ရွှီကျစ် တစ်ဖက်သို့လှည့်ကြည့်လိုက်လျှင် ချိုက်ယင်းယင်းမှာ အမူးလွန်၍ အသိစိတ်လွတ်လုနီးပါး ၊ လည်ပင်းတစ်လျှောက်လုံးအပြင် လက်မောင်းနှင့်ခြေထောက်နှစ်ဖက်လုံးပါ ရဲရဲနီစွေးနေလေသည်။ ရွှီကျစ်က မူမမှန်တော့သည်ကို သတိထားမိလိုက်သဖြင့် ချန်လုကျိုးထံသို့ အမြန်မေးကြည့်မိလိုက်၏။
"သူ အယ်လ်ကိုဟောအလက်ဂျစ်ဖြစ်နေတာတော့ မဟုတ်ဘူးမလား"
ချန်လုကျိုး ထိုင်ခုံပေါ်မှအမြန်ထလိုက်ပြီး အနားထိတိုးကပ်၍ကြည့်လိုက်၏။ အရက်ဘားထဲ၌ အမှောင်ရိပ်များနေသည့်အပြင် ချိုက်ယင်းယင်း၏အသားအရောင်မှာ အဝါဘက်သန်းသည့်အတွက် ခွဲခြားကြည့်ဖို့ရာ အခက်တွေ့နေသောကြောင့် ချန်လုကျိုးက လက်ကိုင်ဖုန်းမီးကိုဖွင့်လိုက်သည်။ ချိုက်ယင်းယင်းမှာ အသိစိတ်လွတ်ခါနီးဆဲဆဲအခြေအနေတွင်သာဖြစ်ပြီး အမှန်တကယ်သတိမေ့နေခြင်းမဟုတ် ၊ ထို့ကြောင့် အခြားသူပြောသမျှစကားတိုင်းကို အကြမ်းဖျင်းနားထောင်နိုင်နေဆဲဖြစ်ရာ သည်အခိုက်အတန့်တွင် ချိုက်ယင်းယင်းတစ်ယောက် သူမဟာ ချန်လုကျိုး၏အမြင်၌ ဝက်သားတုံးတစ်တုံးနှင့်မထူးမခြားနားလိုဖြစ်နေရတော့မည်ကိုတွေးရင်း နောက်ထပ်'ရိုက်ချက်'ပြင်းပြင်းတစ်ချက်ကို ထပ်ခံစားလိုက်ရချေတော့သည်။
ချန်လုကျိုးက မေးလိုက်၏။
"သူ အရင်တုန်းက အရက်သောက်ဖူးလား"
"မသောက်ဖူးဘူး ၊ ပထမဆုံးအကြိမ်"
ချန်လုကျိုး ;
"မင်း သူ့ကို ယားမယားမေးကြည့်လိုက် ၊ အကယ်၍ ယားတယ် အသက်ရှူရတာအဆင်မပြေဘူးဆိုရင်တော့ ဆေးရုံသွားမှဖြစ်မယ် ၊ ဒီအတိုင်းပဲ နီနေတာဆိုရင်တော့ ကိစ္စမရှိဘူး ၊ ခဏနေကျရင် သက်သာသွားလိမ့်မယ်"
ချိုက်ယင်းယင်းက ယားယံခြင်းမရှိဘဲ ရင်ဘတ်ထဲ သက်သောင့်သက်သာမရှိဟုသာ စကားဆိုလာ၏။
ချန်လုကျိုးက မည်သို့သက်သောင့်သက်သာမရှိကြောင်း သေချာထပ်မေးလိုက်သည်။
YOU ARE READING
Lets Fall In Love [ ဘာသာပြန် ]
Romanceလမင်းကြီးဝိုင်းသည်ဖြစ်စေ မဝိုင်းတော့ဘူးဖြစ်စေ ဘာဟာကမှ အရေးမကြီးဘူး ကိုယ်တစ်ယောက်လုံး မင်းဘေးနားမှာရှိနေပေးမယ်~~~~