ထာ၀ရနဂါး တန်ခိုးရှင် ( လုမင် ) (Ch 1 - 985 ) Book 1

971 - 975

ထာဝရနဂါးတန်ခိုးရှင် ( လုမင် )
မူရင်း စာရေးဆရာ - Mu Tong Ting Zhu၊ 牧童听竹
ဘာသာပြန်သူ      - ထာဝရ
အပိုင်း ( 971 ) ဓားတာအိုနှင့် ဓားတာအို။

"ဂါး"
နဝမနဂါးက ဟိန်းဟောက်ပြီး ခြေသည်းများဖြင့် တိုက်ခိုက်လိုက်သည်။

အိုတုလည်း ဟိန်းဟောက်ကာ အကြောက်တရားကို ကျော်လွှားပြီး လုမင်အား တိုက်ခိုက်လိုက်၏။

ရေနဂါးနှင့် နဝမနဂါးတို့ ထိပ်တိုက်တွေ့ဆုံခဲ့ကြပြီ။

အိုတုက ရွှေတာအိုကို အကြွင်းမဲ့ ထုတ်ဖော်လိုက်သည်။ သူ၏ ရွှေတာအိုက အဆင့်လေး‌တွင်ရှိကာ အလွန်မာကျောကြံ့ခိုင်လွန်း၏။ သူ၏ ခန္ဓာကိုယ်က သံတုံးသံခဲကဲ့သို့ မာကျောပြီး လက်သည်းများကလည်း ရွှေနှင့်သံတို့ဖြင့် ပြုလုပ်ထားခဲ့ပုံရသည်။ ၎င်းတို့က အလွန်ထက်ပြီး မည်သည့်အရာကိုမဆို ဖြတ်ကျော်သွားနိုင်ကြပေသည်။

သူ၏ လှုပ်ရှားမှုတိုင်းက ကြောက်စရာကောင်းသည့် စွမ်းအားများ ရှိသည်။

လုမင်၏ ပတ်ဝန်းကျင်မှာတော့ မတူညီသောတာအိုလေးခု ရှိနေသည်။ သူ့စွမ်းအားကလည်း လွန်စွာ ကြောက်မက်ဖွယ်ကောင်း၏။

တစ်ချိန်တည်းမှာပင် လုမင်က နဂါးလေးကောင်စွမ်းအားကို ထုတ်လွှတ်ကာ အတားအဆီးမဲ့သောကောင်းကင်သိုင်းဖြင့် စတင်ခဲ့တော့သည်။ ယခုအခါ သူ၏ ကြွက်သား တစ်လက်မစီတိုင်းဟာ အတားအဆီးမဲ့သော ကောင်းကင်သိုင်းစွမ်းအားကို ထုတ်လွှတ်နိုင်သည်။

သူ့ခန္ဓာကိုယ်ရှိ ကြွက်သားတိုင်းက ကြောက်မက်ဖွယ်ကောင်းအောင် အစွမ်းထက်ကာ လက်သည်းတိုင်းကလည်း အရာအားလုံးကို ဖိနှိပ်နိုင်စွမ်းရှိသည်။

"ဝုန်း"
နဂါးနှစ်ကောင်က တပြိုင်နက်တည်း တရစပ်တိုက်ခိုက်လိုက်ကြသည်။ အလွန်ရိုင်းစိုင်းပြီး ပြင်းထန်သော ဤတိုက်ပွဲက လူတို့ကို ရှေးဦးကာလကဲ့သို့ ခံစားရစေသည်။

"ဝုန်း"
သို့သော်လည်း နဝမနဂါးတွင် ခြေသည်းကိုးချောင်းရှိ၍ ရေနဂါးက ၎င်းတို့အားလုံးကို မတားဆီးနိုင်ပေ။ သူ၏ ခန္ဓာကိုယ်အား နဂါးခြေသည်းကိုးချောင်းဖြင့် ဖမ်းဆုပ်သွားကာ အကြွင်းမဲ့ခွန်အားဖြင့် ဆုတ်ဖြဲပစ်လိုက်သည်။ ချက်ချင်းဆိုသလိုပင် အကြေးခွံများ လွင့်ထွက်သွားပြီး အသားအပိုင်းအစကြီးများ ဆုတ်ဖြဲခံလိုက်ရ၏။ သွေးများကလည်း ပတ်ဝန်းကျင်သို့ ဖြာထွက်သွားတော့သည်။