ချိုက်ယင်းယင်းတစ်ယောက်မှာ အကြောင်းစုံပြန်ကြားရပြီးနောက် အိပ်ရာပေါ်လှိမ့်၍ အားရပါးရရယ်ပါတော့သည်။
"ချန်လုကျိုးက ဘယ်လိုနတ်သားလေးများလဲမသိဘူးနော်"
ရွှီကျစ်သည်လည်း ရယ်ချင်နေသည့်စိတ်ကိုထိန်း၍ တောင်တက်ဘွတ်ဖိနပ်ကိုရှာရင်း စကားဆိုလိုက်သည်။
"နောက်ကျရင် သူ့ကို မူးအောင်တိုက်ပြီး တစ်ညလုံးဘာတွေများပြောမလဲလို့ စမ်းကြည့်ရအောင်"
"ကောင်းလိုက်တဲ့အကြံ"
ချိုက်ယင်းယင်းက အနားသို့မှောက်လျက်သားဖြင့် တိုးကပ်လာပြီး ;
"ဒါပေမယ့် ငါ အရမ်းသိချင်နေမိတာရှိသေးတယ် ၊ နင် ပြောကြည့်ကြည့်....ချန်လုကျိုးလိုယောက်ျားလေးမျိုးက ဘယ်လိုပုံစံမိန်းကလေးကို သဘောကျမယ်လို့ထင်လဲ ၊ ငါ သူ့ကို ပထမဆုံးတွေ့ဖူးတဲ့အချိန်တုန်းကဆိုရင် ဒီကောင်လေးက ဘဝင်မြင့်ပြီး အရောတဝင်လုပ်ဖို့မလွယ်လောက်ဘူးလို့ထင်ခဲ့တာ ၊ အမှန်တိုင်းပြောပြမယ်ကွာ....အစတုန်းက ငါ သူ့ကို နည်းနည်းလေးတော့ မကောင်းမြင်မိတယ် ၊ သူ့ကိုယ်သူ အရမ်းချောတယ်လို့လည်း မြင်နေတဲ့အပြင်ကိုမှ မိန်းကလေးတွေနဲ့လည်း အရောမဝင်ချင်တဲ့လူလေ ၊ ဒါပေမယ့် အခုချိန်မှာကျတော့ သူကလေ မိဘတွေလက်ထဲမှာ ဖူးဖူးမှုတ်အလိုလိုက်ခံထားရပြီး ကြီးပြင်းလာတဲ့သူမျိုးလို့ ပိုထင်လာမိတယ် ၊ လောကဓံရိုက်ချက်တွေကို မခံစားဖူးသေးတဲ့ ကြည်ကြည်လင်လင်အဖြူထည်လိုမျိုး ၊ စကားပြောတဲ့နေရာမှာ မာနကြီးနေတာလေးရောပေါ့"
"အတွက်အချက်တွေ အရမ်းကောင်းနေပါလားနော် ချိုက်ယင်းယင်း"
ရွှီကျစ်က နောက်လှည့်မကြည့်ဘဲ ဆက်၍စကားဆိုလိုက်သည်။
"ကြည့်ပါလား....အပြင်လေးဘာလေးထွက်လည်လိုက်တော့ စိတ်အခြေအနေလည်းကောင်းလာပြီမလား ၊ ချန်လုကျိုးတောင်မှ တိရှောင်းထက် ပိုပြီးစိတ်ဝင်စားစရာကောင်းလာတယ်မလား"
ချိုက်ယင်းယင်း ;
"အဲ့လိုတော့မဟုတ်သေးဘူး ၊ ငါက အခုချိန်ထိ တိရှောင်းအပေါ်မှာ ခံစားချက်တွေရှိနေသေးတုန်းပဲ ၊ အခုချိန်မှာ အသက်ရှင်နေရတဲ့ဦးတည်ချက်ကလည်း တိရှောင်း နောင်တရအောင်လုပ်ဖို့ ၊ အဲ့ကောင်ကို သူ့ကိုယ်သူ ဘယ်လောက်တုံးအခဲ့ကြောင်းသိအောင် လုပ်ပေးဖို့! ၊ ဒါနဲ့ ငါတို့လေးယောက်က ထူးတော့ထူးဆန်းကြသားနော် ၊ နှစ်ယောက်တစ်တွဲစီ Wechat အကောင့်ယူထားကြတာ"
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~