💥امرأة متنكرة في عالم الرجال💥
بقلمي: Hanane Zh
الجزء٥
ماهي الا لحظات حتى وصلوو للبلاصة
نخليكم بصوت البطل باش تعرفو عليه اكتر وعلى طريقة تفكيرو
وصلت لدارنا.. الدار لي هربت منها لسنواات رجعت ليها اليوم تحت ضغط الواليدة
انا عندي عادي بحال هنا بحال المانيا وجود العائلة ماتايهمنيش وبالعكس هو راحة ليا حيتاش مكنمثلش تماك يوميا ... هنا تانضطر نمثل انني كنبغي الام ديالي وان الاب ديالي هو قدوتي فالحياة بحال خوتي باش مانبانش مختلف.. باش مانباش غرييب او بسيكوباط كيما تايسميوني من صغري
هزيت عيني وشفت فهاد الفيلا. الفيلا لي كاع ذكراياتي فيها.. ماحسيت بوالو طبعا حيتاش مكتمتل هاد البلاصة تاحاجة بالنسبة ليا بحال ذكرياتي لي ماتايهمونيش...
تنهدت ورسمت ابتسامة صفراء فوجهي غايخصني نمثل دور الابن المغترب لي توحش عائلتو
تمشى ياسين بكل ثقة وجه صبعو لبلاصة البصمات
قراتو الماشين خرجات كاميرة شاف فيها وقال صوت امراة الية: ويلكوم ميستر ياسين
الالة مبرمجة على بصمات افراد العائلة وصورهم ..
ابتسم ابتسامة جانبية بسخرية ودخل تاجيه داكشي غاتبرهيش
بقى غادي بين الاشجار وتايتأمل المكان ماتبدل والو فيه
بانوليه الحراس
قرب ليه واحد منهم: تبعني اسيدي
ياسين ماجاوبوش بقى تابعو الحارس صحابليه شي ضيف ماعارفوش واش ابن الرئيس ديالو حيتاش ماعاشش معاهم كاع واخا ولدو من دموو ولحمو
وصل ياسين امام الباب الثانوي للفيلا بانوليه الخادمات
دايرين بالام ديالو لي كتبكي .. باه واقف بشموخ بالرغم من انو واصل الستين الا انه باقي شاد فراسو.. خوه الكبير المثالي مع مراتو وولدو الصغير وخوه المتوسط بكوستيم مقاد الحالة واقفين تايشوفو فيه وهما مبتسمين.. يمكن نساو شنو دوزو عليه فصغرهم داكشي فرحانين بالعودة ديالو ولكن ياسين ماتاينساش
ابتسم وهو تايشوف فهاد اللوحة العائلية.. عائلة مثالية ماناقصها والو هو غا زايد فيها وصاف
بقى غادي لجيهتهم تاقرب لمو. طارت علييه عنقاتو بالجهد وصوت بكائها كايتسمع فالارجاء
ياسين هز راسو شاف فباه وخوتو حاضيينو زعما يدير شي ردة فعل.. بحالا كايتسناوه يبكي ولا يضحك مهم يدير اي حاجة غي مايبقاش بارد كيكان.. كايتسناو منو يكون تبدل غي فهاد السنوات ومابقاش كيكان قبل..
ياسين فهم النظرة ديالهم.. حيد نظاظرو وابتسم ليهم.. هز يديه وبادل الام ديالو العناق .. واخا ماحاس بوالو ولكن مفروض عليه يمتل عليهم باش مايتحطش فمواقف غريبة بحال كما وقعليه فالماضي
غا حط يديه على الام ديالو وهما يبتسمو خوتو ... وباه شاف فيه شوفة افتخاار .. الشوفة لي عمر شافها فيه من قبل
ياسين فرعاتو الشمس فراسوو تايفكر غا ايمتى يدخل يشرب الما بااارد ويتكى شوية عيان.. ولكن خاصو يصبر ... دفع الام ديالو بالشوية وابتسم ليها قري باسليها راسها: صافي ماتبكييش
الاب ديالو قرب ليه وحل يديه بمعنى عنقني
ياسين عرقاان بزاف تايحس براسو تايتلصق ماقادش يعنقو ولكن فرض على راسو وعنقوو حس بالحرارة والحاال سخون بزااف والشمس قهراتو ولكن ماخصش يخسر لوالديه الخاطر
الاب تايضربو بيديه لظهرو وهو باقي معنقو: ولدييي ياسين على سلامتك
الام تراجعات اللور تاتمسح دموعها بشياكة وجوج خدامات شادينها .. لاش؟ مانعرف مهم خدمتهم وصافي ..
طلق منو الاب ديالو وجرو تاني خووه الكبير عنقو
ياسين ولا كايتسنى غا ايمتى يسالي هاد اللقاء الدرامي يمشي يرتاح..
الاخ الكبير: خوياااا توحشنااك اصاحبي
ياسين ضحك معاه ومشى سلم على خوه المتوسط لي تاهو جرو لعندو وعنقو بنفس الطريقة : اكبرتيي اصاحبي وليتي فايتني فالطول
ياسين مالقى مايقول ضحك وقال بدون تفكير: وايااااه ضروري
ماعرفش لاش قالها ولكن كان خصو يخرج شي حاجة من فمو كيما بغات تكون
ضحكو الدراري
سلم على مرات خوه باليد وعرفهم خوه لكبير هي مكتعرفوش حيتاش عمرها شافتو و ماحضرش لعرسها...
حس بشي حد تايجرو من سروالو حنا راسو لقى ولد صغير هاز راسو تايشوف فيه
كان ولد خوه.. هزاتو مو ومداتو ليه باش يهزو
ياسين حس بيها فرضات عليه تهزو .. هزو وباسو فحنكو بقى تايفكر شتايقولو فهاد اللقطة.. شوية ابتسم شاف فخوه وقال: ولدك؟ زوين تايشبه ليك
الام ديالو ابتسمت وحتى خوه.. هو لاحظ هادشي ديما الام تايعجبها لي يشكر ليها ولادها واها يكونو خايبين مفروض عليك تقوليهم زوينين وتنافقهم
قاطع تفكيرو باه لي قاليه: يالاه ندخلو من الشمس
ودخلو كاملين
#تصبحوووون
البنااات هاهما الأجزاء كيما واعدتكم
يغيتكم تعطيوني ارائكم فهاد البداية و توقعاتكم لهادشي لي جاااي 😍😍😍🖤
كيجاتكم البداية والاسلوب مزيان ولا لا؟؟ مهم بغييت ارائكم💙💙💙💙💙💙
YOU ARE READING
امرأة متنكرة في عالم الرجال 🤠مكتملة🤠
Romance💎مكتملة💎 ❌حصرية على الواتباد ❌ . جبتلييكم قصة جدييدة محملة بافكااار مختلفة كل الاختلاف علي داكشي لي عهدتوو.. كنتمنى تعجبكم.. نخليكم مع التقديم💙🖤 تقديم القصة 😘 ذلك الشخص الذي لايعرف معنى كلمة احساس أو شعور ، لم يذق طعم السعادة ولا الحزن من قبل،...
