النساء عمرو المجلس و الشعورات و القفاطن و الملحون ..و حنين تتقلب بعينيها على مريام اما جليلة تتبسم مع كلشي و تتحاور مع لي شافت عينيها عكس صفاء كانت مغرورة شوية و كلامها قليل من ديما هكا ... تجمعو العراقييين مع الادريسيين و العلويين و عمار الرياض بالنخوة و الزين ...
لالة حياة طلعات لبيت مريام دقات و دخلات لعندها تتعلمها ..
_ مريام لالة أصيلة جات هبطي سلمي عليهم ..
مريام ( قادات الحلقات ديالها فالمراية و فاتي تتصاوب ليها شعرها ) وخا انا هابطة احبيبة...
حياة : جيتي كتحمقي الله يحجبك من العين..
مريام ( تبسمات ) عويناتك الالة حياة...
رشات مريام ريحتها و شعرها كي المواج طوييل ورى ظهرها لابسة بقفطان بفصالة مخزانية و فصالة و شمن فصالة و الثوب بيض كي الجوهر الحر ...الثوب من يديها تيخرج بهمة و شنة و تتحافظ على خصوصية القفطان المغربي ماكاين غي الله يعطيك صحيحتك ، ماعمرك عشقتي البلدي تعشقيه عند مريام لي معروفة بالعائلة غي بالجديد و الفخامة تتخرج من يديها... كانت باينة عليها عروسة وخا مادايرة لا حنة لا تاج...غي الشعر لي فايح قرنفل و خيط الريح من الدق الأصيل مستف فجبهتها و حجر الملوك فالعقد لي جابو ليها عبد الهادي كمل على الطلة الملكية ديالها...بلاشعور حسات براسها بغات تزين و تبرزن زينها و تفرح براسها ... قشعات فاتي العقد فرقبتها من السمية كي مكتوبة عرفاتها هدية من عبد الهادي حيت هو لي تيعيط ليها مريم عوض مريام....
_ واش حجر زفير هذاك ؟
مريام : وي هو ..جابو ليا عبد الهادي ...
فاتي : تيحمق سبحان الله فيه فخامة الملوك ...تنا شحال هادي كنت بغيتو غي صغييور فواحد الخاتم صغييور قد هكا حتى سمعت بخمسة د المليون غي الحجر ماشي الخاتم كلو رجعت باللور ..بصحتك احبيبة جا معاك تيحمق ..
مريام ( رمات شعرها ورى ظهرها وهي مبتسمة تتقاد راسها ) الله يعطيك الصحة ..صافي نهبطو ماباغياش نتعطل على لالة أصيلة...
فاتي : صافي وخا... سبقيني نتي...
سبقاتها مريام خارجة هازة قفطانها و الخلخال فالرجل و هبطات مبتسمة بعوينات مكحلين و ظلال العيون و الشعر مموج تيلعب ليها تحت الحزام ...شافتها جداتها ام لالة لطيفة ضحكات وو قالت باللهجة الفاسية ديالها وهي مقوسة تتهز فراسها و لسانها ثقيل ...
_ اتبارك الله على البلارة ، مراة العراقي حرير فالطباقي ...
مريام ( ضحكات ) الله يبارك فلسانك الحلو الالة ...
الجدة ( علات صوتها ) ماسمعتشاي اش قلتي ...
مريام : والو والو ... اجي تجلسي رتاحي بركة عليك من الوقوف بزاف ..
جراتها معاها تتعجز و دخلات عليهم هازة عينيها فضيافها...مشات تتبسم و بدات من أصيلة لي ناضت واقفة مبتسمة برقي ...
_ لالة أصيلة مرحبا بيك عندنا .. فرحت حيت جيتو...
YOU ARE READING
🍁قيد العراقي 🍁 (طور التنزيل )
Adventureقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
