နောက်တစ်နေ့တွင် ချန်လုကျိုးသည် ဗွီဒီယိုအင်တာဗျူးတစ်ခုရှိသောကြောင့် အမေဖြစ်သူက အိမ်ပြန်လာရန်လှမ်းခေါ်ထားသဖြင့် တောင်အောက်ဆင်းဖို့ပြင်ဆင်ရသည်။ ကျောင်းအင်တာဗျူးအတွက်လိုအပ်သည့်အချက်အလက်များအားလုံးကို အိမ်၌ပြင်ဆင်ထားပြီးလည်းဖြစ်သည်။ မနက်စောစောထ၍ သွားတိုက်ပလုတ်ကျင်းနေရင်း သူ့ဖုန်းထဲသို့ မက်ဆေ့ဝင်ထားကြောင်းလှမ်းမြင်လိုက်ရာ အပြေးဖွင့်ကြည့်စရာပင်မလိုဘဲ ရွှီကျစ်ထံမှ ငွေလွှဲမက်ဆေ့ဖြစ်မည်မှန်း အတပ်သိနေတော့၏။
တစ်ကိုယ်ရေပြင်ဆင်ပြီး ဘတ်စ်ကားပေါ်ရောက်သည့်အခါမှသာ လက်ကိုင်ဖုန်းအား ဖွင့်ကြည့်လိုက်သည်။
ရွှီကျစ်က ယွမ်နှစ်ရာ့ငါးဆယ့်တစ်ကျပ် လွှဲထားလေသည်။
သူ ဆဲလိုက်တယ်လို့များ တကယ်ထင်သွားတာလား?....
ချန်လုကျိုးက အရက်ဘား၌ရှင်းထားသည့်ယွမ်ငါးရာတိတိ တစ်ကျပ်မလို၊တစ်ပြားမလျော့သည့် ကျသင့်ငွေပြေစာအား screenshot ရိုက်ပို့ပေးလိုက်သည်။ တစ်ဖက်သားထံ ပို့ပေးပြီးပြီးချင်း၌ပင် သူဟာ အတော်လေးကလေးဆန်သလိုဖြစ်နေမှန်း သတိထားလိုက်မိသည့်အပြင် ဘာမဟုတ်တာလေးနှင့်ငြင်းခုန်နေစရာအကြောင်းမရှိသဖြင့် screenshot အား ပြန်ဖျက်ပြီး လက်ကိုင်ဖုန်းကိုအိတ်ကပ်ထဲထည့်ကာ ထပ်၍လည်းထုတ်မကြည့်တော့၏။
မြို့ထဲသို့ဝင်လာပြီးသော်ငြား ချန်လုကျိုးက မိသားစုဗီလာဆီသို့ အလျင်စလိုမပြန်သေးဘဲ ငှားထားသည့်အဆောင်ဘက်ဆီသို့ ခရီးတစ်ထောက်အရင်ပြန်လိုက်သည်။ ရေအမြန်ချိုး ၊ အဝတ်အစားလဲပြီးနောက်တွင်မှ လက်ကိုင်ဖုန်းယူ၍ မိသားစုဗီလာဘက်သို့ ခရီးဆက်ရန်ပြင်လိုက်၏။ တံတွေးမထွေးရန် အသိပေးတောင်းဆိုထားသည့်စာရွက်ဖြူမှာ တံခါးထက်၌ကပ်ထားဆဲဖြစ်ပြီး အမှိုက်ပုံးထဲတွင်လည်း သန့်ရှင်းနေ၏။ ကြည့်ရသည်မှာ ထိုဦးလေးကြီးက ပြဿနာထပ်မရှာတော့ပုံရသည်။ ချန်လုကျိုးက အခန်းပြင်သို့ထွက်လာရင်း စာရွက်ဖြူကိုလည်းဆွဲဖြုတ်လုံးချေပြီး အမှိုက်ပုံးထဲသို့ပစ်ထည့်ခဲ့သည်။ အပြင်ဘက်တွင် အမျိုးသမီးလျန်ဟွေ့ စီစဥ်ပေးထားသည့်ယာဥ်မောင်းဆရာလည်း ရောက်နှင့်နေပြီဖြစ်သည်။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~