ထိုနေ့မှစ၍ နောက်ထပ်နှစ်ရက်နီးပါး ထပ်မတွေ့ဖြစ်ကြတော့။ ချန်လုကျိုးမှာ နောက်တစ်ပတ်ကြာသပတေးနေ့တွင်သွားရမည်ဖြစ်၍ နှစ်ယောက်ကြား၌ အချိန်လေးငါးရက်မျှသာကျန်တော့၏။ ရွှီကျစ်က သူ့အား ထပ်၍လည်းလာမရှာတော့သလို Wechat ထဲတွင်ပင် အဆက်အသွယ်နည်းသွားခဲ့သည်။ ကြားကာလထဲတွင်လည်း ချန်လုကျိုးဘက်မှ သူမအတွက်ရေးပေးထားသောမိန့်ခွန်းစာတမ်း လှမ်းပို့ပေးသည့်မက်ဆေ့တစ်ခုသာရှိပြီး ရွှီကျစ်ရေးထားသည့်စာတမ်းကို အစအဆုံးပြန်ပြင်ထားသောကြောင့် ချန်လုကျိုး အသစ်ရေးပေးထားသလိုပင်ဖြစ်နေခဲ့သည်။ ရွှီကျစ်ဘက်မှ ကျေးဇူးတင်စကားတစ်ခွန်းသာလျှင် စာပြန်ခဲ့၏။ ချန်လုကျိုးသည်လည်း အစက်တစ်စက်တည်းသာ စာပြန်ဖြစ်ခဲ့ပြီး တခါတရံတွင် သူဟာ မည်ကဲ့သို့စာပြန်ရေးရမည်မှန်းတကယ်မသိတော့၍ကြောင့်သာ အစက်တစ်စက်တည်းပြန်ပို့မိခြင်း။ မည်သို့ပင်ဖြစ်စေ ၊ စကားလမ်းကြောင်းကိုအဆုံးသတ်လိုက်သည့်လူက သူသာလျှင်ဖြစ်ရမည်ဖြစ်ပြီး မဟုတ်ပါကလည်း ရွှီကျစ်မှနေ၍ 'ချန်လုကျိုး နင်က Wechat ထဲမှာဆိုရင် အပြင်မှာထက်တောင် အေးတိအေးစက်ဖြစ်နေသေးတယ်' ဟု စာပြန်လာဦးမည်ပေ။ သို့သော်ငြားလည်း သူဟာ ကျင့်သားရနေသူတစ်ဦးကဲ့သို့ပင်ဖြစ်ပြီး မိန်းကလေးတော်တော်များများမှ ဖွင့်ပြောလာတတ်သည့်အခြေအနေတိုင်းတွင် အကယ်၍ သူ စာပြန်လိုက်ပါက၊စကားများများဆိုမိလိုက်ပါက အခြားသူအတွက် အမျိုးမျိုးထင်စရာဖြစ်မည်စိုး၍ စာပြန်သည့်အချိန်တိုင်း သူ သတိထားလေ့ရှိလာခြင်းဖြစ်သည်။
သို့သော် ကျူးယန်ချီ သတိပေးပြောပြလာခဲ့သည်မှာ တစ်ဖက်လူ ရွှီကျစ်က သူ ထွက်သွားတော့မည့်အချိန်ကို အခုကတည်းကနေသားကျအောင်နေနှင့်နေသည့်အကြောင်းပေ : 'မင်းကသာ အရူးလိုလိုနဲ့ သူ လာရှာမယ့်အချိန်ကိုစောင့်နေ ၊ သူများက မင်းဆီထပ်လာတော့မှာမဟုတ်ဘူး ၊ မင်းကပဲ မိန်းမသားလေးလိုလိုလုပ်နေလိုက်'
ထိုရက်များအတွင်း ချန်လုကျိုးမှာ နေ့မရွေးညမရွေး ရုပ်ရှင်ဇာတ်ကားကြည့်နေခဲ့သည့်အပြင် ညဘက်ရောက်တိုင်း ကျူးယန်ချီ၊ကျန်းချန်တို့နှင့် ပုရစ်ကြော်ထွက်စားဖြစ်ခဲ့သေးသည်။ ဤရက်တွေထဲ ညလယ်စာ အစားများလွန်းခဲ့ခြင်းကြောင့်လားပင်မသိတော့ ၊ လမ်းကြားထဲမှ ပိုးကောင်အော်သံများ သိသိသာသာအားဖျော့သွားခဲ့ပြီး ညအချိန်ဟာ လုံးလုံးလျားလျားတိတ်ဆိတ်ခြောက်ကပ်လွန်း၍ အပေါ်ထပ်မှအသံလေးတစ်ခုကြောင့်ပင် သူ အအိပ်ဆတ်နေရတော့၏။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~