امرأة متنكرة في عالم الرجال 🤠مكتملة🤠

الجزء 193 🤠

امراة متنكرة في عالم الرجال 💙💪

الجزء 193

بقلم حنان زهراوي /اريا ستارك

ولي هي فاش تايرجع يعيش فدماغو اسوء حااجة عاشها فحياتو وبقات مطبوعة ليه كذكرى خاايبة.. لي كتجييه علي شكل كوابيس فكل ليلة تقريبا وكل يووم.. تال نهار بدا يتحااك مع سمير او سارة ووبدا يحس بلي شي شخص تايعاملو عادي كابنادم بحالو بحال كاع الناس.. ماشي تايعاملو كمريض او تايخاف منو..
دار شاف فيها بحب وابتسم..
وصلوو للدار كانت سارة نعساات فالطريق.. هزها ودخل تلاقا بمو كانت حاية تطمئن علييه.. حذرها باش تسكت لاتفيق سارة

بقات مو كتشووف فيه مصدومة متبعاه بعينيها تاطلع مع الدروج وهو هاز سارة وحالة فمها فولدها..
الاب قرب ليها وهو مبتسم : تبدل يااك
حميد: غي ماتبينوليهش وتعااملو عاديي صافي.. لايصدق هازها ودايها من هنا لدارو
الام باقة كتشوف جهة الدروج مصدومة..
ياسين حط سارة فوق سريرو.. باسها من حنكها ودخل دغيا خدا دوش خفيف خرج لاوي فوطة علي نصو.. وضرب فيها فايقة وكتحاول تفهم راسها فين
شافتو.. سارة بصوت بااح: فين انا
ياسين ابتسم وقرب ليها: تكاي نعسي ترتاحي..
سارة تفكرات: واش جبتيني لداركم.. (دورات عينيها فالببيت ورسمات شبح ابتسامة علي وجهها) بيتك هادا
ياسين دور تاهو عينيه فالبيت ماعمرو تسوق ليه ولا رد ليه البال: اه بيتي
سارة: زويين
ياسين : انا انلبس حوايجي.. ونتي من الاحسن رجعي تنعسي ترتاحي..
ياسين وقف لبس تيشورت وحيد الفوطة.. سارة غي شافتو تايحيدها دغيا دارت غمضات عينيها... شافيها ياسين وابتسم بسخرية: غاتشوفيه غاتشوفيه
سارة شهقات وناضت كتجري حلات الباب وخرجات.. واقفة قدام الباب وقلبها كايضرب بالجهد كتسب فيه فنفسها : تفوو بلماسخ لاخرر تفوو ماتايحشمش..
ياسين حل الباب ودوز يدو ورا خصرها وجرها منزلها الدروج.. سارة من ناحية كتحلف فييه ومن ناحية كتبركك وتشوف فالفيلا كيمقادة وديكوراتها.. عجبها هادشي.. قالت فنفسها : كون غا ماهربتش ماللول . غي طولت عليا الطريق

نزلو الدروج وتلاقاو بمو فالصالون لي غي شافتو تلاحت علييه كتعنق وتبوس وتبكي: الحمد لله اولدي ماوقعليك والوو.. فاش شفنا فالاخبار مدرستك كتتحرق تخلعنا علييك
ياسين ببرود بحالا بغى يدفعها بالشوية حيتاش زيرات عليه.. هز عينيه فسارة لقاها مخنزرة فيه شوية وطير عليه تاكلو بعينيها.. رسم ابتسامة بالزز علي وجهو وهز يديه تايربت على ظهر مو
حميد والاب ديالو لي دازت هاد اللقطة قدام عينيهم دارو شافو فبعضياتهم وحبسو الضحكة
الاب بينو وبين حميد بالشوية:خلاها مولاها لي ماعندو سيدو عندو لالاه
حميد تاينغز فيه وحابس الضحكة لايطلقها
ياسين بعذما طلقات منو مو دارت عند سارة تفكراتها: اااااا نتيي كنعرفك؟ نتي هيي... (حطات يدها علي فمها بصدمة وشافت فراجلها وهي مشيرة جهة سارة) هادي هييي
الاب دار براسو حركة بمعنى اه: اييه هادي هي البنت لي كنا غانزوجها لياسين..
الام دارت مصدومة َقربات ليها وعمقاتها: مرحبااا بيك ابنتيي مرحباااا بيك.. خلعتينا علييك ورا ماقالولينا هربتي.. الله يابنتيي
سارة عنقاتها بالجهد وتاهي جاها نفس احساس ياسين... ماعندهاش مع التعناق بزااف وهادشي من الصغر.. (طبعا من غير حبيبها ياسين😂)
ياسين شاف فردة فعل سارة..تأكد بلي هاد السيدة لي قدامو تخلقاات على قبلوو. نصوو التاني.. على الاقل فاش يشوفو العائلة غايبقاو يتجاوزوهم باش يتفاداو البوسان والتعناق👀😉
الام حطات يديها على وجه سارة: تبارك الله مرات ولدي غزاالة
سارة جاتهاا الخرية فهاد اللحظة ووجهها دازو فيه كاع الوان الطيف

#يتبع