التجهيزات خدامة على قدم و ساق في رياض الادريسي رياض العائلة عريق و قديم و كل ركن فيه تيهدر على قصة جدود عائلة الادرييسي...لي شافو تيطيح فعشق تفاصيلو البلدية و العريقة فيه لمسات و تاويل ديال النساء ملحووظ ...فخم و واسع و كبييير بالخصة بالبلدية و الورد مزروع، فيه فين تعلمو البنات للملحون و سمعو قصص و حكايا الجدود , مكانتو فقلبهم كبيرة و وقت تيبغيو يتجمعو تيتجمعو فيه ...و ماكاين ماحسن بحال هاد التجمع لي دايرين ! ها فلان الادريسي ولد فلان العلوي هذا مخالط مع هذا ها الفاسي و المكناسي ...ولد عم فلان و مراة فلان ...عائلة مريام مخلطة مابين الادريسي و العلوي ! كانت مريام فالبيت هازة سليمان تيبكي و سلوى تتصلي...كانت لابسة غوب كلاسيك فالازرق السماوي و حجاب بلفة زوينة و سندال عالي مبين الصبيعات مزينة عينيها بكحل عربي كي الفحم و مجبدة عويناتها و ملونة شفايفها بلون زهري.. تتهز فسليمان غادية جاية مطولة بالها معاه بالخاطر ..
_ مابقيتيش تسكت عندي ياك ! بغيتي مامي دابا نسيتي ميمي ديالك...
دخلات عندها لطيفة لي ماجلساتش نهار كلو مجهزة و مقادة الحالة ...
_ بنتي مريام راه الناس قراب يوصلو هبطي جلسي مع حبابك باش تستقبلي الناس ، نتي تتعرفيهم انا مكنعرف حتى واحد فيهم ....
تنهدات مريام بصووت مسموع ، كانت تتلف مع سليمان مخبية توترها و الخلعة ديالها بحال عمرها تخطبات و عمرها عاشت هاد الموقف قبل....حسات بيها لطيفة و حيدات ليها سليمان من يديها بلطف...
_ سيري الكبدة ديالي رتاحي كلشي غيدوز مزيان ...غي ماتعييش راسك و رسمي ديك التبسيمة الزينة ديالك ..الله يحجبك و يحفظك ...يلاه سيري...
تبسمات ليها مريام بهدوء ، و هبطات التحت عند العائلة فين مجموعة ...من الصغير الكبير داك الاتيكيت و التربية الثقيلة راضعينها من بزولة مهم ، و خاصة عائلة باباها الحاج موسى... معروفين مبليين بالاتيكيت و كلشي بالقياس و الزين غي مشتت اغلبهم زعرااات من غير جوح ولا ثلاثة لي خرجو ملامحهم كحلة كي مريام ...! جلسات حدى عمتها شافتها تبسمات بفرحة...
_ الزين يالزين ، جيتي تحمقي احبيبتي ..
مريام : ميغسي عمييتو ، عويناتك الزوينين....
جات الجدة نجمة واحد لالة و مالي و قالت بصوت ثقييل ...
_ علاش جالسة مع الناس امريام ؟ نتي العروسة ماتبانيش حتى يجلسو الناس ! التقاليد هي التقاليد العروس ماتتطل حتى يجيو عائلة العريس ...
ضحكات مريام دايرة ليها خاطرها...
_ وخا الالة مايكون غي خاطرك ...رتاحي نتي...
جلسات لالة نجمة تترتاح حاضية مع مريام حتى مشات ...و فنفس الوقيتة دخلات للصالة الكبيرة الخدامة تتعلمهم ...
_ عائلة العريس وصلات....
كلشي جمع راسو و تقد و لي كان مشغول حيد من يديه و جهز راسو ...معلوم علاش عائلة العراقي خافية من بالهم ! سمعو بيها و عرفوها اش ساوية و ماشي الادريسي و العلويين لي يبانو ناقصين حداهم....شحال زوجو من ولادهم و من بناتهم و غي العائلة المخيرة لكن بحال سمعة العراقي و الغنى ديالهم وسيرتهم الثقيلة ماعمر شي بنت من العائلة ماتزوجات ليها....! الحاج و خوه وولالة لطيفة و لالة نجمة كانو فالاستقبال ...و عيون الحضور مترقبة شكون داخل...كان كبير عائلة العراقي فالمقدمة مع أب عبد الهادي وعبد الهادي وراهم غي من الوقفة و الشوفة باين العز و الفخامة و الكاريزما وخا كبرو فالعمر الكاريزما مزال حية و ظاهرة تقول غادية ليهم مع دمهم ...وغي تشوف عبد الهادي تعرف هذاك واحد منهم و زايد عليهم نغزة من الشوفة و التكلظيمة و الهيبة تتقطر منو نقطة بنقطة....بدا الاستقبال و التعارف بين الرجال تيسلمو على بعضهم ...الحاج موسى عطاه ربي واحد الرزانة ماعرف منين طاحت عليه ، و لسانو ولى فصيح ياسبحان الله ...
_ زارتنا البركة و الخير فهاد اليلة المباركة ...
YOU ARE READING
🍁قيد العراقي 🍁 (طور التنزيل )
Adventureقال لي من أنت ..؟ فقلت لا يغرنك جرئتي في الكتابة .. فتلك التي تمسك بقلمها .✍...لتدون لك كل هذا الحب ليست انا ...!! انا إمراة خجولة في الحب . ...تختبئ خلف ستار الكلمات ...تحمر خجلا من نظرة ...فما بالك من كتابة الغزل والمطالبة به ... تتلعثم أمام إع...
