النسا تيشطحو ؟
نعيمة : ماقلناش يشوفهم تيشطحو ! يدير كي دار جلال بعدا ! جا لعند مراتو و سلم علينا و سول على حوالنا و مشى شنو وقع ليه ؟ والو ؟ شنو نقص منو ؟ والو .. بالعكس عزاز علينا و انا من ديما عزيز عليا سبحان الله تيكبر بمراتو و بعائلتها و باين عليه تيبغيها بالزايد كاع ... راجل مريام حتى كمارتو عمرني شفتها و لايني خبارو وصلات ليا قالو معفر بلا قياس و غي مخنزر ...
لطيفة ( عوجات فمها بعدم رضى ) الله يهديك انعيمة ماشي بلاصة هاد الكلام حشومة مو و خوتو يسمعو كلامك مايعجبهمش هاد المقارنة و حتى مريام راه ماتبغيش عليه هاد الهدرة ! بحالو بحال جلال حتى هو مأدب و مصواب دابا تعرفي عليه و تغيري رأيك ..
نعيمة ( تتطلع و تهبط فحنين ) عندو عزبة قد هادي تبارك الله كيف غيكون ؟
لطيفة : اوى تبارك لله تبارك الله...
خلاتها لطيفة تتبركم بوحدها و ناضت تتنفخ و تسوط ماعجبهاش الحال شنو سمعات عليه جاتها النفس عليه، ناضت تتجرجر فجلايلها نيشان عند مريام هدرات ليها فوذنيها من الصداع. ..
_ باركة عليك الحبيبة ديالي ، جلسي ترتاحي راك حاملة جلسي و قراي القرآن فنفسك لاتهزي شي عين بنادم غيطرطق الله يستر ..
مريام ( باستغراب ) مع من تناقشتي ثاني !
لطيفة ( بانزعاج ) مع حد ..
مريام : مع مراة خالي باينة ؟ شنو قالت هاد المرة ..
لطيفة : شنو غتقول هاديك ؟ متبعاني انا و ياكم بالصغيرة و الكبيرة الله يستر من عينيها كون ماجات مراة خويا الغالي كون وريتها بلاصتها ...
مريام ( بعدم اهتمام ) ماديريش فبالك انا ماتنديش عليها...
لطيفة : و عليها تنقول ليك جلسي بلاصتك باركة عليك من الشطيح راك عيتي جلسي الله يرضى عليك و تشوفيها كي تتشوف فيك باغية تسرطك بعينيها و هدرة جوج تجبد عبد الهادي و تقول شي هدرة غي ديال الشياطين...
YOU ARE READING
🍁قيد العراقي 🍁 (طور التنزيل )
Adventureقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
