အင်တာဗျူးလုပ်ရမည့်နေ့မှာ ကြာသပတေးနေ့ ၊ ရွှီကျစ်က အဘွားအိမ်မှပြန်ရောက်သည်နှင့် အင်တာဗျူးအညွှန်းကို စတင်ကျက်မှတ်တော့၏။ သို့သော် လောင်ရွှီ၏ကင်မရာကြီးနှင့် မျက်နှာချင်းဆိုင်လိုက်ရသည့်အခါတွင်တော့ စကားပြောသည့်နေရာ၌ ချိတုံချတုံဖြစ်သွားခဲ့ရသည်။ တပြိုင်နက်တည်းမှာလည်း လူတွေဟာ အသက်ကြီးလာလေ ရှက်တတ်လာကြလေမှန်း တွေးလိုက်မိသည်။ ငယ်စဥ်အခါ အတန်းခေါင်းဆောင်ရွေးချယ်သည့်အချိန်ကဆိုလျှင် သူမဟာ လူပေါင်းများစွာအရှေ့၌ 'ကျွန်မရဲ့အလှတရားကို သူငယ်ချင်းတို့ကြည့်ဖို့အတွက် ထိန်းသိမ်းထားပေးနိုင်တာမလို့ ကျွန်မကို ရွေးချယ်ကြမယ်လို့မျှော်လင့်ပါတယ်' ဆိုသော စကားမျိုးပင်ပြောရဲခဲ့သည်မဟုတ်လား။
ရွှီကွမ်းကျိသည် ဆိုဖာပေါ်ထိုင်နေရင်း ကင်မရာကိုပိတ်၍ တလေးတနက်စကားဆိုလိုက်သည်။
"နန်းနန်း....လူဆိုတာကလေ သူတို့ အလေးထားပြီးဂရုစိုက်ရမယ့်အရာတစ်ခုရှိလာတာနဲ့ အရှက်သိက္ခာကို ဂရုစိုက်လာတော့တာပဲ ၊ သမီးငယ်ငယ်တန်းက ပြောရဲဆိုရဲခဲ့တယ်ဆိုတာကလည်း သမီးမှာ အလေးထားဂရုစိုက်စရာဘာမှမရှိခဲ့လို့လေ"
ရွှီကျစ်က တီဗွီရှေ့တွင်မတ်တပ်ရပ်နေပြီး ဤစကားတစ်ခွန်းအား သိပ်လက်ခံချင်ပေ။
"အဲ့လိုတော့လည်းမဟုတ်ပါဘူး ၊ သမီးငယ်ငယ်တုန်းက ဖေဖေနဲ့မေမေကို အရမ်းအလေးထားခဲ့တာပါ ၊ ပြီးတော့ သမီးရဲ့ရွှေငါးလေးကိုရော...."
ရွှီကျစ် ကလေးအရွယ်တုန်းက ရွှေငါးလေးတစ်ကောင်မွေးဖူးပြီး ကံမကောင်းစွာဖြင့် ရွှေငါးလေးက ရက်ပိုင်းနှင့်တင် ဗိုက်ဖြူလေးလှန်သွားခဲ့ရသည်။ ထိုအချိန်တုန်းက ပထမဆုံးငါးမွေးဖူးခြင်းဖြစ်ရာ ရွှေငါးတစ်ကောင်အား နေ့တိုင်းအစာကျွေးရန်မလိုအပ်မှန်း သူမ မသိခဲ့ ၊ မည်သို့မည်ပုံမွေးမြူရမှန်းလည်းမသိသောကြောင့် တစ်နေ့လျှင် အစာသုံးခါကျွေးမိခဲ့သည်။
ရွှီကွမ်းကျိက စကားဆိုလာသည်။
"အဲ့ဒါဘာဖြစ်လို့လဲဆိုတော့ သမီး ဘာတွေပဲလုပ်လာပါစေ ဖေဖေနဲ့မေမေက သမီးကိုချစ်ပြီးကာကွယ်ပေးနေမှာမှန်း သိနေတာကြောင့်လေ ၊ ရွှေငါးလေးလည်း အတူတူပဲ ၊ ဒါပေမယ့် တချို့သောခံစားချက်တွေကျတော့ မတူဘူး ၊ သမီး ကောင်းကောင်းမွန်မွန်မလုပ်နိုင်ခဲ့ရင် တစ်ဖက်လူက သမီးကို သဘောမကျတော့တာမျိုးဖြစ်သွားနိုင်တယ်"
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~