ပန်းခြံဝန်းထဲမှ နှင်းဆီများဟာ လမင်း၏အလင်းရောင်အောက်တွင်တော့ အရှိန်အဝါတို့မှေးမှိန်လျက်သား။ အိပ်ခန်းတံခါးကိုလည်းပိတ်ထားပါသည့်တိုင် အသံလုံသည့်စနစ်မကောင်းသောကြောင့် နှစ်ယောက်သားက နှစ်ကိုယ်ကြား ကြားလောက်ရုံအသံဖြင့်သာ စကားဆိုနေကြခြင်းဖြစ်သည်။ အိပ်ခန်း၏ဘေးကပ်ရပ်တွင် သန့်စင်ခန်းရှိနေပြီး လူငယ်စုံတွဲက ပျားရည်ချို၍ပြီးသွားလေသလားမသိ ၊ ရုတ်တရက်ကြီး သန့်စင်ခန်းထဲဝင်ကာ စကားများနေကြချေသည်။
"ဘယ်သူလဲ....မင်း ငါ့ကို ပြစမ်းပါ"
ယောက်ျားလေးက ဦးစွာစကားဆို၏။
"ဒီအတိုင်း ဂျူနီယာမောင်လေးတစ်ယောက်ပါပဲဆို ၊ လွန်ခဲ့တဲ့သုံးလေးရက်တုန်းက ကျောင်းမှာ စျေးရောင်းပွဲလုပ်တယ်လေ ၊ ငါတို့စာအုပ်တွေအားလုံး ဒီဂျူနီယာမောင်လေးဆီ အပ်ထားခဲ့တာလို့"
"စာအုပ်ဝယ်တာက Wechat add စရာလိုလို့လား ၊ အဲ့ဒီဂျူနီယာရဲ့ရုပ်ရည်ကလည်း သာမန်မှမဟုတ်တာ"
ယောက်ျားလေး၏စကားသံက အနည်းငယ်ခက်ထန်နေသည်။
"ကျန်းချန်....နင် ပြဿနာမရှိ ပြဿနာလိုက်ရှာမနေနဲ့ ၊ နင့် Wechat ထဲက ဟိုမိန်းကလေးကိစ္စကိုတောင် ငါ ဘာမှမမေးဘူးနော်"
"မင်းတို့မိန်းကလေးတွေကို တကယ်လက်လန်တယ် ၊ မင်း ပြဿနာအကြောင်းပြောနေရာကနေပြီး မင်းမေကြီးတော်မလို့ ငါ့ဘက်လှည့်လာတာလား ၊ အမြဲတမ်း ငါ့ကိုပဲ အပြစ်တင်နေတော့ ဟုတ်ပြီလား"
"ကျန်းချန် နင် တကယ်ပဲ ဘာဖြစ်နေမှန်းကိုမသိဘူး ၊ မကျေနပ်လည်းလမ်းခွဲမယ်"
"မင်း ထပ်ပြောစမ်း"
"လမ်းခွဲမယ်"
မိန်းကလေး၏စကားသံက အတိုင်းအဆမဲ့ကို အေးစက်နေ၏။
"ခွဲလေ ၊ သတ္တိရှိရင် မင်း ငါ့ကို ထပ်လာမရှာနဲ့"
"....."
"....."
အိပ်ခန်းအတွင်းမှ နှစ်ယောက်မှာကား အချင်းချင်းမျက်နှာချင်းဆိုင်ကြည့်နေကြပြီး အတော်အတန်ကြာသည်အထိ ပြောစရာစကားမဲ့ကာ အသံတိတ်နေမိကြသည်။ အမှန်တိုင်းဆိုရပါလျှင် ရွှီကျစ်ဟာ ယခုလိုအခြေအနေမျိုးအား တစ်ခါမှမတွေ့ကြုံဖူးသည့်အတွက် သူမ၏အမြင်တွင် အမှတ်(၁)ကျောင်းမှလူသားများက ထူးဆန်းသလိုလိုပင်မြင်လာမိသည်။ သို့နှင့် ချန်လုကျိုးကို တည့်တည့်ကြည့်ရင်း မျက်တောင်ပုတ်ခတ်ပုတ်ခတ်လုပ်ကာ စကားဆိုလိုက်သည်။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~