မှောင်မည်းနေသည့်ညဘက်ကြီးထဲ ကားမောင်းသွားလာရသည်မှာ စိတ်လှုပ်ရှားစရာတစ်ခုပင်။ အထူးသဖြင့် တောင်ပတ်လမ်းတစ်သွယ် ၊ မည်းမှောင်နေသည့်ပတ်ဝန်းကျင်တစ်ခွင် ၊ ဖျော့ဖျော့လေးထိန်သာနေသည့်လရောင်အောက်ရှိ ကားမီးရောင်လေးမှာလည်း တတ်နိုင်သမျှအကွာအဝေးထိသာ အလင်းပြပေးနေသည့်အခိုက်အတန့်မျိုး။ တောင်ပတ်လမ်းမှာ ခရီးပေါက်လာသည်နှင့်အမျှ အသွားလမ်းကျဥ်းမြောင်းလာ၏။ တောကြောင်ရိုင်းတစ်ကောင်ဖြတ်ပြေးသွားသည်ကအစ လန့်ဖြန့်သွားစေနိုင်လောက်မည့်အနေအထားမှာ စွန့်စားခန်းဖွင့်သည့်ခရီးတစ်ခုထက်ပင် ပို၍စိတ်လှုပ်ရှားစရာကောင်းနေတော့သည်။
ချန်လုကျိုးအတွက်လည်း ပထမဆုံးအကြိမ် ညဘက်ကားမောင်းရခြင်းမျိုးဖြစ်လောက်မည်ဖြစ်လေရာ ကားအတွင်းထဲမှလူများမှာ အလွန်တရာကိုမှခြောက်ခြားတုန်လှုပ်နေကြတော့၏။ ကျူးယန်ချီနှင့်ချိုက်ယင်းယင်းတို့မှာ ကားအမိုးလက်ဆွဲများကို ကိုယ်စီကိုင်ထားကြလေပြီး သုံးယောက်သားအနက် ရွှီကျစ်တစ်ယောက်ကသာ အတည်ငြိမ်ဆုံးလောက်သွားကျမည်။
နဂိုက သိပ်ကြောက်စရာမကောင်းသည့်အနေအထားမှာ ကျူးယန်ချီနှင့်ချိုက်ယင်းယင်းတို့၏ လေထုအခြေအနေပိုဆိုးအောင်ပါဝင်အားဖြည့်မှုတစ်ခုအဖြစ် လမ်းချိုင့်တစ်ခုကြုံတိုင်း ထ,ထအော်နေသည့်အခါတွင်တော့ ရွှီကျစ် သည်းမခံနိုင်ချေတော့ပေ။
"ဒီလိုမှမဟုတ်လည်း ချန်လုကျိုး နင် ဖယ်လိုက် ၊ ငါ မောင်းပေးမယ်"
ကျူးယန်ချီနှင့်ချိုက်ယင်းယင်းမှာ ကြောက်လန့်လွန်း၍ တပြိုင်တည်းပင် အသံထွက်မိကြတော့သည်။
"မဖြစ်ဘူး! မင်းမှာ လိုင်စင်လည်းမရှိဘဲနဲ့!!"
ထိုအခါ ရွှီကျစ်က အနှီနှစ်ယောက်အား သေချာစိုက်ကြည့်လိုက်၍ ;
"ဒါဆို နင်တို့နှစ်ယောက် တိတ်တိတ်နေ ၊ အရမ်းဆူတာပဲ"
ချန်လုကျိုးက လမ်းပတ်တစ်ခုကိုကွေ့ရင်း မနှေးမမြန်စကားဆိုလာ၏။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~