ရာသီတစ်ခုမှ နောက်ထပ်ရာသီတစ်ခုဆီသို့ အမြဲပြောင်းလဲကူးလူးနေကြမည်ဖြစ်သလို လူငယ်ဘဝဆိုသည်မှာလည်း အဆုံးသတ်သို့ရောက်လာရစမြဲ ၊ နွေရာသီတွင် စတင်ခဲ့သည့်တွေ့ဆုံမှုလေးတစ်ခုဟာလည်း နွေရာသီရက်များတွင်သာ အဆုံးသတ်သွားခဲ့ရသည်။
ကျူးယန်ချီသည် 'ပေကျင်း'သို့ တစ်လစောလျှင်စွာကြိုသွားနှင့်ခဲ့ပြီး ပန်းချီစတူဒီယိုတစ်ခုတွင်ပင် အချိန်ပိုင်းအလုပ်တစ်ခုရခဲ့သည်။ နေ့စဥ်နေ့တိုင်း မိန်းမငယ်လေးများနှင့် စကားကြီးစကားကျယ်ပြောဖြစ်သောကြောင့် အရမ်းမိမိုက်လွန်းသည့်ညီအစ်ကိုတစ်ယောက်ရှိကြောင်းအား မည်သူမဆိုသိနေကြပြီဖြစ်သလို မည်သူကမှလည်းယုံကြည်မနေ။ တခါတရံတွင်လည်း အခမဲ့မော်ဒယ်ထိုင်ပေးဖြစ်ပြန်ပြီး မိန်းမငယ်လေးများက သူ့ခန္ဓာကိုယ်အချိုးအစားသိပ်မမိုက်ကြောင်းပြောဆို၍ မော်ဒယ်အသစ်လဲပေးဖို့ရာစနောက်ကြသေး၏။ ဆရာဖြစ်သူသည်တော့ စိတ်အေးလက်အေးပန်းချီဆွဲနိုင်စေခြင်းကြောင့် သဘောကျသည်ပေ။ သို့သော် ကျူးယန်ချီ မကျေနပ်သဖြင့် စတူဒီယိုမှပြန်သည်နှင့် အနီးအနားတွင်ရှိသည့်အားကစားလေ့ကျင့်ရုံသို့ပြေးလေရာ နှစ်ပတ်အတွင်းမှာတင် သူဟာ အတိအလင်းဖြုတ်ချခံလိုက်ရပါတော့သည်။
ကျန်းချန်သည်တော့ အမှတ်စာရင်းထွက်လာသည့်အခါတွင်မှ မတော်တဆဖြင့် အမှတ်ပေါင်းအဆင်ပြေနေသည့်အတွက် တစ်နှစ်အောက်ပြီးပြန်မဖြေဖြစ်တော့ဘဲ 'စစ်ချွမ်း'သို့သွား၍ ကြော်ငြာဒီဇိုင်းရေးဆွဲသည့်မေဂျာကို ရွေးချယ်သင်ယူဖြစ်ခဲ့သည်။ ဟန်ဆွေ့နှင့်လည်း တက္ကသိုလ်တစ်ခုတည်းဖြစ်ကြောင်း သိရသေး၏။
ဖုန်ကျင့်တစ်ယောက်မှာ 'ကျီလင်'မြို့သို့သွား၍ Animation Photography မေဂျာကို ရွေးချယ်ယူဖြစ်ခဲ့သည်။ သူဟာ နေရာဒေသမျိုးစုံရောက်ဖူးသည့်တိုင် 'ကျီလင်'မြို့ကသာ သူ့အားဆွဲဆောင်ထားနိုင်ကြောင်းပင် ပြောနေသေးသည်။
သာ့ကျွမ့်နှင့်သာ့ကျွင့်တွင် တစ်ယောက်က 'ရှန်ဟိုင်း'တရုတ်အနုပညာတက္ကသိုလ်သို့သွားခဲ့ပြီး တစ်ယောက်က 'ပေကျင်း'အနုပညာတက္ကသိုလ်တစ်ခုဆီသို့ ပညာသင်သွားခဲ့၏။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~