တားမြစ်ဇုန် ဆယ့်သုံး(တားျမစ္ဇုန္ ဆယ့္သုံး)[Book-1]

အခန်း-(၂၅) အတွင်းစိတ် နတ်ဆိုးများ

Unicode

ကျွန်မတို့အားလုံး ကူဖေးရဲ့ဆိုင်ပြန်ရောက်လာတဲ့ချိန်မှာ သူ့ရဲ့ဒဏ်ရာတွေက သက်သာသွားခဲ့ပါပြီ။သူကသန်မာတဲ့ သူ့ရဲ့လက်မောင်းတွေနဲ့ကောင်တာပေါ် အဝတ်တစ်ထည်နဲ့ ဖုန်သုတ်နေတာပါ။ကျွန်မတို့ပြန်ရောက်လာတာမြင်တော့ သူကအံ့ဩနေရာကနေ သွားတွေပေါ်တဲ့အထိ ပြုံးပြလာတယ်။

"အားလုံးက ကျွန်တော့်ရဲ့ လက်ဖက်ရည်ကို လွမ်းနေကြတဲ့ပုံပဲဗျာ"

ကျွန်မလည်း နှုတ်ခမ်းတွေကွေးညွတ်နေအောင် ပြုံးပြရင်းပြန်ပြောလိုက်တယ်။

"ကျွန်မတို့တွေ ရှင့်ရဲ့ လက်ဖက်ရည်ကို မြည်းစမ်းကြည့်ဖို့ရာ အခွင့်အရေးတောင်မရခဲ့ဘူးလေ"

ကူဖေးက ရှက်ပြီး အယောင်ယောင်မှားမှားဖြစ်သွားတဲ့ပုံနဲ့ ခေါင်းကုတ်ရင်း ရယ်တယ်။

"ဟား ဟား ဒါဖြင့် ကျွန်တော်အခုလုပ်ပေးပါ့မယ်"

ကျောက်Sက လက်ကို ခပ်ကြမ်းကြမ်းမြှောက်ပြီး ဝှေ့ယမ်းပြတယ်။

"ကျွန်မတို့လာတာ လက်ဖက်ရည်သောက်ဖို့လာတာ မဟုတ်ဘူး ပြောရရင် မကြာခင်ကမှ ဆုံးသွားတဲ့ ရှင့်အဘွားနဲ့တွေ့ခဲ့လို့လာတာ ရှင့်ကိုကူညီပေးဖို့ပါ တောင်းဆိုသွားတယ် ဒီတော့ ရှင် ကျွန်မတို့ကို အမှန်အတိုင်းမပြောဘဲ ထိမ်ချန်ထားဦးမှာလား"

ကျွန်မ ကျောက်Sကို စိတ်ပေါက်ပေါက်နဲ့ စိုက်ကြည့်မိတယ်။သူမကလေ ဘယ်လိုတောင် တဲ့တိုးကြီးမြန်မြန်ဆန်ဆန် ပြောချပစ်လိုက်တာပါလိမ့်?

ပိုစိတ်ရှုပ်စရာကောင်းတာက ကူဖေးရဲ့ အူကြောင်ကြောင်ဖြစ်နေတဲ့ အမူအရာပါ။သူက ကြောင်အနေတဲ့ရုပ်တည်ကြီးနဲ့ ကျွန်မတို့ကိုပြန်ပြောလာတယ်။

"ဘာတွေလာပြောနေတာလဲ‌ဗျ ကျွန်တော့်အဘွားဟုတ်လား ကျွန်တော့်မှာ အဘွားမှ မရှိတာဗျာ"

‌"လက်တွေ့ကမ္ဘာက ရှင့်အဘွားရှင်တောင် မမှတ်မိတော့ဘူးလား အဘွားခမျာ ရှင်မသိအောင် တားမြစ်ဇုန်ထဲလိုက်လာခဲ့တာသိလား ပြောရရင် ရှင်ကိုမာဝင်သွားပြီး‌တာနဲ့ အဘွားလည်းရူးမတတ်ဖြစ်ပြီး ဒီရောက်လာခဲ့တာတဲ့"