နောက်တစ်နေ့တွင် ချန်လုကျိုးမှ ရွှီကျစ်ကိုသွားကြိုရန်ပြင်ထားပါသော်လည်း သူမဘက်မှ ငြင်းဆန်လာခဲ့သည်။ လူသုံးယောက်အတူတကွထွက်လာကြမည်ဖြစ်သောကြောင့် မည်သည့်အရေးအကြောင်းမှမဖြစ်နိုင်သဖြင့်လည်း ချန်လုကျိုး အတင်းကာရောမပြုတော့ဘဲ လိပ်စာပေးပြီး ရောက်လာသည်နှင့်ဖုန်းဆက်ရန်မှာထားလိုက်သည်။
ထိုအခါတွင်မှ သူမထံ၌ ချန်လုကျိုး၏ဖုန်းနံပါတ်ရှိမနေမှန်း ရွှီကျစ် သတိထားမိတော့၏။ နှစ်ယောက်သားက Wechat မှတဆင့်သာဆက်သွယ်နေကြခြင်း။ နောက်တွင်တော့ သတိပေးစရာမလိုပါဘဲနှင့် ချန်လုကျိုးက ကိန်းဂဏာန်းနံပါတ်တစ်ခုအား အလိုတသိပေးပို့လာ၏။
Cr : [ 1838991×××× ၊ ဖုန်းဆက်လိုက် ၊ Wechat ကမကြားရဘူး ]
ရွှီကျစ်က ဖုန်းနံပါတ်အားမှတ်ရင်း ခပ်တိုးတိုးလေးလည်းရွတ်ဖတ်လိုက်သည်။ ကားအရှေ့ခန်းတွင်ထိုင်နေသည့်ဖုန်ကျင့်မှာ ရွှီကျစ်တို့နှစ်ဦးသားက မည်သူနှင့်သွားတွေ့ကြမည်မှန်း သူ မသိ ၊ ဖုန်းနံပါတ်အားကြားလိုက်ရသည့်အချိန်တွင်တော့ အနည်းငယ်ရင်းနှီးဖူးထားသလိုရှိနေ၏။ သို့သော်လည်း မည်သူ့ဖုန်းနံပါတ်မှန်း သူ စဥ်းစားမရပြန်ပါပေ။ ဖုန်းနံပါတ်၏နောက်ဆုံးဂဏာန်းလေးလုံးဟာ အစဥ်လိုက်နံပါတ်များဖြစ်၍ တစ်နေရာရာ၌ကြားဖူးထားသည်မှာတော့ သေချာနေ၏။ ဤကဲ့သို့သောဖုန်းနံပါတ်မျိုးဟာ အလွန်ကိုမှရှားပါးပြီး သူ ဆက်သွယ်ရေးကုမ္ပဏီသို့သွား၍ နံပါတ်ထုတ်ယူစဥ်အခါကပင် မှတ်သားရခက်ခဲသည့်နံပါတ်မျိုးများသာထုတ်ပေးချေသည်။
လေ့ကျင့်ရေးကွင်းသို့ရောက်လာသည့်အချိန်တွင် ချန်လုကျိုးက အပြင်ဘက်ရှိပန်းခုံဘေးနားတွင်ရပ်ပြီး အိတ်ကပ်ထဲလက်နှစ်ဖက်ထည့်၍ ရပ်စောင့်နေသည်။
ဖုန်ကျင့်မှာ ပန်းခုံဘေးနားတွင်ရပ်နေသည့်သောက်ချောကြီးအား ချက်ချင်းမမှတ်မိနိုင်သေးသော်ငြား ချန်လုကျိုးသည်တော့ တစ်ဖက်လူကို မျက်မှန်းတန်းမိသွားပြီဖြစ်၏။ နှစ်ဦးသားက တွေ့ဆုံကြဖူးခြင်းမရှိသည့်တိုင် ကျူးယန်ချီဖုန်းထဲမှ ဓါတ်ပုံများဖြင့်သော်လည်းကောင်း ၊ Video called ဖြင့်သော်လည်းကောင်း နှစ်ကြိမ်တွေ့ဖူးကြ၏။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~