သည်တစ်နေ့၏နေ့လည်ခင်းတွင် ရွှီကွမ်းကျိသည် ကန်တင်း၌သာ နေ့လည်စာစားဖြစ်ခဲ့၏။ မည်သည့်လတ်လတ်ဆတ်ဆတ်ဟင်းလျာမျိုးမှမဟုတ်ပါဘဲ အဆင်ပြေသည့်ဟင်းလျာအချို့ကိုသာ စားနေသည့်အချိန်တွင် ချိုက်ယင်းယင်း၏အဖေဖြစ်သူနှင့် အမှတ်မထင်ဆုံလိုက်သည်။ လောင်ချိုက်မှာ မုဆိုးဖိုတစ်ဦးဖြစ်ပါသော်ငြား အလုပ်အကိုင်အပေါ် ဂုဏ်ယူအလေးထားလွန်းသောကြောင့် ဆေးရုံ၏လက်ထောက်ဆေးရုံအုပ်ရာထူးအထိပင် ရာထူးတိုးမြှင့်ခံထားရသူဖြစ်သည်။ လောင်ချိုက်က Hellokitty ထမင်းဘူးကိုကိုင်လာရင်း ရွှီကွမ်းကျိ၏နံဘေးတွင် ဝင်ထိုင်လိုက်သည်။
"လောင်ရွှီ....မင်းရော မပြန်သေးဘူးလား"
ရွှီကွမ်းကျိမှာ ခေါင်းငုံ့လျက်ထမင်းစားနေရင်း အရိပ်တစ်ခုကပ်လာသည်ကိုမြင်လိုက်ခြင်းကြောင့် မနေ့ညကတည်းကနှပ်ထားသည့်ကြက်ပေါင်အား အသာအယာလှမ်းကြည့်ပြီး သူ့လက်အောက်သို့ မသိဘာသာ သိမ်းယူလိုက်သည်။
လောင်ချိုက်က ထမင်းဘူးအား တခမ်းတနားဖွင့်ရင်းဖြင့် စကားဆိုလာ၏။
"မင်းကလည်း သူများကိုအထင်သေးလိုက်တာကွာ...သူများမှာလည်း ပါ,ပါတယ်ဟ"
ရွှီကွမ်းကျိမှ အသံတစ်ချက်မထွက်ဘဲ လှမ်းကြည့်လိုက်၏။ တကယ်တွင်တော့ မပါချေ။
လက်ထောက်ဆေးရုံအုပ်ချိုက်က ဝါးတူကိုယူပြီး စကားလမ်းကြောင်းလွှဲ၍ စကားဆိုလာသည်။
"ယင်းယင်းဆီက ကြားတယ်....ရွှီကျစ်က ဒီတစ်ခေါက်စာမေးပွဲမှာကောင်းပါ့ဆို ၊ အမှတ် ၇၀၀ ကျော်တောင်ဆို"
ချိုက်ယင်းယင်း၏ပါးစပ်တစ်ပေါက်မှာ ကန်တင်းမှထမင်းချက်အန်တီကြီးများထက်ပင် အဆီတဝင်းဝင်းဖြစ်သေးသည်မဟုတ်လား။ ရွှီကွမ်းကျိက ထမင်းဖြူတစ်လုတ်ဝါးရင်း ပြန်ဖြေလာ၏။
"အဲ့လောက်လည်း အမှတ်မမြင့်ပါဘူး"
ရွှီကွမ်းကျိ အနှီလူမှာ ယခုနှစ်များအတွင်းတွင် သူ့တည်ရှိမှုအား အများအာရုံမစိုက်စေရန် တတ်နိုင်သလောက်သေးငယ်ပစ်ချင်နေသည့်အလား အေးအေးဆေးဆေးနေတတ်သူဖြစ်မှန်း လောင်ချိုက် သိပြီးသားဖြစ်သည်။ အစောပိုင်းနှစ်များဆီက ရခဲ့သည့်လောကဓံသင်ခန်းစာအားလုံးမှာ အဘွားအိုကြီး၏နမိတ်ဖတ်စာတမ်းများအား ယုံကြည်သွားစေနိုင်လောက်သည်အထိ သူ့အပေါ် ပြင်းထန်ခဲ့သည်ပင်။ သူဆိုသည်မှာ အဆင်ချောလွန်းသည့်ဖန်တီးမှုတစ်ခုဖြစ်နေခြင်းကြောင့် အထက်မိုးနတ်မင်းများပင် မနာလို၍မျက်စိစပါးမွှေးစူးကာ 'ချိုးဒြယ်'အပေါ် ထိုသို့သောမကောင်းမကန်းဖြစ်ရပ်များ တွေ့ဆုံသွားစေရသည်ဟူသောစကား။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~