🍁قيد العراقي 🍁 (طور التنزيل )

part60

عبد الهادي ( بلل شفايفو و عينيه ابتسمو ) ماقلت والو من هاد الكلام نتي لي حكمتي  على راسك و استنتاجك غلط....

مريام ( ابتسمت بلا ماتحس فاش حسااتو بنبرتو تبدلات  ) يمكن ، و تنعاود نكرر الطلب ديالي باغية وقت مع حنين قبل العرس ...

عبد الهادي ( بعد تفكير ) كما بغيتي ,  اذا وقعات معاكم اي حاجة علميني ...

مريام : وخا ..( بتردد وصوت انثوي خافت ) مسافر دابا ؟

عبد الهادي : غدا ان شاء الله ...

مريام : ...الله يوصلك على خير...

عبد الهادي : اميين...

مزال نفس التأثير تيأثر عليها كلامو و صوتو ..قلبها تيضرب و وجهها تتصهد و تزنك وخا مايقول والو لا غزل ولا كليمات حلوين تتمناه يبقى غي يدويو يناقش معاها ... قطعات معاه الاتصال و بقات تتشوف فوجهها فالمراية مبتسمة  ، طلقات شعرها لي واصل ليها لخصرها تتفكر تقطعو ولا تبدل لاكوب ..بدات تتمشطو و تمعن فيه حدى المراية و و تصاوب وجهها و خاصة رموشها كانو تيقولو ليها رموشك طوال شنو كديري ليهم ؟ واش رموشك هاذو طبيعين ولا مركباهم زغبة بزغبة ؟ لكن عمرها عجبوها لهاد الدرجة حتى لديك اليلة معاه فالفراش ،  رشقات ليها على راسها ديك العشية و  لبسات عليها سيرفيط فالنواغ قصيصر مع طويلة و لاطاي عندها تيجي معاها المقزب و القصير  ...هبطات لعندهم و جلسات مع الحاج تيتفرجو بواحد البرنامج بجوج بيهم تيهدرو و يضحكو و لطيفة حاطة ليهم كيكة و المالح و العصير ...حتى نطق الحاج...

_ فوقاش غيسافر عبد الهادي ابنتي ؟

مريام : قاليا غدا ان شاء الله ...

لطيفة : الله يوصلو على خير ياربي ...

مريام : امين ..
ناضت لطيفة للكوزينة وهي تسمع صوني ديال تليفون مريام نادات عليها من الكوزينة...
_ مريام تليفونك تيصوني ابنتي ..

مريام : وخا انا ماجية...

طلعات لبيتها بالزربة باش تلحقو لقاتو عبد الهادي ، رداات عليه بالزربة تتنهح  قبل مايقطع..

_ الو...

عبد الهادي : كنت كتجري ؟ 

مريام : هههه  لا وليت تنعيى فالدروج ...

بقات شحال تتسمع صوت الطموبيلات و صوتو هو تيهدر مع شي حد عاد رجع قال ...

_  نت فالدار ؟

مريام : وي فالدار ...

عبد الهادي ( متبع مابدا يمليه عليه قلبو ) تبغي تخرجي معانا اليلة ؟..

مريام ( بدهشة بحال كانت فاقدة الامل تلقاه قبل مايسافر  ) نتا و من ...

عبد الهادي ( شاف فحنين جالسة اللور فرحانة  ) حنين ...