"၂၀၂၆ ခုနှစ် မြန်မာ့ရုပ်ရှင်အကယ်ဒမီပေးပွဲအခမ်းအနားသို့ အဖွဲ့ဝင်စုံစုံလင်လင်ဖြင့် အမှန်တကယ်တက်ရောက်လာပြီဖြစ်သည့် ကမ္ဘာကျော် K Pop Band Artist-K အဖွဲ့"
ယနေ့အတွက် အကြီးမားဆုံးသောခေါင်းကြီးပိုင်းသတင်းတစ်ခု။
ပြည်သူ့ရင်ပြင်တွင် ရွှေတိဂုံဘုရားကိုနောက်ခံထား၍ ကျင်းပသည့် မြန်မာ့ရုပ်ရှင်အကယ်ဒမီအခမ်းအနားသို့ Artist-K အဖွဲ့ တတိယအကြိမ်မြောက်ဖိတ်ကြားခံခဲ့ရသည်။ အရင်နှစ်တွေက အချိန်ဇယားတွေမအားလပ်သည်မို့ မတက်ဖြစ်ခဲ့ဘဲ ခုနှစ်တော့တက်ဖြစ်ခဲ့သည်။ ပြည်တွင်းနာမည်အကြီးဆုံးပွဲတစ်ခုဖြစ်ကာ နဂိုကြီးပြီးသားအရှိန်အဝါသည် ကမ္ဘာကျော် K Pop Band ဖြစ်သည့် Artist-K အဖွဲ့တက်ရောက်လာသည့်သတင်းအောက်တွင် ပြည်ပနိုင်ငံများထိပျံ့နှံ့သွားသည်။
သတင်းထောက်တွေလည်းအုံလို့။ တက်ရောက်လာသည့် မင်းသားမင်းသမီးများအား ကြိုဆိုသည့် ဧည့်ကြိုများကလည်း ပျားပန်းခတ်နေသည်။ နိုင်ငံကျော်များထဲကမှ ကမ္ဘာကျော်တစ်ဖွဲ့တက်ရောက်လာသည်မို့ တတ်နိုင်သမျှ ဧည့်ဝတ်ကျေပွန်သင့်သည်ဟုဆိုကာ ပေါ့သေးသေးတန်မလုပ်ဝံ့ကြ။ ကော်ဇောနီတလျှောက် မိမိုက်လွန်းသောဒီဇိုင်းဖက်ရှင်များနှင့် ယနေ့ပွဲအတွက်အလှဆုံးဖြစ်အောင်ပြင်တင်လာကြသော အနုပညာရှင်များကလည်း တစ်ယောက်ပြီးတစ်ယောက်။
အကယ်ဒမီရွှေစင်ရုပ်တုကြီးနှစ်ခုကလည်း ဝင်ပေါက်နားတွင် လှပစွာမျက်နှာချင်းဆိုင်လျက်။
ကားတစ်စီးထိုးရပ်လာလိုက် လူတွေအုံလိုက်။ အနုပညာရှင်တစ်ယောက်ထွက်လာလိုက် ဓာတ်ပုံတွေဝိုင်းရိုက်လိုက်၊ အင်တာဗျူးလိုက်။ တက်ရောက်လာသည့်အနုပညာရှင်များ၏သတင်းကလည်း Up to date တက်နေကြပြီးသား။
Artist-K အနေနှင့်လည်း တက်ဖြစ်မတက်ဖြစ်ကြားကနေ လျှို့ဝှက်စွာပြန်လာပြီး ကော်ဇောနီပေါ်ခြေချလိုက်မှ "Artist-K ပွဲတက်လာတယ်ဟ"ဆိုပြီး အံ့သြသွားအောင်လုပ်ချလိုက်တာမျိုး။ အဖြူရောင် Suit ကိုယ်စီနှင့် ဖြူလွှလွှနတ်သားလေးခြောက်ယောက် လူ့ပြည်ဆင်းသက်လာသည့်အတိုင်းပင်။
