💥امرأة متنكرة في عالم الرجال💥
بقلمي: Hanane Zh
الجزء ٤
الدري كان مصاحب مع امال قبل وساستو جا وجايب معاه موس: شوفي صافي عييت مانتبعك اليوم غادي تقرري يا نتراجعو يانتاحر ليك هنا راني كنبغييك ا امال
امال تصدماات و خافت فنفس الوقت : ويليي لااا حط داكشي ا ولييد عافااك ماتآديش راسك اهئ اهئ
وليد: ورجعي معايا
سارة كتشوف فيه وفالتمثيل ديالو شوية دارت كتشوف فامال الكلااخ كون كان بنادم كاتبكي وخايفة عليه ولا منو مانعرف
دارت لقات الليسي كامل داير عليهم شي كايتفرج شي كايضحك ووحدين تايغوتو : رجعي معااه رجعييي معااه
تعصبات ماعندهاش مع هاد الدرامات
سارة جرات امال مالكوول وبقات غادة تاوقف وليد قدامهم
سارة: غاتحيد من قدامي ولا لا؟؟؟
وليد: ماشي شغلك بيني وبينها حيدي من قدامي نهضر معاها
امال مخبية وراها خافت منو وخاصة انو هاز داك الموس قالت بصوت خافت فوذن سارة: فكيني منو عافاااك والله تاندير ليك لي بغيتي
سارة سمعاتها و وقفات فوجهو: باغي تنتحر شرب ليك شي كينة دالفيران ولا تلاح من شي سطح بلاماتفرعلينا كرنا حنا بداك الموس الحافي دالخضرة.. تفو التريكة.. تعاود تعرضلينا ننحر مك بلاماتحتاج تنتحر اصلا
جرات امال وزادت
اما هو سكت حيتاش عارفها علاش قادة .. من صغرها كضارب غا مع الدراري وكتقتلهم بالعصا لدابا الشماكرية عاطيينها شبر دالتيساع وتاهي عاطاهم شبر دالتيساع مسمين عليها سمير فالحومة حيتاش واخا رقيقة ولكن قاسحة ومسمومة ومامسوقاش مكتلبسش مزيان ومكطلقش شعرها حتى المشيط مكتمشطووش
امال باستها فحنكها: اووف العز بييك فكيتيني منو ناري مسكين باقي طايح باغي ينتحر كااع
سارة شافت فيها بواحد الطريقة فشكل: دابا غا قوليلي واش نتي حمارة ولا كتحيمري علياا ؟؟
امال: علاش مالي شدرت؟
سارة: من نيتك تيقتييه؟؟ حيدي من قدامي وصلنا
مشات وخلاتها..
امال بالجهد: غدااا فيقيي بكريي را عندنا الثمنيية ولا والله تانمشي نخليك
سارة ماتسوقاتش ليها دازت على الحانوت خدات السوارت وطلعات للدار
لاحت الشكارة فجهة والمونطو فجهة حيدات السروال وبقات بالبيجامة دالبرد كان الريح مجهد ولكن الشتا حابسة مشات شعلات البوطة وبقات كتسخن يديها ودور عينيها فالارجاء بحالا عاد كاتستكشف ديك الكوزينة.
بالسيف هي عمرها دخلات ليها
حياتها قضاتها غا بين قرايتها والحانوت وبيتها لاغير
بانليها البراد عامر باتاي وصينية موجودة طفات البوطة وهزاتهم وهزات الخبز والزيت ومشات تقصي.. مها خلاتليها كولشي موجود عارفاها تنعس بالجوع وماتقيسش الما.. خاصة فالبرد...
سمعات الدوش عرفات مها لي كجوش لختها الصغيرة
كملات سارة هزات حوايجها لي مليوحين فالارض وشكارتها
طلعات لبيتها رماتهم تماك و تلاحت ببيجامتها نعسات فالبلاصة عيات هاد النهار ...
ديما اليوم لي تايجي فيه الكاميون دالبوطات كتعيى فيه وكطيح كاو
نمشيو لبلاصة اخرى فنفس الوقت يعني قبل سنتين من الوقت الحالي
كان خارج من المطار هاز صاكادو فظهرو وغادي بلامباالاة
ملاميحو بارديين لواحد الدرجة خايبة.. كان كايبان مثالي من لبسو فورمتو جمالو شعروو كولشي هو هاداك كولشي مقاد
كان طويل ذو بشرة حنطية مايلة للسمورية ديك السمورية لي كتاخدها من الشمس فالبحر.. كان داير نظارات سودااء واخا باقي داخل المطار ..
ماكايبغيش عينيه يتلاقاو مع اعين الاخرين باش يبان اكثر مثالية او باش يخفي شي حاجة هو الوحيد لي عارفها
كان لابس تيشورت فالابيض مخطط بالازرق وسروال جينز سبرديلة بيضة
ملاميحو بالنظارات الشمسية كتبان عربية كان ذو لحية سودااء وبشرة حنطية انف مقوس شوييية ولكن ماباينش وجه طويل وعامر... ولكن بدون نظارات تايبان گاوري نظرا لعيونو الزرقااء كزرقة السماء فنهاار مشمس
عينيه تايخليوك تسرح فيهم وتشوفو ك ملااك ملااك نازل من الجنة ولكن شخصيتو باقي تعرفو عليها من بعد
فورمتو رياضية ومجموعة كايتمشى بكل ثقة والانظار موجهة ليه.. هو راد البال لهادشي ولكن مامسوقش
خرج ليرا بانليه طاكسي خداه وعطاه العنوان
ماهي الا لحظات حتى وصلوو للبلاصة
#يتبع
YOU ARE READING
امرأة متنكرة في عالم الرجال 🤠مكتملة🤠
Romance💎مكتملة💎 ❌حصرية على الواتباد ❌ . جبتلييكم قصة جدييدة محملة بافكااار مختلفة كل الاختلاف علي داكشي لي عهدتوو.. كنتمنى تعجبكم.. نخليكم مع التقديم💙🖤 تقديم القصة 😘 ذلك الشخص الذي لايعرف معنى كلمة احساس أو شعور ، لم يذق طعم السعادة ولا الحزن من قبل،...
