သီးသန့်ငှားထားသည့်တက္ကစီအသေးလေးဖြစ်သောကြောင့် ကားတစ်စင်းလုံးတွင် ခရီးသည်ဟူ၍ သူတို့သုံးယောက်တည်းသာ။ ဖုန်ကျင့်က မက်ဆေ့သံများ တတီတီတတောင်တောင်မြည်နေသည့်အလယ် ၊ အနှီနှစ်ယောက်သား Wechat မက်ဆေ့ အသည်းအသန်ပို့နေကြသည်ကိုကြည့်ရင်း သူ့အကြောင်းတီးတိုးမက်ဆေ့ပို့နေမှန်း အရူးပင်ခန့်မှန်းနိုင်ချေသည်။ ကြည့်ရသည်မှာ စကားကောင်းတော့မဖြစ်နိုင်လောက် ၊ မဟုတ်ပါက သူ့အရှေ့၌ ပေါ်တင်မပြောရဲစရာအကြောင်း မရှိသည်မဟုတ်လား။
ဖုန်ကျင့်သည် ချိုက်ယင်းယင်းနှင့် အင်တာနက်ပေါ်၌ စကားပြောခဲ့ဖူးကြသည်ဖြစ်ရာ ရင်းနှီးသည်ဟုလည်း သတ်မှတ်၍ရသောကြောင့် သည်အတိုင်းတိုက်ရိုက်ပင် စကားဆိုလိုက်သည်။
"ချိုက်ယင်းယင်း ၊ ကျွန်တော့်ကို ဒီကညီမလေးလှလှလေးနဲ့ မမိတ်ဆက်ပေးတော့ဘူးလား"
ရွှီကျစ်၏ရုပ်ရည်မှာ ထင်ပေါ်လွန်းသည်လည်းမဟုတ်။ အသားဖြူဖြူ ၊ သိမ်သိမ်မွေ့မွေ့ဟန်မျိုးလေးသာရှိပြီး လူအုပ်ကြီးထဲလှမ်းကြည့်မိလျှင်တော့ တစ်ချက်လေးမြင်ရုံဖြင့် နာမည်ပြေးမေးချင်မိလောက်မည်ဖြစ်၏။ မထင်ပေါ်စေသည့်တစ်ခုတည်းသောအချက်မှာကား မျက်နှာကျအချိုးအစားဟုပင်ဆိုရမည်။ ဘဲဥပုံစံမျက်နှာကျထက်တွင် မျက်ခုံးများကကြည်လင်နေပြီး ပါးမို့လေးနှစ်ဖက်မှာလည်း သုံးမျက်နှာရှုထောင့်လုံးမှကြည့်လျှင်တောင် ထင်းထွက်နေ၏။ ပြုံးရယ်လိုက်သည့်အခါမျိုးတွင် ချောမောသည်ထက် ချစ်စရာကောင်းသည့်ဘက်သို့ပိုရောက်ပြီး အလွန်အမင်းကာကွယ်ပေးချင်တတ်သည့်ယောက်ျားသားများအတွက် 'ဘေးအိမ်မှညီမလေး'ကဲ့သို့ပုံစံမျိုးပင် ဖြစ်တော့သည်။
"အင်း ၊ ငါ့နာမည်က ရွှီကျစ်"
ရွှီကျစ်က ကိုယ်တိုင်စကားဆိုလိုက်ပြီး အခြားသူများမှ သူမအား 'ညီမလေး'ဟု ခေါ်ဝေါ်ခြင်းကိုလည်း မနှစ်သက်ပါပေ။
"နှစ်ဦးနှစ်ယောက်ဆိုတဲ့ 'ရွှီ' ၊ ဇီဇဝါပန်းဆိုတဲ့ 'ကျစ်' ၊ ငါက ဇာတ်ညွှန်းရေးဖို့တာဝန်ယူထားတဲ့သူ"
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~