ဤသို့ဖြင့် ဂုဏ်ယူစရာ အချိန်ပိုင်း အလုပ်သမားများမှာ အချောင်သက်သက် ဓားစာခံ ဖြစ်သွားရပြန်သည်။
ဤသည်က ဟွာရှို့နိုင်ငံ၏ နိုင်ငံခြားရေး ဝန်ကြီးဌာနက တစ်ခုခုကို ပြင်းပြင်းထန်ထန် ရှုတ်ချခြင်း သို့မဟုတ် ကန့်ကွက်သည့် အချိန်မျိုးတွင် အစိုးရဌာနများ ကျင့်သုံးလေ့ရှိသည့် စံတုံ့ပြန်မှု ပုံစံ ဖြစ်ကြောင်း ဝမ်လင်းသိသည်။
ဤသည်မှာ အင်တာဗျူးမေးခွန်း အမျိုးမျိုးကို ဖြေကြားရန် ကုထုံး ကဲ့သို့ အသုံးပြုနိုင်သော အကြောင်းပြချက် စကားလုံးမျိုး ဖြစ်၏။
ထောင်ဖောက်ပြေးသည့် မိန်းကလေးနှင့် ပတ်သက်သည့် သတင်းများကို အွန်လိုင်းပေါ်တွင် သိပ်မတွေ့ရချေ။
ဝမ်လင်းက သတင်းနှင့် ပတ်သက်သည့် အပလီကေးရှင်းများစွာကို ဖွင့်ကြည့်ခဲ့ရာ ဤဖြစ်ရပ်နှင့် ပတ်သက်သည့် မှတ်ချက်အနည်းငယ်ကိုသာ တွေ့ရှိခဲ့သည်။
ယင်းက မေမေဝမ်၏ ကိစ္စလိုပင်။
ဤအဖြစ်အပျက်နှင့် ပတ်သက်သည့် အရာမှန်သမျှမှာ ဖိနှိပ်ခံထားရကြောင်း သိသာထင်ရှားနေသည်။
ဝမ်လင်းက တီဗီကို ပိတ်ပစ်လိုက်သည်။
သို့သော် သတင်းတစ်ပုဒ်ကို ကြည့်ပြီး ဝမ်လင်း စိတ်ထဲတွင် တစ်မျိုးကြီး ခံစားနေရသည်။
သူ့မျက်ခွံတွေ တဆတ်ဆတ် တုန်ယင်လာ၏။
ဤတစ်ကြိမ်က ကပ်ဘေးအန္တရာယ် အဆင့် ကြယ်သုံးပွင့် ဖြစ်သည်။
ထို့ကြောင့် ဝမ်လင်းက ဤစနေနေ့တွင် ဘယ်မှမသွားဘဲ အိမ်တွင်သာ ရှိနေသော်လည်း စိတ်မသက်မသာ ခံစားနေရသည်။
မကြာခဏ မျက်ခွံ လှုပ်နေမှုကြောင့် သူအနည်းငယ် စိုးရွံ့နေ၏။
ထောင်ဖောင်ပြေးသွားသည့် ဝရမ်းပြေး ကျန်းလျှိုယင်း ဘာတွေများ လုပ်နေပါသနည်း။
ဝမ်လင်းက ကုတင်ပေါ်တွင် လှဲကာ ခေါင်းကို လက်နှစ်ဖက်ဖြင့် အုပ်ကိုင်၍ အတွေးများ ကယောက်ကယက် ဖြစ်နေသည်။
လက်ရှိအချိန်တွင် ထောင်က လွတ်ခါစ ဖြစ်သောကြောင့် သူမအနေဖြင့် အမှတ် ၅၉ အထက်တန်းကျောင်းနဲ့ အမှတ် ၆၀ အထက်တန်း ကျောင်းကို လက်စားချေရန် မဖြစ်နိုင်သေးမှန်း ထင်ရှားနေသည်။
