امراة متنكرة في عالم الرجال 💪
الجزء 78
بقلم: حنان زهراوي / اريا ستارك
ماسين: وعلاش نتي باغة تخاطري من بعد كاع هاد لوقت لي خدمتي فيه وتمحنتي غاضيعيه بمجازفة تقدر تصدق تقدر لا...قولي ليا أشنو مخبية مناش خايفة
سارة طلع ليها دم: شكون نتا باش طالبني نقول لك واش كتعرفني كتعرف ضروفي؟؟ معندي منقول لك نتا غريب عليا كيما انا غريبة علك كل واحد يلزم حدودو باش متخربقش هاد لعلاقة
ماسين بقا فيه لحال من طريقة لهضرة ديالها مشا حدا لباب وقال: اوكي اوكي غانتسناك حتى ترشق لك تقولي ليا انا ديما هنا لاحتاجيتيني.
حل لباب وخرج خلاها كتشوف فلباب كتأسف على هادشي لي وقع... تجربة كانت زوينة ولكن أي حاجة زوينة كتكون عندها نهاية دكشي علاش خاصها عمرها تولف ولا تنسى راسها... حياتها من لي عقلات عليها وهي حرب......
فمكان تاني خارج أب ياسين وهو فرحان مشا عند مرتو ديريكت.
الأب: حمد لله ياسين غايتبرع ليه
الأم بركات الأرض حسات بهم وتهز من فوق كتافها: اخيرا حمدتك ياربي وشكرتك
حميد: انا غانوصيكم من هنا ملي ان شاء الله نخرجو من الكلينيك ياسين بعدو منو وخليو ليه راحتو راكم عارفينو عزيز عليه يكون بوحدو مهم متبرزطوهش
الأب: متخافش أولدي حنا معاك
حميد: لواليد نهضر معاك واحد دقيقة
الأب بعد من فين واقفين الأم ومرت ولدو حميد ووقف معاه.
الأب: ياك لباس اولدي؟؟
حميد: الواليد باقي عندك صورة ديك لبنت لي كنا غانزوجوها لياسين وهربات من دارهم
باباه دار يدو فجيبو لوراني وجبد بزطامو وجبد منو تصويرة: هايا باقة عندي راه باقين نقلبو عليها
حميد خدا من عندو تصويرة: وباها ومها تاهوما كيقلبو؟؟
الأب حدر راسو: أولدي باها حشم من شوهة ومالقا فين يدي وجهو تحولو من دارهم رجعو للعروبية
حميد كيشوف فتصويرة تأكد بلي هي لي كاينة تما ولكن دايرة راسها دري معرفش علاش وكيفاش هادشي واقع معاها ولكن دخل ليه فدماغو شك أنها كتنتاقم من ياسين بلا هو سباب ولا شي حاجة بحال هاكة...قرر أنه غايقلب وعرف لبلان اشنو.
حميد: أجي الواليد واش كتعرف ياسين هي؟؟عمرها شافتو؟؟
الأب: اولدي كنتو كتلاقاو فدار اليازيد (اب ماسين) كلكم وتاهي كانت كاجي تعاون باها ولكن منضنش كتعرفو ديك لبنت كانت حدودية ومعندها مع بنادم بحالو ...ولكن باها كيعرف ياسين مزيان دكشي علاش كان قابل.
حميد: زعمة هربات حيت مبغاتش تزوج؟؟
الأب: للأسف قبل مايتحول باها قاليا بلا ضربها ديك الليلة على الطريقة لي دوات معانا بيها وبلي ماشي أول مرة كيضربها ...أودي داك سيد بارد ماكيهمو حد لبنت هربت منو معرفها فين واكلة ولا شاربة حية ولا ميتة، وهو هاماه غير الدرب اش يقولو عليه وهضرة الناس لاجيتي عليا حسن ليها تبقا فين راها كاينة..
حميد: ولا كون صبرات تزوج بياسين
الأب: أشنو سر اهتمامك بيها عمرك سولتيني؟؟
حميد: غير شفت واحد لبنت وكيصحبني هي وبغيت نتأكد ساعة ماشي هي
الأب طلقها بضحكة رجولية: ههههههه أولدي راني باك كنعرفك ملي كتكدب
طبطب على كتفو وزاد أو خلاه تايق فولدو حميد بعقلو ولا شافها ولا سمع عليها شي خبار غايدير لي فصالحها....
#يتبع
أنت تقرأ
امرأة متنكرة في عالم الرجال 🤠مكتملة🤠
Romance💎مكتملة💎 ❌حصرية على الواتباد ❌ . جبتلييكم قصة جدييدة محملة بافكااار مختلفة كل الاختلاف علي داكشي لي عهدتوو.. كنتمنى تعجبكم.. نخليكم مع التقديم💙🖤 تقديم القصة 😘 ذلك الشخص الذي لايعرف معنى كلمة احساس أو شعور ، لم يذق طعم السعادة ولا الحزن من قبل،...
