ဒီချစ်စရာလေးကို ပြုစုပျိုးထောင်မယ် (Completed)

အပိုင်း ၄၁

Raising You This Small Stuff

Unicode

အခန်း ၄၁: မွေးနေ့လက်ဆောင်

ဒီနေ့က မိုရိချန်ရဲ့မွေးနေ့ဖြစ်သည်။

ယွမ်းစွော်က ပန်းခြံကနေ စောစောပြန်လာပြီး အဘိုးအေဘယ်လ်ပေးခဲ့တဲ့ သစ်သားမြင်းရုပ်လေးတွေကို စာအုပ်စင်ရဲ့ အံဆွဲအောက်​ခြေ၌ ဂရုတစိုက် သိမ်းထားလိုက်သည်။ သစ်သားမြင်းရုပ်လေးတွေကို ပုံစံအမျိုးမျိုးဖြင့် အသက်ဝင်စွာ ထွင်းထုထားကာ လက်ရာမြောက်လှသည်။

သိမ်းဆည်းပြီးနောက် ယွမ်းစွော်က သူကိုယ်တိုင်လုပ်ထားတဲ့ ဓာတ်ပုံဘောင်ကို လက်ဆောင်ထုပ်တဲ့ ရောင်စုံစက္ကူဖြင့် ထုပ်လိုက်ပြီး အထဲတွင် မှတ်စုလေးတစ်ခု ထည့်လိုက်သည်။ ထို့နောက် မိုရိချန် ဂိမ်းထဲကို မဝင်ရသေးခင် သူကျောင်းမှာ လုပ်ခဲ့တဲ့ ကိတ်မုန့်လေးကို ထုတ်ကာ စားပွဲပေါ်တင်လိုက်ပြီး  သူ့ကို အယ်လ်နီပေးလိုက်တဲ့ ဖယောင်းတိုင်တွေကို မုန့်ပေါ်တွင် တင်လိုက်သည်။

ထို့အပြင် သူက ဒီနေ့ ပန်းချီစာမေးပွဲတွင် အတန်းထဲ၌ ပထမ ရရှိခဲ့ကာ ထိုအတွက် creditအမှတ်ကိုလည်း ရရှိခဲ့ပြီး ဆိုလိုတာက စနစ်က သူ့အတွက် ဂိမ်းထဲကို ဝင်ရန်၊ထွက်ရန် ခွင့်ပြုချက်ဖွင့်ပေးခဲ့ပြီဖြစ်ပေမယ့် သူက စနစ်ရဲ့အကြောင်းကြားစာကို တိတ်တိတ်လေး ဖျက်ပစ်ခဲ့သည်...ဒါပေမယ့် ဒါက suprise ဖြစ်မလား မဖြစ်မလား သူလည်း မသေချာပေ။

ဆယ်မိနစ်အကြာတွင် အရာအားလုံးအဆင်သင့်ဖြစ်နေပြီးနောက် ယွမ်းစွော်က ဆိုဖာပေါ်တွင်ထိုင်ကာ ပြန်လာမယ့် မိုရိချန်ကို စိတ်လှုပ်ရှားစွာ မျှော်လင့်စောင့်စားရင်း သူ့ရဲ့လက်တွေကို ပွတ်နေခဲ့သည်။

မိုရိချန်က သူ့ရဲ့လက်ဆောင်ကို ကြိုက်ပါ့မလား။ သူကိုယ်တိုင်လုပ်ထားတဲ့ ဓာတ်ပုံဘောင်နှင့် အချိန်အကြာကြီး လေ့ကျင့်ထားပြီး သူ  ကြိုးကြိုးစားစား လုပ်ခဲ့ရတဲ့ ကိတ်မုန့်က မိုရိချန်ရဲ့အကြိုက် ဖြစ်ပါ့မလားဆိုတာကို  သူမသိပေ။

မာ့ရှ်မယ်လိုနှင့်အတူ ဆယ်မိနစ်လောက် ထိုင်ကာ စောင့်ပြီးနောက် ယွမ်းစွော်က စိုးရိမ်စိတ်တွေ စဖြစ်လာခဲ့သည်။ မိုရိချန်က အရင်ဆုံး သူ့မိသားစုနဲ့ ညစာစားဖို့ အိမ်ကို ပြန်သွားခဲ့ပေမယ့် စောစောပြန်လာခဲ့မယ်လို့ ကတိပေးသွားခဲ့သည်။ တစ်ခုခုကို တွေးလိုက်မိရင်း သူက ဆိုဖာပေါ်မှထကာ ဖန်သားပြင်ရှေ့သို့ လျှောက်သွားလိုက်ပြီး ပတ်ပတ်လည်ကို လှည့်ကြည့်လိုက်ပြီးနောက် အပြင်ဘက်ကို ကြည့်ဖို့ ပြတင်းပေါက်ဆီသို့ ပြေးသွားလိုက်ပေမယ့် ဘာမှ ထူးခြားမနေတာကို တွေ့လိုက်ရသည်။ စနစ်ချို့ယွင်းမှုက နောက်တစ်ကြိမ် ထပ်မဖြစ်နိုင်တော့ပါဘူး ဟုတ်တယ်မို့လား။