ချန်လုကျိုး ခပ်ပြုံးပြုံးရယ်ရင်း လီခယ်၏အဆောင်ခန်းဆီသို့ရောက်လာခဲ့သည်။ အဆောင်ခန်းထဲမှသူငယ်ချင်းနှစ်ယောက်သည် ယခုအပတ်တွင် အိမ်ပြန်သွားကြခြင်းဖြစ်ပြီး ကျန်တစ်ယောက်က ညလုံးပေါက်ဂိမ်းကစားဦးမည်ဖြစ်၍ Digital modeling အတွက် သုံးယောက်သားဟာ ယနေ့ညအတွက် စာလုပ်ကြမည့်နေရာပြောင်းဖြစ်သွားခဲ့သည်။ ချန်လုကျိုး အထဲဝင်လာသည့်အချိန်တွင် အခန်းထဲ၌ လီခယ်ရှိမနေ ၊ ဝမ်ယွဲ့သည်တော့ ဂိမ်းကစားနေသော လီခယ်အခန်းဖော်၏အနောက်ဘက်တွင်ရပ်၌ စိတ်ဝင်တစားလိုက်ကြည့်နေ၏။
လက်တော့ပ်အား စားပွဲပေါ်တင်လိုက်ပြီး ချန်လုကျိုး ထိုင်ခုံဆွဲထုတ်၍ဝင်ထိုင်ကာ ပါးစပ်ထဲတွင်လည်း နွားနို့ဘီစကစ်အချောင်းရှည်တစ်ခုအားကိုက်ထားသေး၏။ ရုပ်ရှင်ကြည့်ပြီးအပြန်လမ်းတွင် ရွှီကျစ်က သူ အရမ်းငိုထားခဲ့သည်ကိုကြည့်ပြီး စတိုးဆိုင်တစ်ခုထဲဝင်၍ သရေစာမုန့်ထုပ်မျိုးစုံဝယ်ပေးလာခြင်း။ တကယ်ကို ကလေးသူငယ်ချော့နည်းအတိုင်းချော့ခဲ့ခြင်းပါပေ။
လီခယ် ရေချိုးပြီးပြန်ရောက်လာသည့်အချိန်တွင် အဆောင်မီးများအားလုံးမှိတ်ပြီးနေပြီဖြစ်ပြီး လက်တော့ပ်များမှအလင်းပြန်လာသည့်အလင်းဖျော့ဖျော့လေးများသာလျှင်ရှိသည်။ သို့သည့်တိုင်အောင် လီခယ်က စားပွဲပေါ်တင်ထားသည့်ဘီစကစ်အချောင်းများကို ဖြတ်ခနဲလှမ်းမြင်လိုက်၏။ ချန်လုကျိုးသည်လည်း လူမမြင်အောင်ဖွက်ထားလိုခြင်းမရှိ ၊ နဂိုကတည်းက အဆာပြေစားရရန်အတွက်ယူလာခြင်းပေ။ လီခယ်က ဆေးလိပ်သောက်ရင်းနှင့် ;
"ဘာလို့ ဒါတွေဝယ်လာတာလဲ ၊ ကလေးစားတဲ့ဟာတွေမဟုတ်ဘူးလား"
ချန်လုကျိုးက ထိုင်ခုံနောက်သို့မှီချထားပြီး ထိုင်ခုံရှေ့ခြေနှစ်ချောင်းကိုလည်း အသာလေးမြှောက်၍နှဲ့နေရင်း အနည်းငယ်စိတ်လွတ်ကိုယ်လွတ်ဖြစ်နေသည့်အမူအရာမျိုးနှင့် လက်တော့ပ်ကိုကြည့်၍ ဖြေးဖြေးချင်းသာစကားဆိုလာ၏။
"ရွှီကျစ်ဝယ်ပေးထားတာ"
"မင်းကို အရမ်းအလိုလိုက်ထားတော့တာပဲဟေ့"
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~