လက်ရှိအခိုက်အတန့်တွင် ချန်လုကျိုးသည် မတ်မတ်ထိုင်နေရမည်ကိုပင်ပန်းလွန်းလှသဖြင့် ထိုင်ခုံနောက်သို့ပစ်မှီရင်း ခြေထောက်နှစ်ချောင်းချိတ်၍ဆန့်ထုတ်ထားကာ A တက္ကသိုလ် ထိပ်တန်းကျောင်းသားပုံရိပ်ကိုပင် မထိန်းထားတော့။ ပင်ပန်းနေသည့်ပုံစံမျိုးပေါက်ပါသော်လည်း စိတ်ခံစားချက်အတက်အကြွကိုထိန်း၍ စကားဆိုနေဆဲဖြစ်သည်။
"ငါ သူ့ကို အတည်ရည်ရွယ်ထားတာမှန်း လီခယ်ရော ကျူးယန်ချီရောသိတယ် ၊ ဒီအတိုင်း ရည်းစားထားရရုံသက်သက်တွဲနေတာမဟုတ်ဘူး"
ကျန်းချန်က ရုတ်တရက်ပြောစရာစကားမဲ့သွားပြီး ချန်လုကျိုး၏စကားဆိုလိုရင်းအား ဖြည်းဖြည်းချင်းသဘောပေါက်လာခဲ့သည်။
ယောက်ျားလေးများကြားတွင် ထုတ်ပြောစရာမလိုဘဲ အချင်းချင်းနားလည်သဘောပေါက်တတ်ကြသည့်အကျင့်တစ်မျိုးမှာ အကယ်၍ ကာယကံရှင်ကိုယ်တိုင်က သူ့ရည်းစားကောင်မလေးနှင့်ပတ်သတ်ပြီး အလေးအနက်မရည်ရွယ်ထားလျှင် သူ၏အပေါင်းအသင်းညီအစ်ကိုများဟာလည်း အထူးတလည်စိတ်ဝင်စားနေပေးခြင်းမရှိ။
ကျန်းချန်သည် ချန်လုကျိုး၏ဆိုလိုရင်းကို သဘောပေါက်လိုက်ပြီးသည်နှင့် ထပ်ခါတလဲလဲခေါင်းငြိမ့်ပြကာ မတိုးမကျယ်စကားဆိုလိုက်သည်။
"နားလည်ပြီ နားလည်ပြီ ၊ အားပေးတယ် အားပေးတယ် ၊ နောက်ဆို မင်းဘက်ကနေ အားပေးမယ်"
ကျူးယန်ချီက တစ်ဖက်တွင် အသံတိတ်နေသည့်လီခယ်ထံသို့ လှမ်းကြည့်၍ ;
"မင်း ဘာလုပ်နေတာလဲ"
လီခယ်က မျက်စောင်းတစ်ချက်ထိုးကြည့်လာ၏။
"အချိန်တွက်ကြည့်နေတာ"
ကျူးယန်ချီက မနေနိုင်အောင်ဘဲ တစ်ချက်ဆဲရေးပစ်လိုက်ရင်း ;
"ငိုး ဒီကောင့်စာတမ်းက ရေးလို့ကိုမပြီးနိုင်တော့ဘူးလား ၊ ပြိုင်ပွဲပြီးပြီးချင်းတော့ ကိုယ့်ကိုယ်ကိုယ်လည်း နားရက်ပေးလိုက်ပါဦး ဟုတ်ပြီလား"
လီခယ်က ချန်လုကျိုးထံ လှမ်းစကားဆို၏။
"ငါ အခုပဲတွက်ကြည့်လိုက်တော့ ဟိုးအစကနေအဆုံးထိ မင်းတို့နှစ်ယောက်ရဲ့ဆက်ဆံရေးအကြောင်းကို နောက်ဆုံးမှသိလိုက်ရတဲ့လူက ငါ မလား"
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~