ဧည့်ခန်းထဲတွင် ယောက်ျားလေးတစ်စုမှာ ကော်ဇောခင်းထက်လှဲအိပ်နေကြပြီး ကျူးယန်ချီတစ်ယောက်က တတွတ်တွတ်နှင့် တစ်ကိုယ်တည်းရေရွတ်စကားဆိုနေသေးသည်။ ကူယန်သည်တော့ ဆိုဖာပေါ်၌ တစ်ယောက်တည်းထိုင်၍ စီးကရက်သောက်နေရင်း သာ့ကျွမ့်၏တစ်ဖက်သတ်အချစ်သီချင်းကို တိတ်တိတ်ဆိတ်ဆိတ်နားထောင်နေသည်။
နှစ်ယောက်သားက အိပ်ခန်းအတွင်း အနမ်းတို့ဖလှယ်နေကြသည့်အချိန်တွင် ကူယန်က တစ်စုံတစ်ရာကိုခံစားမိသွား၍လားမသိ Wechat မက်ဆေ့တစ်စောင်ပို့လာ၏။
GuGu : [ ချန်လုကျိုး ၊ ငါ ပြန်တော့မလို့ နင် ငါ့ကို လိုက်မပို့တော့ဘူးလား ၊ နှစ်နာရီတောင်ရှိနေပြီ ]
သိပ်မကြာလိုက်ပါဘဲနှင့် အိပ်ခန်းတံခါးပွင့်လာပြီး ထိုနှစ်ယောက်သား အတူတူထွက်လာသည်ကိုမြင်လိုက်ရသည့်အခါတွင်တော့ ကူယန်၏စိတ်ထဲ ဖော်ပြရခက်ခဲလွန်းသည့်မသက်မသာဖြစ်မှုများ ဖြစ်တည်လာရတော့သည်။ တစ်ညလုံး စိုးထိတ်တုန်လှုပ်နေခဲ့ရသောနှလုံးသားအား ကျောက်တုံးကြီးတစ်လုံးနှင့် ခပ်ပြင်းပြင်းပစ်ပေါက်ခံလိုက်ရသည့်အတိုင်းပေ။ စီးကရက်ကိုင်ထားခဲ့သည့်လက်ချောင်းသွယ်သွယ်တို့မှာလည်း မသိမသာတုန်ယင်လာရခြင်းကြောင့် စီးကရက်မီးပြာများပင် သူမ၏ခြေထောက်ပေါ်သို့ မတော်တဆပြုတ်ကျကုန်၍ အသားရောင်နုနုခြေအိတ်ထက်၌ အပေါက်တစ်ပေါက်ဖြစ်သွားခဲ့ရသည်အထိတိုင်အောင် သူမဟာ ဘာကိုမှသတိမထားနိုင်တော့ဘဲ ချန်လုကျိုးကိုသာ ငေးစိုက်ကြည့်နေမိခဲ့၏။
ချန်လုကျိုးက ဧည့်ခန်းစားပွဲနားထိလျှောက်လာပြီး ရေသန့်ဘူးအသစ်တစ်ဘူးကိုဖွင့်ဖောက်၍ အနောက်ဘက်မှပါလာသည့် ရွှီကျစ်ထံသို့ လှမ်းပေးလိုက်သည်။ သူဟာ ရွှီကျစ်၏အရှေ့တွင် တည့်တည့်ပိတ်ရပ်နေပြီး ကူယန်ထံသို့ လှည့်ကြည့်၍ ;
"ငါ တက္ကစီခေါ်ပေးရမလား"
တကယ်တမ်း၌ ချန်လုကျိုးဟာ အတော်လေးဆက်ဆံရေးကောင်းမွန်ပြီး တစ်ဖက်သားအပေါ်လည်း မလေးမစားမပြု ၊ အမြဲယဥ်ကျေးပေးနေတတ်သည့်လူမျိုးပင်။ ထို့အတွက်ကြောင့်ပင် ကူယန်၏စိတ်ထဲ ချန်လုကျိုးက ဆွဲဆောင်မှုရှိလွန်းနေခြင်းဖြစ်၏။ တစ်ပါးသူအားစိုက်ကြည့်သည့်အခါတွင် သူ့မျက်ခုံးတန်းများဟာ ဓါးတစ်လက်သဖွယ်စူးရှနေတတ်ပြီး ဥာဏ်ကောင်း၍ဖောက်ထွင်းမြင်တတ်သည့်နေရာတွင်လည်း ဝေဝါးတွေဝေနေသည်မျိုးတစ်စက်မှမရှိ ၊ ထို့ကြောင့်ပင် ချန်လုကျိုးရှေ့၌ လှည့်ကွက်အသေးစားများထုတ်မသုံးရဲရခြင်းဖြစ်၏။ မဟုတ်ပါက သူဟာ တစ်ပါးသူအား မျက်နှာပေးညှာတာနေမည်မဟုတ်ဘဲ တည့်တိုးဆန်ဆန်ပြုမူပြောဆိုပစ်တတ်သည်။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~