ရွှီကျစ်က တစ်ဖန်ပြန်လှည့်ပြီး စမ်းချောင်းလေးဘက်သို့သာ မျက်နှာမူလိုက်သည်။ ရေမျက်နှာပြင်ထက်မှ ရေစီးလှိုင်းငယ်လေးများဟာလည်း သူမ၏လက်ရှိစိတ်အခြေအနေနှင့်ပင် တူညီနေသယောင်ရှိ၏။
"ဒါပေမယ့် ငါ့အဖေက သိပ်ပြီးထောက်ခံချင်ပုံမရဘူး ၊ မိန်းကလေးတွေ ဗိသုကာပညာရှင်လုပ်ရင် အရမ်းပင်ပန်းလိမ့်မယ်လို့ သူ မြင်နေတာ ၊ ငါ့အမေကလည်း ဗိသုကာပညာရှင်ပဲလေ....တစ်ခါတစ်လေကျရင် လုပ်ငန်းခွင်နေရာအထိပါ အလုပ်ဆင်းရသေးတယ် ၊ ငါကကျတော့ လုပ်ငန်းခွင်ထဲအလုပ်ဆင်းရတာမျိုးကို အရမ်းသဘောကျတာ ၊ ကိုယ် ရေးဆွဲထားတဲ့ဒီဇိုင်းက တကယ့်မြင်ကွင်းတစ်ခုဖြစ်လာတာကို ကြည့်နေရတာမျိုးက ဘယ်လောက်တောင်မှစိတ်ကျေနပ်စရာကောင်းနေလိုက်မလဲ ဟုတ်တယ်မလား"
"ဒီမြို့မှာပဲနေဖို့စဥ်းစားထားတာကရော မင်းအဖေကြောင့်ပဲလား"
ရွှီကျစ်တစ်ယောက်က အဖေဖြစ်သူအပေါ် အားကိုးတွယ်တာလွန်းနေမှန်း ချန်လုကျိုး အတိုင်းအတာတစ်ခုထိ ခံစားမိလိုက်ရသည်။
ဤကဲ့သို့သောစကားများအား ရွှီကျစ်သည် ထန်ရွှီနှင့်ပင် တစ်ကြိမ်တစ်ခါမှမပြောဖြစ်ခဲ့ကြဖူးသည့်တိုင် အဘယ်ကြောင့်မှန်းမသိ ၊ ယနေ့ညတွင်တော့ ချန်လုကျိုးထံသို့ ပွင့်ပွင့်လင်းလင်းပြောပြချင်လာခဲ့သည်။
"အနည်းအများတော့ပါတာပေါ့ ၊ ငါက တစ်ဦးတည်းသောသမီးလေ ၊ ငါတို့မိသားစုဆွေမျိုးက အတော်စိတ်ရှုပ်ဖို့ကောင်းကြတဲ့လူတွေ....ငါ့အဖေကလည်း အားနာပြီးမငြင်းပယ်တတ်တဲ့လူစားမျိုး ၊ တစ်ခါကဆို ဆွေမျိုးတစ်ယောက်အတွက် အကြွေးအာမခံသွားလုပ်ပေးဖူးသေးတယ် ၊ အဲ့ဒီဆွေမျိုးလည်းသေရော တင်နေသမျှအကြွေးတွေအားလုံးကို သူကချည်းဆပ်ရတာ ၊ ပြီးတော့ ငါတို့ရှေ့မှာဆိုရင်လည်း ပိုက်ဆံအများကြီးရှိကြောင်းလုပ်ပြရတာကို ကြိုက်သေးတယ် ၊ လူတွေကိုလည်းကြောက်တတ်သေး ၊ သူများနဲ့လည်း ရန်မဖြစ်တတ်ဘူး ၊ ဆိုရှယ်မီဒီယာပေါ် ပို့စ်တင်တာတောင်မှမလုပ်ရဲဘူးတဲ့လေ ၊ ထပ်ပြီးပြောရမယ်ဆို အကယ်၍ ငါသာ အခြားဒေသတစ်ခုခုမှာကျောင်းသွားတက်မယ်ဆိုရင် အမျိုးမျိုးသောကုန်ကျစရိတ်တွေက ဒီမြို့မှာနေတာထက် ပိုပြီးတော့များမှာ ၊ အဲ့ဒါကြောင့်မလို့ ငါ့အမေ ဆုံးသွားပြီးကတည်းက ဒီအတွေးကိုမေ့ထားလိုက်တော့တာ ၊ ဒါပေမယ့် အဲ့ဒီနေ့က နင် ပြောခဲ့တဲ့စကားတွေကြောင့် ငါ အတွေးများလာမိတယ် ၊ ငါ တွေးကြည့်မိတာက ငါ ပိုကောင်းတဲ့ကျောင်းတစ်ခုခုကို ရွေးချယ်လိုက်ရမလားလို့ပေါ့"
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~