နိုင်ငံအတွင်းရှိ ထိပ်တန်းတက္ကသိုလ်တစ်ခုဖြစ်သည့်အလျောက် မနက်ခြောက်နာရီအချိန်တွင်ပင် ကန်တင်းထဲ၌ မနက်စာလာစားကြသည့်လူများမနည်းလှ ၊ ကန်တင်းတံခါးဝကြီးထံမှလည်း အဆက်မပြတ် လူများဝင်လာနေကြသည့်အပြင် အထဲရောက်လာကြသည်နှင့် ထောင့်ဝိုင်းတစ်နေရာတွင်ထိုင်နေသော အစ်ကိုချောလေးနှင့်အလှလေးတို့တစ်တွဲအား ချက်ချင်းအာရုံစိုက်မိသွားကြသည်။ မနေနိုင်အောင် သက်ပြင်းချမိပြန်သည်မှာလည်း ; A တက္ကသိုလ်ကတော့ တကယ်ကို A တက္ကသိုလ်ပါပဲ ၊ စာသင်ယူဖို့အတွက် အိပ်ရာစောစောထကြတာကထားပါတော့ ၊ ရည်းစားထားတဲ့ကိစ္စမှာပါ ဒီလောက်ကြီးကြိုးစားကြတယ်လား ၊ အစောကြီးထပြီးတော့တောင်လေ.....
ရွှီကျစ်က ချန်လုကျိုး၏စကားကိုမတုံ့ပြန်ဘဲ ခေါင်းငုံ့၍ ဟင်းရည်တစ်ဇွန်းသောက်လိုက်၏။
"အင်း ၊ စကားနှစ်ခွန်းပြောပြီးပြီဆိုတော့ အခုကစပြီး နင် ပါးစပ်ပိတ်ထားလို့ရပြီ"
ချန်လုကျိုးက တကယ်ကို ပါးစပ်ဖွင့်မလာတော့ဘဲ ထိုအတိုင်းသာထိုင်၍ ရွှီကျစ်၏ပန်းကန်ထဲမှ ကြက်ဥကိုမေးဆတ်ပြပြီးစားခိုင်းသည့်အမူအရာမျိုးလုပ်ပြလာသည်။
"နင်ကျတော့ နွားနို့ပဲသောက်မှာလား"
ရွှီကျစ်က ခပ်တည်တည်ဖြင့်လှမ်းကြည့်လာ၍ ;
"စကားတစ်ခွန်းထပ်ပြောခွင့်ပေးမယ်"
ချန်လုကျိုးမှာ နွားနို့တစ်ငုံသောက်လိုက်ရင်း ပြုံးပြုံးလေးနှင့်စကားဆိုလာ၏။
"ငါ စားခဲ့ပြီးပြီ ၊ မနက်လေးနာရီကတည်းက လာရပ်စောင့်နေဖို့အတွက် မင်းအထင်မှာရော ဗိုက်ဆာနေရင်စောင့်နိုင်မယ်ထင်မိလို့လား ၊ တခြားဟာတွေအားလုံးအဆင်ပြေနိုင်ပေမယ့် ငါက တကယ်အဆာခံလို့မရဘူး ၊ ဗိုက်ဆာလာတာနဲ့ စကားပြောရင်အပေါက်ဆိုးတတ်တယ်"
ချန်လုကျိုးမှာ လေးနာရီတွင်လာစောင့်နိုင်ဖို့အရေးအတွက် မနက်သုံးနာရီခွဲကတည်းက အိပ်ရာထလာခဲ့ပြီး အခန်းဖော်များအနှောင့်အယှက်မဖြစ်စေရန် အဆတစ်ရာနှေးကွေး၍လှုပ်ရှားရသေး၏။ အရင်ကခြေဖျားထောက်၍သွားလာခဲ့ဖူးသမျှပင် ခြေဖျားထောက်ရသည့်အချိန် ပိုကြာခဲ့ပုံပါပေ။ ယမန်နေ့ကမှ လေယာဥ်ဖြင့်ရောက်လာခြင်းဖြစ်ပြီး ကျောင်းထဲသို့ရောက်သည်နှင့်လည်း ကျောင်းသားရေးရာဌာနသို့သွား၍ ကျောင်းသားကဒ်ပြုလုပ်ရင်းဖြင့် အချိန်ကုန်သွားခဲ့ရသေး၏။ ကျောင်းတွင်းကိစ္စများနှင့်စပ်လျဥ်းပြီးဆွေးနွေးလမ်းညွှန်ပေးသည့်သူမှာတော့ ဘွဲ့လွန်အတန်းမှ စီနီယာအစ်မတစ်ယောက်ဖြစ်ပြီး အသက်အရွယ်အားဖြင့်လည်းသိပ်မကွာလှ။ ချန်လုကျိုးမှာ အနောက်မှလိုက်သွားရင်း အခြားစီနီယာများနှင့်အတူ အတန်းထဲမှကော်မတီအဖွဲ့ဝင်များက ဘတ်စကတ်ဘောပြိုင်ပွဲအကြောင်း အစည်းအဝေးလုပ်နေကြသည့်အချိန်နှင့် ထိပ်တိုက်ကြုံလိုက်ရသေးသည်။ ထိုအခါ အရပ်မြင့်မြင့်၊ခန္ဓာကိုယ်တောင့်တောင့်၊ရုပ်ချောချော အစ်ကိုချောလေးတစ်ယောက် အထဲဝင်လာမိလိုက်သည်နှင့်တပြိုင်နက် အတန်းကော်မတီများ၏အကြည့်တို့ဟာ သူ့ထံသို့ စူးခနဲရောက်ချလာလေပြီး အသေရရအရှင်ရရ ဘတ်စကတ်ဘောအသင်းထဲဝင်ခိုင်းတော့၏။ ချန်လုကျိုးမှာ အချိန်မဖြုန်းချင်တော့သည့်အတွက် ဝင်ခွင့်လျှောက်လွှာဖြည့်ပေးလိုက်ရာ သိပ်မကြာခင်ကိုပင် Wechat အကောင့်ထဲသို့ Friend request များရောက်လာခဲ့ပြီး အားလုံးနီးပါးမှာလည်း အတန်းကော်မတီအဖွဲ့ဝင်ထဲမှမိန်းကလေးများပင်။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~