အသံတိတ်ထမင်းဝိုင်း......
ထမင်းစားပွဲတွင် ဇွန်းသံခက်ရင်းသံများသာ ပုံမှန်ထွက်လျက်ရှိသည်။ လူသုံးယောက် မျက်နှာချင်းဆိုင်စားနေကြသော်လည်း တစ်ယောက်မှစကားမဟမိကြသဖြင့် လေထုသည်အေးတိအေးစက်နိုင်နေ၏။
အတိအကျပြောရရင် ၂ ရက်တိတိ၊ ထမင်း ၇နပ်စာမျှကြာကြာ အိမ်တွင်းအသံတိတ်တိုက်ပွဲစတင်ဖြစ်ပွားနေခြင်းဟုဆိုနိုင်သည်။
အကြောင်းစုံကတော့ လွန်ခဲ့သည့်သုံးရက်ခန့်က ဆိုရှယ်မီဒီယာပေါ်တွင် "အဆိုတော်သက်မင်းခန့်ထင်နှင့် သရုပ်ဆောင်မင်းသမီးရောင်စဥ်လှိုင်းတို့ အတန်းတွင်းချိန်းတွေ့နေ" ဟူသော သတင်းများပုံများ ပလူပျံအောင်တက်လာပြီး ထိန်းမနိုင်ခဲ့ချိန်မှစတင်သည်။ ကာယကံရှင်နှစ်ဦးကိုယ်တိုင် ဖြေရှင်းပြီးသည့်တိုင် သတင်းများသည် ငွေ့ငွေ့လေးတော့ရှိနေကြသေးသည်။
ခေတ်ကိုက ဆိုရှယ်မီဒီယာခေတ်ကိုး။
ကိုယ့်ကိုယ်ကိုယ်မထိခိုက်ဖို့ကလွဲရင် သူများထိချင်ထိပါစေ "ဖြတ် ဖြတ်"ဆိုပြီးလက်ချောင်းလေးတွေအနည်းငယ်လှုပ်လိုက်ရုံနဲ့ စိတ်အာသာပြေဝင်ယောင်လို့ရနေတဲ့ခေတ်ကိုး။
ရောင်စဥ်ကတော့ ဆိုရှယ်မီဒီယာက သုံးတတ်ရင်အကျိုးပေးသလောက် မသုံးတတ်ရင် အဆိပ်အတောက်လည်းများလွန်းသည်ဟုထင်သည်။ ကိုယ့်ရဲ့လတ်တလောလှုပ်ရှားမှုလေးတွေကို ပရိတ်သတ်တွေမပြတ်သိနေဖို့အတွက်သာ ဖွင့်ထားရခြင်းပင်။ ကိုယ့်တစ်ယောက်တည်းဆို သုံးချင်မှသုံးမိမှာ။ နှုတ်ကမထွက်ရတိုင်း ကီးဘုတ်တစ်ခုပေါ်မှာ စည်းစောင့်မှုမရှိကြဘဲ လျှောက်ရေးကြ ဇကာချဲ့ကြ ဝေဖန်ကြ တောင်ရေးမြောက်ရေးလုပ်ကြ။
ရောင်စဥ်က မင်းသမီးဆိုတော့လည်း တစ်ခုမဟုတ်တစ်ခု ခေါင်းစဥ်အမျိုးမျိုးနဲ့အရေးခံနေရမှာပဲဆိုတာ သိပါသည်။ ဟိုတစ်ပတ်ကမှ "တက်သစ်စမင်းသမီးအသစ် ရောင်စဥ်လှိုင်း ပွဲဦးထွက်ကားမှာပင် များစွာချီးကျူးခံနေရ" "နောက်တက်လမ်းများစွာရှိသည့်မင်းသမီးတစ်လက်ဟု ထင်ကြေးပေးနေကြ" "အကယ်ဒမီရထိုက်သည်ဟု တစ်ကြိုပေးခြင်းခံနေရ" စသဖြင့် အများကြီးရေးခံခဲ့ရပြီ။
