ထာ၀ရနဂါး တန်ခိုးရှင် ( လုမင် ) (Ch 1 - 985 ) Book 1

646 - 650

ထာဝရနဂါးတန်ခိုးရှင် (လုမင် )
မူရင်း စာရေးဆရာ - Mu Tong Ting Zhu
ဘာသာပြန်သူ      - ထာဝရ
အပိုင်း ( 646 ) များပြားလှသော ပမာဏရှိ သွေးအဆီအနှစ်များ

"သတ်ကြ"

ကုန်သည်အသင်းမှလူများ မျက်လုံးနီရဲလာကာ ဟိန်းဟောက်လိုက်ကြသည်။

သေပြီဟု ထင်ထားရာမှ အခြေအနေက ပြောင်းပြန်လည်သွားပေရာ စိတ်ဓာတ်တက်ကြွလာကြ၏။

အချိန်တိုအတွင်း ရာချီသော သွေးဆိုးပင်လယ်ဓားပြများ အသတ်ခံလိုက်ကြရသည်။

နောက်ဆုံးတွင် သွေးဆိုးပင်လယ်ဓားပြများလည်း အလဲလဲအပြိုပြိုဖြင့် ဆုတ်ခွာသွားပြေးတော့သည်။

ရှဲ့နျန်ချင်းနှင့် ကျန်သူများက အလောင်းပင်လယ်ကိုနင်းကာ ထွက်ပြေးသူများကို လိုက်လံသတ်ဖြတ်သည်။

နောက်ဆုံးတွင် သွေးဆိုးပင်လယ်ဓားပြအဖွဲ့မှ လူရှစ်ရာခန့်သေ၍ လူနှစ်ရာခန့်သာ အသည်းအသန် ထွက်ပြေးလွတ်မြောက်သွားကြသည်။

"ဝုန်း ဝုန်း"

ထိုအချိန်တွင် လုမင်က ဥက္ကာခဲကြွေသကဲ့သို့ လက်သီးချက်များကို ဆက်တိုက်ထုတ်ဖော်နေ၏။

မျက်နှာအမာရွတ်ရှိသောလူကြီးနှင့် ပိန်ပိန်လူကြီးဟာ အကြောက်အကန် ခုခံနေသော်လည်း ပါးစပ်နှင့် နှာခေါင်းတို့မှ သွေးများ စီးကျလာသည်။

လုမင်လက်သီးချက်များဟာ ၎င်းတို့၏ အတွင်းအင်္ဂါများအား ကြွေကျလုနီး ဖြစ်စေသည်။

"ကောင်းတာ၊ ကောင်းလိုက်တာ"

လုမင်ဟာ ကြယ်တရာပေါက်ကွဲလက်သီးအား အသုံးပြုရသည်မှာ ပိုချောမွေ့လာသကဲ့သို့ ခံစားနေခဲ့ရသည်။

တချိန်တည်းမှာပင် ကြယ်တရာပေါက်ကွဲ လက်သီးသိုင်းက စတုတ္တအဆင့်ကို နီးကပ်လာသကဲ့သို့ ခံစားလိုက်ရ၏။

သိုင်းပညာကို လေ့ကျင့်လိုပါက တိုက်ပွဲကြီးများအား လိုအပ်သည်။

အဘိုးကြီးနှင့် ရှဲ့နျန်ချင်းတို့၏ ကူညီတိုက်ခိုက်မှုဖြင့် ဓားပြအားလုံး သေသူသေ၊ ထွက်ပြေးသူ ထွက်ပြေးသည်ကို မြင်ရသောအခါ မျက်နှာတွင်အမာရွတ်ရှိသောလူကြီးနှင့် ပိပိန်လူကြီးတို့နှလုံးသားများ လေးလံလာသည်။