ရွှီကျစ်တစ်ယောက် လက်ကိုင်ဖုန်းကြည့်ရင်းပြုံးနေမိဆဲမှာပင် ခြံဝန်းထဲ၌ ကားရေဆေးနေသည့် လောင်ရွှီက ရေသုတ်ဝတ်တစ်ခုကိုယူ၍ ရွှီကျစ်ထံ လှမ်းပစ်လာ၏။
"ဖေဖေ့ကို ကားကူသုတ်ပေး"
ထိုအခါ လက်ကိုင်ဖုန်းကို အိတ်ကပ်ထဲသို့ဆောင့်ထောင့်ထည့်ပြီး စိတ်မပါလက်မပါနှင့် ကားပြတင်းမှန်ကိုပွတ်ရင်း အမေးရှိလိုက်သည်။
"ဖေဖေ တမင်သက်သက်လုပ်နေတာမလား"
တစ်ခေါင်းလုံးချွေးသံတရဲရဲနှင့်ရွှီကွမ်းကျိသည် ရေပိုက်ကိုပိတ် ၊ ဆပ်ပြာမြှုပ်များဖြန်းလိုက်ရင်း အေးတိအေးစက်စကားဆို၏။
"အဲ့ဒီကောင်လေးကိုက မရိုးသားတာ"
ရွှီကျစ်သည်လည်း ပွတ်တိုက်ဆေးကြောကူရင်း အလျင်အမြန်ပင်ခွန်းတုံ့ပြန်လိုက်သည်။
"သူက ဖေဖေ လက်မခံပေးမှာကိုကြောက်နေတာလေ"
ရွှီကွမ်းကျိက ကားတံခါးကိုဖွင့် ၊ ခြေနင်းပြားကိုထုတ်ကာ အသေအချာခါရင်း စကားဆက်ဆိုလာသည်။
"နန်းနန်း.....သမီး ရည်းစားထားတာကို ဖေဖေ ကန့်ကွက်နေတာမဟုတ်ဘူးနော် ၊ ဒါပေမယ့် ရည်းစားကောင်လေးပဲဖြစ်စေ အိမ်ထောင်ဖက်အမျိုးသားပဲဖြစ်စေ သမီးတို့နှစ်ယောက်ကြားထဲမှာ အချင်းချင်းသဘောကျနှစ်သက်နေရမယ်ဆိုတဲ့အချက်က အခြေခံတစ်ခုအနေနဲ့ရှိကိုရှိရမယ့်အရာ ၊ ဖေဖေ ဆိုလိုချင်တာကို သဘောပေါက်လား"
ရွှီကျစ်က စဥ်းစဥ်းစားစားငြိမ်သွားပြီး ;
"နားလည်သလိုလိုတော့ရှိတယ်"
"သမီးတို့က အခုချိန်မှာ အသက်ငယ်ကြပါသေးတယ် ၊ ချစ်သူသက်တမ်းကြာလာတာနဲ့အမျှ သဘောကျနှစ်သက်မှုဆိုတဲ့အရာက ပြောင်းလဲသွားတတ်တယ် ၊ အကယ်၍ ဒီယောက်ျားလေးက တာဝန်ယူတတ်ရင်တော့ကောင်းတာပေါ့ ၊ တာဝန်ယူစိတ်မရှိတဲ့ယောက်ျားတစ်ယောက်သာဆိုရင် ဖောက်ပြားသွားတာလည်းဖြစ်နိုင်မယ် လက်ထပ်ယူဖို့အချိန်ဆွဲရင်ဆွဲမယ် လက်မထပ်ချင်တာလည်းဖြစ်ရင်ဖြစ်နိုင်ပြီးတော့ သူတစ်ပါးရဲ့ငယ်ရွယ်မှုကို အလဟဿဖြုန်းတီးနေလိမ့်မယ်....."
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~