ချန်လုကျိုးက သုံးလေးပုံဆက်တိုက်တစ်ခါတည်းရိုက်ယူလိုက်ပြီး တစ်ပုံချင်းစီတိုင်းကိုလည်း လိုချင်သည့်အနေအထားမျိုးအထိ ဖမ်းယူနိုင်ခဲ့သည်။ သူ ခေါင်းငုံ့ထားလျက်ဖြင့် စစ်ဆေးကြည့်လိုက်လျှင် ရိုက်ကူးရမိထားသည့်ဓါတ်ပုံတို့မှာ တစ်ဆက်တည်းကြည့်လိုက်သည့်အခါတွင်တော့ animation တစ်ခုသဖွယ် အသက်ဝင်နေလေသည်။ ကြယ်ကြွေတို့နှင့်အတူ 'သူမ'နောက်လှည့်ကြည့်လာခဲ့သည့်အခိုက်အတန့်လေးဟာလည်း သူ့လက်ဖဝါးထက်၌တင်၍ အကြိမ်ကြိမ်အခါအခါ ထပ်တလဲလဲရွှေ့ကြည့်နေမိတော့သည်။
ရွှီကျစ်ဟာ ဆံပင်တို့အား ခပ်မြင့်မြင့်မြှောက်စီးထားပြီး ရှေ့ဆံမြိတ်လေးတချို့မှာ ကြယ်တာယာကောင်းကင်ကြီးအောက်၌ ပွယောင်းယောင်းလွှင့်နေသေးသည်။ အရှေ့ဆုံးတစ်ပုံမှာ အနည်းငယ်ဝါးသလိုရှိပါသော်လည်း ထူးဆန်းပွေလီစွာဖြင့်ပံ့ပိုးပေးထားသော မှုန်ဝေဝေပတ်ဝန်းကျင်ကြောင့် မည်သည့်အရာကိုမှ ပြုပြင်တည်းဖြတ်နေစရာမလိုတော့ချေ။
အနောက်ဘက်တွင်ရှိသောကောင်းကင်ပြင်ကြီးထက်တွင် တဖျက်ဖျက်တောက်ပနေသည့်ကြယ်ရောင်စုံများ အပြည့်ထွန်းလင်းနေပြီး ကြယ်ရောင်စုံကောင်းကင်ကြီးအောက်မှ ကောင်မလေး၏မျက်နှာမှာ ခပ်တည်တည်လေးဖြစ်နေပါသည့်တိုင် မျက်ဝန်းများထဲတွင်တော့ တွေ့ရခဲလွန်းလှသည့်နွေးထွေးသိမ်မွေ့မှုများရှိနေခဲ့သည်။
အတော်လေး ဓါတ်ပုံစားသည်ပေ။ ရွှီကျစ်၏မျက်နှာအစိတ်အပိုင်းနှင့်အချိုးအကျတို့မှာ သိမ်မွေ့ပြီးကြည်လင်သည့်ဘက်သို့သွားပြီး စူးရှနေတတ်သည့်မျက်ဝန်းတစ်စုံမှလွဲလျှင် သူမ၏ရုပ်ရည်သွင်ပြင်ဟာ စိတ်ဆတ်တတ်သည့်အမျိုးအစားထဲတွင်မပါ။ တစ်ချက်ကြည့်ရုံဖြင့် သိမ်မွေ့ပြီးစကားနားထောင်တတ်သောညီမလေးတစ်ယောက်နှင့်ပင် တူနေလေသည်ဖြစ်ရာ ကျူးယန်ချီမှ သူမအား 'ညီမလေး'ဟုခေါ်ဝေါ်တတ်လေ့ရှိသည်မှာ အဆန်းမဟုတ်ရတော့ချေ။
သို့သော်လည်း သူမဟာ သာမန်ညီမလေးများထက် ပို၍မိုက်နေပြန်ပြီး အရယ်အပြုံးနည်းလှသလို ဒေါသထွက်သည်မျိုးလည်းမရှိ။ သူမအပေါ် အော်ငေါက်နေလျှင်တောင်မှ မရိပ်မိ ၊ အချိန်တိုင်းလိုလို ခံစားချက်မဲ့နေတတ်သည့်အမျိုးအစားပင် ဖြစ်နေတော့သည်။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~