ဤတစ်ကြိမ်တွင် ချန်လုကျိုးက အရင်ဦးစွာ စကားပြန်ဆိုလိုက်သည်။
"အဲ့ဒီတော့ မင်းက ငါနဲ့အတူတူ ပိုက်ဆံရှာကြည့်ချင်သေးတာလား"
"ဒါပေါ့ ၊ ငါတို့နှစ်ယောက် ရည်ရွယ်ချက်ချင်းတူတယ်ဆိုတာမျိုးက ဘယ်လောက်တောင်မှရှားလဲ"
နောက်ဆုံးတွင်တော့ ရွှီကျစ် ပြောချင်နေသည့်စကားများပြောဆိုနိုင်တော့မည့်အလှည့်သို့ ရောက်လာချေပြီ။
"ငါ့မှာ အကြံကောင်းတစ်ခုရှိတယ် ၊ နင် နားထောင်ကြည့်ပါလား"
ချန်လုကျိုးက ထိုင်ခုံအမြင့်ပေါ်တွင်ထိုင်နေသဖြင့်လည်း သူမထက် အနည်းငယ်ပိုမြင့်သလိုဖြစ်နေ၏။ ရွှီကျစ်မှာ ယနေ့တွင်လည်း ဆံပင်တို့ကိုအပြောင်သိမ်း၍ခပ်မြှောက်မြှောက်စည်းထားပြီး နားထင်စပ်လေး၌သာ ဆံပင်မွေးတချို့အား ကပိုကရိုလေးချထားခြင်းကြောင့် နဖူးထက်မှ ချွေးပေါက်လေးများပင် ထင်းရှင်းမြင်သာနေလေ၏။ လူတစ်ယောက်လုံးက သပ်ရပ်၍ကြည်လင်နေသည်မှာလည်း မလွဲမသွေ။ ဤမျှထိမှေးမှိန်မှောင်မိုက်နေသည့်အလင်းရောင်အောက်၌ပင် သူမ၏မျက်လုံးထောင့်မှမျက်ရည်ခံမှည့်လေးအား ချန်လုကျိုး မြင်မိအောင်မြင်သွားရသောကြောင့် ကိုယ့်ကိုကိုယ်ပင် ထိတ်လန့်သွားရတော့သည်။ သေးသေးကွေးကွေးနှင့်အညိုဖျော့ရောင်ရှိသောအစက်လေးတစ်စက်ဟာ ဖယောင်းတိုင်မီးရောင်အောက်တွင် အစက်အပျောက်တစ်ခုသဖွယ် ၊ နှလုံးအိမ်ဖျားထက်မှ သွေးစက်လေးတစ်စက်နှယ် ၊ လက်လှမ်းမမီနိုင်သည့်စိတ်ကူးယဥ်ပုံရိပ်တစ်ခုကဲ့သို့ တည်ရှိနေလေသည်။
နှလုံးခုန်သံများ အတိုင်းအဆမရှိသိသိသာသာကို မြန်ဆန်လာသည့်အခိုက်တွင်တော့ သူ၏အကြည့်တို့မှာ သဲလွန်စလေးမပေါ်ဖို့ရာအတွက် အေးနိုင်သမျှအေးစက်တည်ငြိမ်ရင်း ရွှီကျစ်အား လှမ်းကြည့်နေ၏။
"ပြော"
"နင် blog ရိုက်တာကို သိတယ်မလား ၊ ငါ အထက်တန်းပထမနှစ်တုန်းက ပျင်းလို့ဆိုပြီး 'Golden House' မှာ ဆိုရှယ်အကောင့်တစ်ခုဖွင့်ဖူးတယ် ၊ Golden House ကိုတော့ နင်သိတယ်မလား.....နေ့စဥ်ဘဝအကြောင်းတွေကိုမျှဝေတဲ့ အကြီးဆုံးဆိုရှယ်မီဒီယာပလက်ဖောင်းလေ ၊ အဲ့ဒီမှာဆို များသောအားဖြင့် နေ့စဥ်ဘဝမှာလုပ်ဖြစ်ကြတဲ့ကိစ္စလေးတွေကို မျှဝေတာကွာ ၊ ဟိုတလောတုန်းက ယင်းယင်း ဆံပင်ဆေးဆိုးတဲ့အချိန် ငါတို့ tutorial blog လေးရိုက်ထားသေးတယ် ၊ ဒါပေမယ့် မမျှော်လင့်ထားတာလေးဖြစ်သွားတာ ၊ ယင်းယင်းက အစက နက်ပြာရောင်ဆေးဆိုးချင်တာ.....ဘာဖြစ်သွားမှန်းမသိဘူး အစိမ်းရောင်ကြီးထွက်လာတယ်လေ ၊ အဲ့ဒီဗွီဒီယိုအတိုလေးဆို အရမ်းလူသိများသွားသေးတယ် ၊ ပလက်ဖောင်းပေါ်မှာ click အရေအတွက်ရော Fan အရေအတွက်ပါ သိသိသာသာကြီးတိုးလာတော့တာ ၊ နောက်တော့ လူတချို့က ငါတို့ဆီကို ကြေညာရိုက်ပေးဖို့ကမ်းလှမ်းလာတယ် ၊ ဒါပေမယ့် ငါတို့က ကျောင်းသူတွေပဲရှိသေးတာဆိုတော့ တွေ့ကရာကြော်ငြာမျိုးကို လက်ခံဖို့ကလည်းမရဲဘူးကွာ ၊ အဲ့ဒါနဲ့ ငါတွေးမိလိုက်တာက စတိုးဆိုင်တွေထဲမှာ blog အတိုလေးတွေ ရိုက်မလားလို့ ၊ အင်တာနက်ပေါ်မှာနာမည်ကြီးနေတဲ့ဆိုင်တွေရယ်....စျေးသက်သာတဲ့ဆိုင်တွေရယ်....အဲ့လိုမျိုး အစုံပေါ့ ၊ အဲ့ဒါကြောင့်မလို့ ငါတို့ လိုနေတာက ဓါတ်ပုံဆရာတစ်ယောက်......"
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~