ပြန်လည်မွေးဖွားလာသောဧကရာဇ် (book 3)

Arc 4🗡43🗡ချိလော့တောင်

Chapter (43) Arc 4
ချိလော့တောင်

"အကြီးအကဲတို့ လေးယောက် အတူတူ တက်ရအောင်.... ဒီကလေးက အကာအကွယ် အခင်းအကျင်းကိုတောင် ဖြတ်ကျော်နိုင်တယ် ဆိုတော့ သူ့မှာ အထူးနည်းလမ်းတွေ ရှိရမယ်။ သူ့ရဲ့ တိုက်ခိုက်ရေး စွမ်းအားက သူတော်စင်တစ်ပိုင်းနဲ့ နီးကပ်နေပြီ"

ခေါင်းဆောင်မာ (ခေါ်) ဥက္ကဌကြီးက သတိပေး​လေသည်။

လုရွှမ်သည် အဂ္ဂိရတ်ပညာရှင် အဖွဲ့၏ အကာအကွယ် အခင်းအကျင်းအား ဖြတ်ကျော်နိုင်ခဲ့တယ် ဆိုတဲ့အသံကို ကြားလိုက်တာနဲ့ အဆင့်မြင့် အကြီးအကဲ လေးယောက်သည် ချက်ချင်းပင် တည်ကြည်သွားကာ ရှေ့သို့ ခုန်တက်၍ လုရွှမ်ကို နေရာအနှံ့ ဝိုင်းထားလိုက်ကြသည်။

ဒါတင်မကသေးဘဲ လက်အိတ်တစ်ခုစီ ထုတ်ပြီး ဝတ်လိုက်ကြသေး၏။ လက်အိတ်လေးခု ပေါ်လာတဲ့အခါ လုရွှမ်လည်း ချက်ချင်း လေးနက်လာခဲ့သည်။

သေချာတာပေါ့။ သူတို့လေးယောက်က တစ်ချိန်တည်း ဝတ်ဆင်လိုက်တဲ့ လက်အိတ်လေးခုကြားမှာ မမြင်နိုင်တဲ့ စွမ်းအင်ခြေရာတွေ တစ်ခုနဲ့တစ်ခု ရောယှက်နေတယ်လေ။ လုရွှမ်နဲ့ အနီးဆုံး အကြီးအကဲရဲ့ လက်သီးတွေက တောက်ပနေပြီး သူ့ရဲ့ ခွန်အားတွေ အရမ်းတိုးလာသလိုပဲ။

လုရွှမ် မျက်ခုံးပင့်လိုက်သည်။ ဒါက လူလေးယောက်ရဲ့ အားကို လူတစ်ယောက်တည်းဆီ ရောက်အောင် စုစည်းထားလိုက်တာပဲ။

အကြီးအကဲ လေးဦး၏ လုပ်ရပ်ကိုမြင်တော့ အဂ္ဂိရတ်ပညာရှင်အဖွဲ့၏ ဥက္ကဋ္ဌက ရုတ်တရက် စိတ်သက်သာရာ ရသွားသလို ခံစားလိုက်ရသည်။

"အကြီးအကဲစစ်မာ ဘယ်မှာလဲ? အကာအကွယ် အခင်းအကျင်းကို ချက်ချင်းပြင်ဖို့ တစ်ယောက်ယောက်ကို ခေါ်လာခဲ့စမ်း!"

အဂ္ဂိရတ်ပညာရှင် အဖွဲ့သည် ဒေသန္တရ အာဏာရှင်အဖွဲ့အစည်း တစ်ခုဖြစ်ပြီး အမျိုးမျိုးသော အရင်းအမြစ်များ ပြတ်လပ်မှု မရှိခဲ့ပေ။

အဂ္ဂိရတ်ပညာရှင် အဖွဲ့မှ သန့်စင်ထားသော ဆေးလုံး အမျိုးအစား အားလုံးသည် ဒဏ်ရာများကို ကုသပေးနိုင်သည်။ နယ်ပယ်ကို ဖောက်ထွက်နိုင်ခြေကို တိုးလာစေကာ ဝိညာဉ်စွမ်းအင် ပြန်လည် ရရှိစေနိုင်သည့် ဆေးကဲ့သို့ ကျင့်ကြံသူများအတွက် နေ့စဉ်လိုအပ်သော အရာများလည်း ရှိသည်။