'ပေါ်ဟွေ့'ရုပ်ရှင်ရုံကြီးသည် မြို့လယ်ခေါင်အချက်အချာကျသည့်နေရာတွင်ရှိပြီး မြေနေရာတစ်လက်မချင်းစီတိုင်းက ရွှေနီးနီးတန်ဖိုးကြီးလှသည်။ ရုပ်ရှင်ရုံကြီးထဲသို့ နေ့စဥ်နေ့တိုင်း ဝင်ထွက်သွားလာနေကြသည့်လူပေါင်းသောင်းချီရှိပြီး ရွှီကျစ်နှင့်ချိုက်ယင်းယင်းမှာ ဤလူအုပ်ကြီးထဲမှနေ၍ တိရှောင်းနှင့်သူ့ရည်းစားလေးအား တကူးတကကိုတွေ့လိုက်ရသေး၏။ တိရှောင်း၏ရည်းစားကောင်မလေးမှာ သူတို့အရွယ်နှင့်ဆိုရလျှင် အနည်းငယ်ရင့်ကျက်ပုံပေါက်သည့် ဆံပင်လိုင်းတွန့်ပုံစံမျိုးပြုလုပ်ထားပြီး မီနီစကတ်လေးနှင့်လိုက်ဖက်သည့်ခြေတံရှည်တို့မှာလည်း သေးသေးသွယ်သွယ်လေးဖြစ်သည်။ အနှီချိုင်ကျင်းကျင်းဟာ ဓါတ်ပုံထဲမှထက်ပင် အပြင်မှာပိုလှလေသည်။
ချိုင်ကျင်းကျင်း၏လက်ထဲတွင် ပေါက်ပေါက်ဆုပ်နှစ်ဘူးကိုင်ထားပြီး တိရှောင်းလက်ထဲမှ ရုပ်ရှင်လက်မှတ်ကိုလည်း လှမ်းယူကြည့်လိုက်ရင်း နှစ်ဦးသားက အကြည့်ချင်းဆုံ ၊ တပြုံးပြုံးလုပ်၍ လက်မှတ်စစ်ဆေးသည့်ဂိတ်ထဲသို့ဝင်သွားခဲ့ကြသည်။ တိရှောင်းတစ်ယောက် အတော်လေးကြည့်ကောင်းသည်မှာလည်း အမှန်တကယ်ပေ။ မဟုတ်ပါက ချိုက်ယင်းယင်း ယခုအချိန်ထိ တသသနှင့်မမေ့နိုင်ဖြစ်နေမည်မဟုတ်။ ထို့ကြောင့် ရည်းစားဟောင်း၏အခေါင်းကို သေချာပေါက်လုံခြုံအောင်ပိတ်ထားရတော့မည်ဖြစ်ကာ လေဝင်ပေါက်လေးရသွားရုံနှင့်ပင် အချိန်မရွေး ခေါင်းပြန်ထောင်လာနိုင်သည့်အနေအထားမျိုး၌ရှိနေသည်။
နဂိုကတည်းက ခက်ခက်ခဲခဲ တံဆိပ်ခတ်ပိတ်လှောင်ထားရသည့်အရာတစ်ခု တဖန်ပြန်လည်တိုးလျှိုးထွက်လာသည့်အချိန်တွင်တော့ ချိုက်ယင်းယင်း၏စိတ်ထဲ ခံစားချက်တို့ပြည့်နှက်ဖုံးလွှမ်းလာချေတော့သည်။ ရုပ်ရည်ရူပကာကြည့်ကောင်းလွန်းသည့်စုံတွဲ၏နောက်ကျောပြင်ကိုလှမ်းကြည့်ရင်း ချိုက်ယင်းယင်း အံကျိတ်မိကာ ;
"ရွှီကျစ်....ငါ စဥ်းစားပြီးသွားပြီ ၊ ငါ စာမေးပွဲပြန်ဖြေပြီး 'ချင့်ယီ'တက္ကသိုလ်ရောက်အောင်ကြိုးစားတော့မယ်"
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~